ދުނިޔޭގައި ހަލުވިކަމާއިއެކު މިހާރު ފެތުރެމުންދާ ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާ އާސެނަލްގެ ކޯޗު މިކޭލް އާޓެޓާގެ ބަލިހާލު އަންނަނީ ރަނގަޅުވަމުން ކަމަށް އާސެނަލުން ބުނެފިއެވެ.

އާސެނަލުން ނެރުނު ބަޔާނުގައި ބުނެފައިވަނީ އާޓެޓާގެ ހާލު ވަރަށް ބޮޑުތަން ރަނގަޅު ކަމަށާއި، އާޓެޓާ އަންނަނީ ބަރާބަރަށް ކްލަބުގެ ކުޅުންތެރިންނާއި ކޯޗިން ސްޓާފުން އަދި އިސްވެރިންނާއި ގުޅައިގެން ކްލަބުގެ ކަންތައްތައް ކުރިއަށްގެންދާނެ ގޮތުގެ މަޝްވަރާތައް ކުރަމުން ކަމަށެވެ.

އުމުރުން 37 އަހަރުގެ އާޓެޓާ ކޮރޯނާވައިރަސް (ކޮވިޑް-19) އަށް ޕޮޒިޓިވްވީ މި މަހުގެ 13 ވަނަ ދުވަހުއެވެ. ބެލެވޭ ގޮތުގައި އާޓެޓާއަށް ކޮރޯނާވައިރަސް (ކޮވިޑް-19) ޖެހުނީ މީގެ ތިން ހަފްތާ ކުރިން ޔޫރޮޕާ ލީގުގައި ގްރީސްގެ އޮލިމްޕިއާކޯސްއާ ބައްދަލުކުރި މެޗުގެ ތެރެއިންނެވެ. އޭރު އޮލިމްޕިއާކޯސްގެ ވެރިޔާ އެވަންޖެލޯސް މަރިނާކިސް ގައިން މިބަލީގެ އަލާމަތް ފެންނަން ފަށާފައިވާއިރު އޭނާ ވަނީ މިބައްޔަށް ޕޮޒިޓިވްވެފައެވެ. ރިޕޯޓުތައް ބުނާގޮތުން އާސެނަލްގެ ކުޅުންތެރިންނާއި ކޯޗުންނާއި އަދި އޮފިޝަލުން ވަނީ އޭނާއާ ބައްދަލުކޮށްފައެވެ.

އިނގިރޭސި މީޑިއާ ރިޕޯޓުތައް ބުނާ ގޮތުން އާޓެޓާގެ ފަރާތުން ކޮރޯނާވައިރަސް (ކޮވިޑް-19) ގެ އަލާމާތެއް މިހާރު ނުފެންނާތީ ހެދި ފުރަތަމަ ޓެސްޓުން ދެއްކީ އޭނާ މިބައްޔަށް ނެގަޓިވް ކަމަށެވެ. އެކަމަކު ޑަބްލިއުއެޗްއޯ އިން ލަފާދޭ މިންގަނޑަށް ފައްތައިގެން ބަލިން ރަނގަޅުވާ މީހުންގެ ކަންތައްތައް ކުރިއަށްގެންދާން އިތުރު ޓެސްޓްތަކެއް ހަދާނެއެވެ.

ކޮރޯނާވައިރަސް (ކޮވިޑް-19) ގެ ސަބަބުން އިނގިރޭސި ޕްރިމިއާ ލީގުގެ މެޗުތައް އޭޕްރީލް 30 ގެ ނިޔަލަށް މެދު ކަނޑާލިއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައްވެސް މިހާރު ވަނީ މެދު ކަނޑާލާފައެވެ. އެގޮތުން ސްޕެނިޝް ލީގާއި، އިޓާލިއަން ލީގާއި، ފްރެންޗް ލީގުގެ އިތުރުން ޖަރުމަން ލީގުގެ މެޗުތައް ވަނީ ފަސްކޮށްފައެވެ. އަދި ޔުއެފާ ޗެމްޕިއަންސް ލީގާއި ޔޫރޮޕާ ލީގުވެސް ވަނީ ފަސްކޮށްފައެވެ.