ގާޒީ އާދަމް އާރިފްގެ ސްލޫކީ މައްސަލަ ބަލަން ތަހުގީގު ކޮމެޓީއެއް އެކުލަވާލައިފި
12 މާރިޗު 2020 | ބުރާސްފަތި 17:29އާދަމް އާރިފަކީ ކުރިން ކްރިމިނަލް ކޯޓުގެ އިސްގާޒީކަން ކުރެއްވި ގާޒީއެއް
ޑްރަގް ކޯޓުގެ ގާޒީ އާދަމް އާރިފް | ސަން އޮންލައިން
ޑްރަގް ކޯޓުގެ ގާޒީ އާދަމް އާރިފްގެ ސްލޫކީ މައްސަލައެއް ބަލަން ތަހުގީގު ކޮމެޓީއެއް އެކުލަވާލައިފި އެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) ބުރާސްފަތި ދުވަހު ބުނީ، އެމިޝަނުން ބުރާސްފަތި ދުވަހު ބޭއްވި ބައްދަލުވުމަށް ހުށަހެޅުނު މައްސަލަތަކުގެ ތެރެއިން، އާދަމް އާރިފްގެ ސްލޫކީ މައްސަލައެއް ބެލުމަށް ތަހުގީގު ކޮމެޓީއެއް އެކުލަވާލާފައިވާ ކަމަށެވެ.
އާދަމް އާރިފަކީ، ކްރިމިނަލް ކޯޓުގެ ކުރީގެ އިސްގާޒީ ކަން ކުރައްވާފައިވާ، އަދި ރައީސް އަބްދުﷲ ޔާމީންގެ ވެރިކަމުގައި، ނުފޫޒުން ބައެއް ބައެއް އަމުރުތައް ނެރެފައިވާކަމަށް ބަޔާން ދީފައިވާ ގާޒީ އެކެވެ. އެގޮތުން، ކްރިމިނަލް ކޯޓުގެ އިސް ގާޒީ އާދަމް އާރިފް އެ ކޯޓުން ނެރުނު ބައެއް އަމުރުތައް ނެރެފައިވަނީ ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދުގެ އެންގުމަށް ކަމަށް އާދަމް އާރިފް ދީފައިވާ (ލީކުވި) ބަޔާނުގައި ވެއެވެ.
ލީކުވި ބަޔާނަކީ ރައީސް ޔާމީންގެ ވެރިކަމުގައި 2018 ވަނަ އަހަރުގެ ފެބްރުއަރީ މަހުގެ ފުރަތަމަ ދުވަހުގެ ރޭ ސުޕްރީމް ކޯޓުން ނެރުނު އަމުރުތަކާއި ގުޅިގެން ހައްޔަރުކޮށްފައިވާ ފަރާތްތަކާއި ދެކޮޅަށް، ފުލުހުންގެ ތަހުގީގަށް ކްރިމިނަލް ކޯޓުގެ އިސް ގާޒީގެ މަގާމުގައި ހުންނެވިއިރު އާދަމް އާރިފް ދީފައިވާ ބަޔާނެކެވެ.
ގާޒީ އާދަމް އާރިފް ކްރިމިނަލް ކޯޓުގެ އިސްގާޒީކަމުގެ މަގާމުގައި ހުންނަވައި ޖުމްހޫރީ ޕާޓީގެ ލީޑަރު ގާސިމް އިބްރާހީމް ޖަލަށްލުމަށް ކުރި ހުކުމާއި ރާއްޖެޓީވީގެ ކުރީގެ ސީއޯއޯ އަދި މިހާރު އިންފޮމޭޝަން ކޮމިޝަނަރުގެ މަގާމުގައި ހުންނެވި ހުސައިން ފިޔާޒު މޫސާގެ މައްޗަށް ކުރި ހުކުމް ފާހަގަކޮށްލެ ވެއެވެ.
ގާޒީ އާރިފާމެދު ސްލޫކީ ގިނަ މައްސަލަަކެއް މީގެކުރިންވެސް ވަނީ ފެންމަތި ވެފައެވެ. އެގޮތުން، ރިސޯޓެއްގައި ޕޫލަކަށް އެރި އުޅުނު ކުޑަކުއްޖަކު މަރުވި މައްސަލައި ދައުވާކޮށް ޝަރީއަތް ފެށިފަހުން ފިލައިގެން ދިޔަ ފްރާންސް އަންހެން ކުއްޖެއް ވެސް ގާޒީ އާދަމް އާރިފްގެ މައްޗަށް ތުހުމަތުތަކެއް ކޮށްފައި ވެއެވެ.
އާދަމް އާރިފްގެ ބަދަލުގައި ދެން ކްރިމިނަލް ކޯޓުގެ އިސްގާޒީ ކަމުގެ މަގާމަށް އައްޔަން ކުރެއްވީ ގާޒީ އަހުމަދު ހައިލަމް އެވެ. ހައިލަމްގެ ސްލޫކީ މައްސަލަތަކެއް ފެންމަތިވެ، އޭނާ ގާޒީ ކަމުގެ މަގާމުން ވަކިކުރަން ނިންމާ، ރައްޔިތުންގެ މަޖިލީހަށް ހުށަހެޅިފަހުން ހައިލަމް ވަނީ ގާޒީ ކަމުގެ މަގާމުން އިސްތިއުފާ ދެއްވާފަ އެވެ.
ޖޭއެސްސީން ބުރާސްފަތި ބޭއްވި ބައްދަލުވުމުގައި ގއ. ކޮނޑޭ މެޖިސްޓްރޭޓް ކޯޓަށް ހުށަހެޅުނު މައްސަލައަކާ ގުޅިގެން އެކޯޓުގެ އިސްމެޖިސްޓްރޭޓް މުހައްމަދު އިބްރާހީމް އަމަލުކޮށްފައިވާ ގޮތުން، މެޖިސްޓްރޭޓް މުހައްމަދު އިބްރާހީމްގެ ސުލޫކަށް އަސަރުކުރާފަދަ ކަމެއް ފާހަގަވެފައިވާތީ، އެ މައްސަލަ ބެލުމަށް ވެސް ޖޭއެސްސީން ވަނީ ނިންމާފަ އެވެ.
