އިނގިރޭސި ޕްރިމިއާ ލީގުގެ މެޗުތައް އަނެއްކާވެސް ފަސްކޮށްފި

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން އިނގިރޭސި ޕްރިމިއާ ލީގުގެ މެޗުތައް އަނެއްކާވެސް ފަސްކޮށްފި އެވެ.

މީގެ ކުރިން ލީގު މެދު ކަނޑާލާފައި އޮތީ އަންނަ އޭޕްރީލް މަހުގެ ތިންވަނަ ދުވަހުގެ ނިޔަލަށެވެ. އެކަމަކު ބުރާސްފަތި ދުވަހު ކްލަބުތަކާއެކު ބޭއްވި ކުއްލި ބައްދަލުވުމުގައި ވަނީ އޭޕްރީލް 30 ގެ ނިޔަލަށް ލީގުގެ މެޗުތައް މެދުކަނޑާލަން ނިންމާފައެވެ. ޕްރިމިއާ ލީގުގެ އިތުރުން، އިންގްލެންޑުގައި ކުރިއަށްދާ ހުރިހާ ފުޓްބޯޅަ މުބާރާތްތައްވެސް ވަނީ އޭޕްރީލް 30 ގެ ނިޔަލަށް މެދުކަނޑާލާފައެވެ.

މިއަހަރުގެ ހޫނު މޫސުމުގައި ބޭއްވުމަށް ހަމަޖެހިފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް އަންނަ އަހަރަށްފަސްކުރުމާއި ގުޅިގެން، މެދު ކަނޑާލާފައިވާ ލީގުގެ މެޗުތައް ފަހުން ކުޅުމުގެ ފުރުސަތު ލިބިގެންދާނެއެވެ. އެހެންކަމުން ބުރާސްފަތި ދުވަހު ބޭއްވި ބައްދަލުވުމުގައި އިނގިރޭސި އެފްއޭ އިން ވަނީ ލީގުގެ މެޗުތައް އޭޕްރީލް މަހަށްފަހު ކުރިއަށް ގެންދަން ނިންމާފައެވެ.

އިނގިރޭސި ޕްރިމިއާ ލީގުގެ މެޗުތައް އޭޕްރީލް 30 ގެ ނިޔަލަށް މެދު ކަނޑާލިއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައްވެސް މިހާރު ވަނީ މެދު ކަނޑާލާފައެވެ. އެގޮތުން ސްޕެނިޝް ލީގާއި، އިޓާލިއަން ލީގާއި، ފްރެންޗް ލީގުގެ އިތުރުން ޖަރުމަން ލީގުގެ މެޗުތައް ވަނީ ފަސްކޮށްފައެވެ. އަދި ޔުއެފާ ޗެމްޕިއަންސް ލީގާއި ޔޫރޮޕާ ލީގުވެސް ވަނީ ފަސްކޮށްފައެވެ.

އިންގްލެންޑުން މިހާތަނަށް ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވަނީ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ފޯވާޑް ކަލުމް ހަޑްސަން-އޮޑޯއި އެވެ. އިނގިރޭސިވިލާތުގެ 2،626 މީހުންނަށް މިހާތަނަށް މި ވައިރަސް ޖެހިފައިވާއިރު، މި ވައިރަސް ޖެހިގެން އިނގިރޭސިވިލާތުން 108 މީހުން ވަނީ މަރުވެފައެވެ.