ދުނިޔޭގެ ފަތުރުވެރިކަމުގެ ސިނާއަތަށް 300-450 ބިލިއަން ޑޮލަރާ ދެމެދުގެ އަދަދަކަށް ގެއްލުން!

ބަވަނަވެފައިވާ ދުނިޔޭގައި ފަތުރުވެރިންގެ ގޮތުގައި އެއް ގައުމުން އަނެއް ގައުމަށް ދަތުރުކުރުން ވަނީ އިންތިހާއަށް އިތުރުވެފައެވެ. އދ. ގެ ފަތުރުވެރިކަމާބެހޭ ޖަމިއްޔާ (ވަރލްޑް ޓޫރިޒަމް އޯގަނައިޒޭޝަން) އިން އާންމުކޮށްފައިވާ ތަފާސްހިސާބުތަކަށް ބަލާއިރު، 2019 ވަނަ އަހަރު ދުނިޔޭގެ އެކި ގައުމުތަކަށް ފަތުރުވެރިންގެ ގޮތުގައި، 1.5 ބިލިއަން މީހުން ދަތުރުކޮށްފައިވެއެވެ.

ނަމަވެސް، ކޮވިޑް-19 ގެ ވަބާ ދުނިޔޭގެ ހަތަރު ބިތަށް ފެތުރި، ބަދަލުވެފައިވާ ހާލަތާއި ގުޅިގެން، ފަތުރުވެރިކަމުގެ ސިނާއަތަށް ވަނީ ބޮޑު ހީނަރުކަމެއް އައިސްފައެވެ. ޔޫއެންޑަބްލިޔުޓީއޯ އިން އާންމުކޮށްފައިވާ ރިޕޯޓެއްގައި ވަނީ އެއް ގައުމުން އަނެއް ގައުމަށް ދަތުރުކުރާ ފަތުރުވެރިންގެ އަދަދު 20 އިންސައްތައާއި 30 އިންސައްތައާ ދެމެދުގެ އަދަދަކަށް ދަށަށް ދާނެ ކަމަށް އަންދާޒާކޮށްފައެވެ.

ފަތުރުވެރިކަމުގެ ސިނާއަތަށް މިވަރުގެ ބޮޑު ހީނަރުކަމެއް އައި މައިގަނޑު ސަބަބަކީ، އެއް ގައުމުން އަނެއް ގައުމަށް މީހުން އެތެރެވުމާއި ބޭރުވުން ހުއްޓުމަކަށް ގެނެސް، ދަތުރުފަތުރުކުރުން މަނާކުރުމާއި ގުޅިގެންނެވެ. ގިނަ ގައުމުތަކަކުން ވަނީ އެ ގައުމުތަކުގެ އިހްތިސާސް ހިނގާ ވައިގެ ސަރަހައްދުތައް ބަންދުކޮށްފައެވެ. އަދި އެ ގައުމުތަކުގެ ރައްޔިތުން ފިޔަވައި، އެހެނިހެން ގައުމުތަކުން އަންނަ މީހުން އެތެރެވުން މަނާކޮށްފައެވެ.

ޔޫއެންޑަބްލިޔުޓީއޯގެ އެންމެ ފަހުގެ އަންދާޒާތަކުން ދައްކާގޮތުން، މިދިޔަ އަހަރާ އަޅާކިޔާއިރު ފަތުރުވެރިކަމުގެ ސިނާއަތުން ލިބޭ އާމްދަނީ 300-450 ބިލިއަން ޑޮލަރާ ދޭތެރޭގެ އަދަދަކަށް ދަށަށް ދާނެއެވެ. 2019 ވަނަ އަހަރު ފަތުރުވެރިކަމުގެ ސިނާއަތަށް ޖުމްލަ ޖުމްލަ 1.5 ޓްރިލިއަން ޑޮލަރުގެ އާމްދަނީ ލިބިފައިވެއެވެ.

މިހާރުގެ ހާލަތާއި ގުޅިގެން ވޭތުވެ ދިޔަ ހަތް އަހަރުގެ ތެރޭގައި ފަތުރުވެރިކަމުގެ ސިނާއަތުން ހޯދާފައިވާ ކުރިއެރުން ގެއްލިގެން ހިނގައިދާނެ ކަމަށް މާހިރުން ބުނެއެވެ. ދުނިޔެއަށް ކުރިމަތިވީ އިގްތިސާދީ ހީނަރުކަމަށް ފަހު ވެސް ފަތުރުވެރިންގެ ގޮތުގައި ގައުމުތަކަށް ޒިޔާރަތްކުރާ މީހުންގެ އަދަދު ދަށަށް ގޮސްފައިވަނީ އެންމެ 4 އިންސައްތައަށެވެ.

ބަދަލުވަމުން އަންނަ ހާލަތާއި ގުޅިގެން، މިހާރަށް ވުރެ ވެސް ހާލަތު ގޯސްވެދާނެ ކަމަށް ޔޫއެންޑަބްލިޔުޓީއޯ އިން ވަނީ އަންދާޒާކޮށްފައެވެ. އަދި މި ވަބާއިން ސަލާމަތްވުމުގެ ކޮޅުމަތި އަދި ފެންނަން ނެތްއިރު، ހުރިހާ ގައުމުތަކަކުން ވެސް، ހާއްސަކޮށް ފަތުރުވެރިކަމުގެ ސިނާއަތުން ބޮޑު އާމްދަނީއެއް ލިބޭ ގައުމުތަކުން މިކަމަށް ސަމާލުވެތިބުމަށް އެ ޖަމިއްޔާއިން ވަނީ ގޮވާލާފައެވެ.

އެގޮތުން، މި ހާލަތުން އަރައިގަތުމަށް އެއް ގައުމު އަނެއް ގައުމުގެ އެހީތެރިކަން މުހިންމު ކަމަށާއި، ގުޅިގެން މަސައްކަތްކުރުމަށް ޔޫއެންޑަބްލިޔުޓީއޯގެ ސެކެޓްރީ-ޖެނެރަލް ޒުރާބް ޕޮލޮލިކާޝްވިލީ ގޮވާލެއްވިއެވެ. މިލިއަނެއްހާ މުވައްޒަފުންގެ ވަޒީފާތައް ގެއްލިގެން ހިނގައިދާނެ ކަމުގެ ބިރުހީވެފައިވާއިރު، މި ހާލަތުން އަރައިގަނެވޭނީ ގުޅިގެން ކުރާ މަސައްކަތުންކަން ފާހަގަކުރެއްވިއެވެ.