ކޮވިޑް-19: ބަންގްލަދޭޝުން އަޅާފައިވާ އިތުރު ފިޔަވަޅުތަކާއެކު ދިވެހިން ސަމާލުވާން އަންގައިފި
މިވަގުތު ބަންގްލަދޭޝްގައި ތިބި ބިދޭސީންނަށް ލިބިފައިވާ ވިސާ 2 މަސްދުވަހުގެ މުއްދަތަކަށް އިތުރުކުރުމުގެ އިޚްތިޔާރު އެފަރާތްތަކަށް ދީފައިވޭ
ބަންގުލަދޭޝްގެ ހަޒްރަތު ޝާހު ޖަލާލް އިންޓަރނޭޝަނަލް އެއަރޕޯޓް
ކޮވިޑް-19 އާއި ގުޅިގެން ބަންގުލަދޭޝްގައި އިތުރު ފިޔަވަޅުތައް އަޅާފައިވާތީ އެގައުމަށް ދަތުރުކުރާ އަދި ބަންގްލަދޭޝްގައި ދިރިއުޅޭ ދިވެހިން ސަމާލުވުމަށް އަނެއްކާ ވެސް ފޮރިން މިނިސްޓްރީން އިލްތިމާސްކޮށްފިއެވެ.
ފޮރިން މިނިސްޓްރީން ބުނީ ބަންގުލަދޭޝްގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، ހަ ފިޔަވަޅުތައް އެޅުމަށް އެގައުމުން ނިންމާފައިވާ ކަމަށެވެ.
އެގޮތުން 22 މާރޗް (މިރޭ) ގެ 00:00 އިން 31 މާރޗްއަށް ބަހްރެއިން، އިންޑިއާ، ކުވައިތު، ޤަތަރު، ސައުދީ އަރަބިއްޔާ، ސިންގަޕޫރު، ތުރުކީ އަދި ޔުނައިޓެޑް އަރަބް އެމިރޭޓްސްއިން ފަސިންޖަރުން ގޮވައިގެން ދަތުރުކުރާ ބައިނަލްއަޤްވާމީ ކޮމާޝަލް އެއާލައިންތަކުގެ ދަތުރުތައް މެދުކަނޑާލާފައިވާ ކަމަށެވެ.
އަދި އެ ގައުމަށް ވަނުމަށް ދޫކުރާ އޮން-އެރައިވަލް ވިސާ ވަގުތީ ގޮތުން މެދުކަނޑާލާފައިވާ އިރު މި މަހުގެ 1 އިން ފެށިގެން އިރާން އަދި ޔޫރަޕިއަން ޔޫނިއަންގެ ޤައުމުތަކަށް ޒިޔާރަތްކޮށްފައިވާ ނުވަތަ ދިރިއުޅެފައިވާ ހުރިހާ ފަސިންޖަރުން ބަންގްލަދޭޝްއަށް ވަނުން ވަގުތީ ގޮތުން މަނާކޮށްފައިވާ ކަމަށެވެ.
އަދި މިއާއެކު ބަންގްލަދޭޝްއަށް ވަންނައިރު، ނުވަތަ ވިސާ ހޯދަން ހުށަހަޅާއިރު، ކޯވިޑް-19 ގެ އަލާމާތްތައް ނެތްކަން ކަށަވަރުކޮށްދޭ، 3 ދުވަސް ހަމަނުވާ ހެލްތު ސެޓްފިކެޓެއް ހުށަހެޅުމާއި، ބަންގްލަދޭޝްއަށް ވަނުމަށްފަހު، ވައިގެ ބަނދަރުގައި މިހާރު ހަރަކާތްތެރިވަމުންދާ ޑޮކްޓަރުންގެ އިރުޝާދުގެ ދަށުން، 14 ދުވަހުގެ މުއްދަތަކަށް އެޤައުމުގެ ސަރުކާރުން ކަނޑައަޅާ ތަނެއްގައި ނުވަތަ ގޭގައި ކަރަންޓީން ކުރުން ހިމެނެއެވެ.
