ޓީސީ ޓީމު ލަންކާގައި ތާށިވެފައި

ކޮރޯނާވައިރަސް (ކޮވިޑް-19) އާ ގުޅިގެން ސްރީލަންކާގައި ކަރަންޓީނުކޮށްފައި އޮތް ޓީސީ ސްޕޯޓްސް ކްލަބު ރާއްޖެ ގެނައުމުގެ ކަންކަން ބަލަމުންދާ ކަމަށް ނެޝަނަލް އިމަޖެންސީ އޮޕަރޭޝަން ސެންޓަރުގެ ތަރުޖަމާން އަދި ރައީސް އޮފީހުގެ އަންޑަ ސެކްރެޓަރީ މަބްރޫކް އަބްދުލް އަޒީޒް ވިދާޅުވެއްޖެ އެވެ.

ލަންކާގައި ޓީސީ ކަރަންޓީނު ކުރީ މި މަހުގެ 12 ވަނަ ދުވަހު އެވެ. އޭއެފްސީ ކަޕުގައި ބަޝުންދުރާ ކިންގްސްއާ ދެކޮޅަށް ކުޅުމަށް ޓީސީ ޓީމު ބަންގްލަދޭޝްއަށް ދިޔުމުން، ސަރުކާރުން ވަނީ ޓީސީ ޓީމު ރާއްޖެ އައުމުގެ ކުރިން ލަންކާގައި ކަރަންޓީނުގެ މުއްދަތު ކަމަށްވާ 14 ދުވަސް ފުރިހަމަ ކުރުމަށް ނިންމާފައެވެ.

ލަންކާގައި ޓީސީގެ ކަރަންޓީނު މުއްދަތު މި މަހު 26 ވަނަ ދުވަހު ހަމަވި ނަމަވެސް، އޭގެ ހަތަރު ދުވަސް ކުރިން ލަންކާ ވަނީ ލޮކްޑައުންކޮށްފަ އެވެ. އަދި ވައިގެ ދަތުރުތައްވެސް ވަނީ މެދުކަނޑާލާފައެވެ.

މަބްރޫކް އަބްދުލް އަޒީޒް ވިދާޅުވީ ކުޅިވބަރާ ބެހޭ ވަޒީރު އަހުމަދު މަހުލޫފް ވާހަކަ ދައްކަވައި ޓީސީ ގެނައުމުގެ މަސައްކަތް އެ ވުޒާރާއިން ކުރައްވާނަމަ އެކަމެއް ކުރައްވާނީ ޚާރިޖީ ވުޒާރާއާ ގުޅިގެން އެ އޮންނަ އުސޫލުގެ ތެރެއިން ކަމަށާއި، އެ ގޮތަށް މީހުން އަރުވައިގެން ފްލައިޓެއް ދަތުރުކުރެވޭ ގޮތެއްވެއްޖެނަމަ އެ ފުރުސަތެއްގައި އަންނަން ތިބި އެހެން މީހުންނަށް ވެސް ރާއްޖެ އަންނަން ޖާގަ ދޭނެ ކަމަށެވެ.

ރާއްޖެ.އެމްވީ އަށް މައުލޫމާތުދެމުން ޓީސީގެ އޮފިޝަލަކު ބުނީ ލަންކާ ލޮކްޑައުންކޮށްފައި އޮތުމުން މި ވަގުތު ރާއްޖެއަށް ދެވޭނެ ގޮތެއް ނެތް ކަމަށާއި، ނަމަވެސް ގެންދެވޭނެ ފުރުސަތެއް ލިބުނުހާ އަވަހަކަށް އެޓީމުގެ ކުޅުންތެރިންނާއި އޮފިޝަލުން ރާއްޖެ ގެންދާނެ ކަމަށް ސަރުކާރުން އަންގާފައިވާ ކަމަށެވެ.

ޓީސީގެ ކުޅުންތެރިންނާއި އޮފިޝަލުން މި ވަގުތު ތިބީ ލަންކާގެ މެރީނޯ ބީޗު ހޮޓަލުގަ އެވެ. ޓީސީގެ ޚަރަދުތައް ހަމަޖައްސާފައިވަނީ ސަރުކާރުންނެވެ.

ޓީސީ ޓީމު ލަންކާގައި ތާށިވިއިރު، މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް-19 ގެ ސަބަބުން އޭއެފްސީން ވަނީ މާޗު މަހާއި އޭޕްރީލް މަހު އޭއެފްސީ ކަޕްގެ ހުރިހާ ސަރަހަދެއްގައި ކުޅެން ތާވަލުކޮށްފައި ހުރި މެޗުތައް ފަސްކޮށްފައެވެ. ދެން އެ މެޗުތައް ކުޅޭނެ ތާރީޚެއް އޭޕްރީލް މަހަށްފަހު ކަނޑައަޅާނެ ކަމަށް އޭއެފްސީން ވަނީ ބުނެފައެވެ.