ސައުދީއަަރަބިއްޔާގެ ޖިއްދާ ލޮކްޑައުންކޮށްފި

ސައުދީއަރަބިއްޔާގެ ޖިއްދާ ސިޓީ ލޮކްޑައުންކޮށްފިއެވެ.

ސައުދީއަރަބިއްޔާގެ ދާޚިލީ ވުޒާރާއާއި ޙަވާލާދީ އެޤައުމުގެ ދައުލަތުގެ މީޑިއާއިން ޚަބަރުފަތުރާގޮތުގައި، އިއްޔެ ޖިއްދާގައި "ލޮކްޑައުން"ގެ ޙާލަތު އިޢުލާނުކޮށްފައިވާކަމަށެވެ. ޖިއްދާއަށް ސައުދީ އަރައްބިއްޔާގެ އެހެނިހެން ސިޓީތަކުގެ ފަރުދުން އަރާފޭބުން މަނާކުރުން އިޢުލާނުކުރުމާއެކުވެސް، ކުރިން އަމަލުކުރަމުން އައި ކަރފިއުގެ އަމުރުވެސް ހިނގާނެކަމަށް އެމިނިސްޓްރީން ބުނެފައިވެއެވެ. ކަރފިއުގެ އަމުރު ކުރިން ފަށަނީ ރޭނގަނޑި 07:00 އިން ނަމަވެސް "ލޮކްޑައުން" އިޢުލާނުރުމާއެކު ކަރިފިއުގެ ގަނޑިވަނީ ހަވީރު 04:00 އަށް ބަދަލުކޮށްފައެވެ.

ސައުދީ އަރަބިއްޔާގައި ނޮވެލް ކޮރޯނާވައިރަސް ( ކޮވިޑް-19) ފެތުރުން ހުއްޓުވުމަށް އެޤައުމުގެ ރަސްކަމުގެ ދަރުބާރުން އަޅުއްވަމުންގެންދަވާ ފިޔަވަޅުތަކުގެ ތެރެއިން މީގެ ކުރިން ރަސްގެފާނު ސަލްމާނު އަބްދުލް އަޒީޒުވަނީ، ވެރިރަށް ރިޔާދާއި، މައްކާއާއި، މަދީނާއަށް އަރާ ފޭބުން މަނާކޮށްފައެވެ. އަދި މީގެ އިތުރުންވެސް ސައުދީ އަރަބިއްޔާގެ 13 ޞަރަޙައްދެއް، އެއް ޞަރަޙައްދުން އަނެއް ޞަރަޙައްދަށް ދަތުރު ނުކުރުމަށްވެސް ސަލްމާނު ރަސްގެފާނު ވަނީ ރަސްކަމުގެ ޚާއްޞަ އަމުރެއް ނެރުއްވާފައެވެ.

ރަސްކަމުގެ ދަރުބާރުން ކުރިން އަމަލުކުރަމުން އައި ކަރފިއުގެ އަމުރުގވެސް އިއްޔެވަނީ މުރާޖައާކުރައްވާފައެވެ. އެގޮތުން އެޤައުމުގެ ހުރިހައި ސިޓީއެއްގައި އިއްޔެއިން ފެށިގެން ހަވީރު 03:00 ގެ ފަހުން ތަންފީޒުކުރަމުންދާނީ ރަސްގެފާނުގެ ކާރފިއުގެ އަމުރެވެ. ކަރފިއުގެ އަމުރުގެ ދަށުން، ސަލާމަތީ ބާރުތަކާއި، އަސްކަރީންނާއި މީޑިއާ ފިޔަވައި އެއްވެސް ފަރާތަކައް އާންމު ތަންތަނުގައި އެއްވެ ނުވަތަ ހެލެިފެލިވެ ނޫޅެވޭނެއެވެ. އެގޮތުން ޕާކުތަކާއި، ރެސްޓޯރެންޓް، ކެފޭ، ސިނަމާތައް ބަންދުވާނެއެވެ. އެހެންނަމަވެސް، ކެފޭ ސިނަމާތަކުން ފްރީޑެލިވަރީއާއި ޓޭކްއެވޭގެ ޚިދުމަތް ދިނުން ހުއްޓައެއް ނުލައެވެ. ސައުދީ ސަރުކާރުން މިހާރުވަނީ ސަރުކާރާއި، އަމިއްލަ ކުންފުނިތަކުގައި މަސައްކަތްކުރުންވެސް ހުއްޓުމަކަށްގެނެސް، އާންމު ޚިދުމަތްތައްވެސް ހުއްޓާލާފައެވެ. މީގެއިން ޞިއްޙީ ފަރުވާއާއި، ސަލާމަތީ ބާރުތަކާއި، އަސްކަރީ ޚިދުމަތްތައް އިސްތިޘްނާވެއެވެ.