މީގެ އިތުރުން މިވަގުތު ބަންގްލަދޭޝްގައި ތިބި ބިދޭސީންނަށް ލިބިފައިވާ ވިސާ 2 މަސްދުވަހުގެ މުއްދަތަކަށް އިތުރުކުރުމުގެ އިޚްތިޔާރު އެފަރާތްތަކަށް ދީފައިވާ ކަމަށް ފޮރިން މިނިސްޓްރީން ބުނެއެވެ.
ފޮރިން މިނިސްޓްރީން ބުނީ މި ދުވަސްތަކުގައި ބަންގްލަދޭޝަށް ދަތުރުކުރަން ގަސްދުކުރާ އަދި ބަންގްލަދޭޝްގައި މިވަގުތު ތިބި ދިވެހިން މިކަމަށް ސަމާލުވުމަށް އެދޭ ކަމަށެވެ. އަދި މި ފިޔަވަޅުތަކަށް ބަދަލުއައުން އެކަށީގެންވުމާއެކު، ދަތުރުކުރުމުގެ ކުރިން މައުލޫމާތު ސާފުކުރުމަށްވެސް އެދިފައިވެއެވެ.
ފޮރިން މިނިސްޓްރީން ވަނީ މި ދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ނުކުރުމަށް ވެސް އިލްތިމާސްކޮށްފައެވެ. އަދި ބަންގްލަދޭޝްގައި މި ވަގުތު ދިރިއުޅެމުންދާ ދިވެހި ރައްޔިތުން އެޤައުމުގެ ސަރުކާރުގެ ނިންމުންތަކާއި އެންގުންތަކަށް ސަމާލުވުމަށްވެސް ފޮރިން މިނިސްޓްރީން ވަނީ އިލްތިމާސްކޮށްފައެވެ.
ފޮރިން މިނިސްޓްރީން ބުނީ ރާއްޖެއިން ބޭރަށް ދަތުރުކުރާ ދިވެހި ރައްޔިތުންނާއި ރާއްޖެއިން ބޭރުގައި ދިރިއުޅޭ ދިވެހި ރައްޔިތުން، މިނިސްޓްރީގައި ނުވަތަ އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށް އިލްތިމާސްކުރާ ކަމަށެވެ. އެގޮތުން، ބަންގްލަދޭޝަށް ދަތުރުކުރާ، އަދި އެ ޤައުމުގައި ދިރިއުޅޭ ދިވެހި ރައްޔިތުން ބަންގްލަދޭޝްގައި ހުންނަ ދިވެހިރާއްޖޭގެ ހައި ކޮމިޝަންގައި ރެޖިސްޓަރ ކުރުމަށް އެދިފައިވެއެވެ.
މީގެ އިތުރުން، ވައިގެ މަގުން ރާއްޖެ އަންނަ ފަރާތްތަކުގެ ތެރެއިން، ރިޒޯޓުތަކަށް އަންނަ ފަތުރުވެރިން ފިޔަވައި އެހެން ހުރިހާ ފަރާތްތަކެއް (ދިވެހިން އަދި އެކި ވިސާތަކުގައި ރާއްޖެ އެތެރެވާ ހުރިހާ ފަރާތްތަކެއް ހިމެނޭ ގޮތަށް) ސަރުކާރުން ކަނޑައަޅާ ތަނެއްގައި 14 ދުވަހުގެ މުއްދަތަށް ކަރަންޓީން ކުރަން ވަނީ ނިންމާފައެވެ. އެގޮތުން، ރާއްޖެއަށް ދަތުރުކުރުމުގެ ކުރިން، ދަތުރުކުރާ ފަރާތްތަކުގެ ޕާސްޕޯޓް ނަމްބަރާއި ދަތުރު ކުރާ ފްލައިޓްގެ ތަފްސީލް ދުރާލާ މިނިސްޓްރީއަށް ނުވަތަ އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަނަކަށް ހިއްސާ ކުރުމަށްވެސް އެދިފައިވެއެވެ.
