އަންނަ އޭޕްރީލް މަހު ބޭއްވުމަށް ނިންމާފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބުގެ ވޯޓުލުން ފަސްކުރުމާ ގުޅޭގޮތުން އަދި ކައުންސިލްތައް ޤާނޫނީ ހުސްކަމަކަށް އަންނާނެތީ، ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލަ އިލެކްޝަންސް ކޮމިޝަނުން (އީސީ) އަނބުރާ ނަގައިފި އެވެ.

އިލެކްޝަންސް ކޮމިޝަނުން ބުނީ އިންތިޚާބު ބާއްވާ ތާރީޚު ފަސްކުރުމަށްޓަކައި، ރައްޔިތުންގެ މަޖިލީހުން ޙައްލެއް ހޯއްދެވިދާނެ ކަމަށް މަޖިލީހުގެ މިނިވަން މުއައްސަސާތަކާބެހޭ ކޮމެޓީން ބުނެފައިވާތީ، ސުޕްރީމް ކޯޓަށް ހުށަހަޅާފައިވާ މައްސަލަ އަނބުރާ ގެނެސްފައިވާ ކަމަށެވެ.

ކުރިޔަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ވޯޓުލުން މުއްދަތެއް ނެތްގޮތަށް ފަސްކުރުމުގެ އަމުރަކަށް އެދި އިލެކްޝަންސް ކޮމިޝަނުން މީގެކުރިން ވަނީ ހައިކޯޓަށް ހުށަހަޅާފަ އެވެ. ނަމަވެސް މައްސަލަ އަނބުރާ ނެގުމަށްފަހު، ސުޕްރީމް ކޯޓަށް ހުށަހަޅަން ނިންމައި ވަކި މުއްދަތެއް ނެތްގޮތަށް އިންތިޚާބު ފަސްކުރާނަމަ، މިހާރު ތިބި ކައުންސިލަރުންގެ ދައުރު ހަމަވެ، ކައުންސިލްތައް ޤާނޫނީ ހުސްކަމަކަށް ދާނެތީ، އެވެ.

އެހެންކަމުން އިލެކްޝަންސް ކޮމިޝަނުން ފަހުން ވަނީ ހައިކޯޓަށް ހުށަހެޅި މައްސަލަ އަނބުރާ ނެގުމަށްފަހު، އަންގާރަ ދުވަހު ދުސްތޫރީ މައްސަލައެއްގެ ގޮތުގައި ސުޕްރީމް ކޯޓަށް ހުށަހަޅާފަ އެވެ.

ސުޕްރީމް ކޯޓަށް އެ މައްސަލަ ހުށަހެޅުމާއެކު، ރައްޔިތުންގެ މަޖިލީހުގެ ބައެއް މެންބަރުންނާއި މިނިވަން މުއައްސަސާތަކާބެހޭ ކޮމެޓީން ވިދާޅުވެފައިވަނީ ޤާނޫނު އިޞްލާޙު ކުރުމަކީ ރައްޔިތުންގެ މަޖިލީހުގެ ކަމެއް ކަމަށްވާތީ، އެކަމަށް ޙައްލެއް ގެނެވިދާނެ ކަމަށެވެ.

އެގޮތުން މިނިވަން މުއައްސަސާތަކާބެހޭ ކޮމެޓީން އަންގާރަ ދުވަހުގެ ރޭ ވަނީ އިލެކްޝަންސް ކޮމިޝަނުގެ މެންބަރުންނާ ބައްދަލު ކުރައްވާ މަޝްވަރާ ކުރައްވާފަ އެވެ.

އަންގާރަ ދުވަހުގެ ރޭ ބޭއްވި ކޮމިޓީ ބައްދަލުވުމުގައި މަޝްވަރާ ކުރެއްވުމަށްފަހު ދެ ފަރާތުން އެއްބަސްވެފައިވަނީ އިންތިޚާބުގެ ވޯޓުލުން ފަސްކުރުމުގައި ޢަމަލު ކުރުމުގައި އީސީން ބޭނުންވާ ކަންކަން ހިމަނައި ބިލުގެ ޑްރާފްޓެއް ބުދަ ދުވަހު ކޮމިޓީއަށް ހުށަހެޅުމަށެވެ. އަދި އީސީން ވަނީ ބުދަ ދުވަހުގެ ހެނދުނުގެ ވަގުތެއްގައި ޑްރާފްޓެއް އެކުލަވާލާ ކޮމިޓީއަށް ފޮނުވާނެކަމަށް ބުނެފައެވެ.

އީސީން ފޮނުވާ ޑްރާފްޓް ލިބުމުން ދައުލަތުގެ ބަންޑާރަ ނައިބުއާއެކު އެކަމާ ގުޅޭ މަޝްވަރާތައްކޮށް ޤާނޫނު ބައްޓަން ކުރުމަށް ވަނީ ކޮމެޓީން ވަނީ ނިންމާފައެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ރާއްޖެއިން ވެސް ވަނީ ފެނިފަ އެވެ. ކޮވިޑް-19 އާ ގުޅިގެން ސަރުކާރުންނާއި ކަމާބެހޭ ފަރާތްތަކުން ދަނީ އެވައިރަހުން ރައްކާތެރިވުމަށް ގިނަ ފިޔަވަޅުތަކެއް އަޅަމުން ނެވެ. އެގޮތުން މީގެކުރިން އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ރައީސް އަހުމަދު ޝަރީފް ވިދާޅުވެފައިވަނީ މި ވަގުތު ޙާލަތަށް ރިޢާޔަތްކޮށް އިންތިޚާބުގެ ވޯޓުލުން ކުރިން ކަނޑައަޅާފައިވާ ތާރީޚުގައި ކުރިއަށް ގެންދިއުމަކީ ވާނެ ކަމެއް ނޫން ކަމަށެވެ.

ލޯކަލް ކައުންސިލް އިންތިޚާބު އެންމެ ފުރަތަމަ ބާއްވަން ހަމަޖެހިފައި އޮތް ތާރީޚަކީ އެޕްރިލް މަހުގެ 4 އެވެ. ނަމަވެސް، ފަހުން އިލެކްޝަންސް ކޮމިޝަނުން ވަނީ އިންތިޚާބު ބާއްވާ ތާރީޚު އެޕްރިލް 18 އަށް ބަދަލުކޮށްފައެވެ.