ކޮރޯނާވައިރަސް (ކޮވިޑް-19) ރާއްޖެއިން ފެނުމާއިއެކު ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި އެތުލެޓިކްސް އެސޯސިއޭޝަން އޮފް މޯލްޑިވްސްގެ ހަރަކާތްތައް ހުއްޓައިލުމަށް ނިންމައިފިއެވެ.

ރާއްޖެ.އެމްވީ އަށް މައުލޫމާތު ދެއްވަމުން އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް (ޖަވާ) ވިދާޅުވީ އެފްއޭއެމްގެ ހުރިހާ ހަރަކާތްތަކެއް ހުއްޓައިލުމަށް ނިންމައިފައިވާ ކަމަށާއި، އެގޮތުން އެފްއޭއެމްގެ ވައިޑީޕީ ޕްރޮގްރާމްތައް ހުއްޓައިލުމަށް ނިންމައިފައިވާ ކަމަށެވެ. ޖަވާ އިތުރަށް ވިދާޅުވީ އެފްއޭއެމްގެ ހަރަކާތްތައް ހުއްޓައިލި ނަމަވެސް މުބާރާތްތައް ކުރިޔަށްދާނެ ކަމަށެވެ. އަދި މުބާރާތްތަކާއި މެދު އިތުރު ގޮތެއް ނިންމާނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަންގާ ގޮތެއްގެ މަތިން ކަމަށްވެސް ޖަވާ ވިދާޅުވިއެވެ.

ޖަވާ ވިދާޅުވީ ކްލަބް ތަކުން ހިންގާ އެކަޑަމީތައް ހުއްޓައިލުމަށް ކްލަބްތަކަށް ވާނީ ލަފާދީފައި ކަމަށާއި ނަމަވެސް ކްލަބް ތަކުން ހިންގާ އެކަޑަމީތައް ހުއްޓައިލަން ނިންމާނީ އެކްލަބަކުން ކަމަށެވެ.

އެފްއޭއެމްގެ އިތުރުން އެތުލެޓިކްސް އެސޯސިއޭޝަނުން ވެސް ވަނީ ކޮވިޑް-19 ގެ ސަބަބުން ރައްކާތެރިކަމުގެ ފިޔަވަޅު އަޅައިފައެވެ. އެގޮތުން އެ އެސޯސިއޭޝަނުން ވަނީ ހޮނިހިރު ދުވަހުގެރެއިން ފެށިގެން މާލެ އާއި އަތޮޅުތެރޭގައި ހިންގާ އެ އެސޯސިއޭޝަނުގެ ހުރިހާ ހަރަކާތެއް ވަގުތީ ގޮތުން ހުއްޓައިލުމަށް ނިންމައިފައެވެ. އަދި އެ އެސޯސިއޭޝަންގެ ކްލަބް ތަކުން މިގޮތަށް އަމަލުކުރުމަށްވެސް އެ އެސޯސިއޭޝަނުންވަނީ މިހާރު ކްލަބްތަކަށް އަންގައިފައެވެ. މީގެ އިތުރުން އެތުލެޓިކްސް އެސޯސިއޭޝަނުންވަނީ އެ އެސޯސިއޭޝަން މެދުވެރިކޮށް އެތުލީޓުން ރާއްޖެއިން ބޭރަށް ޓްރެއިނިންގ އަށް ފޮނުވުމާއި، އޭޕްރީލް 2020 އާއި ހަމައަށް ބައިވެރިވާން ނިންމައިފައިވާ މުބާރާތްތަކުގައި ބައިވެރިނުވާން ނިންމައިފައެވެ.

ކޮވިޑް-19 ރާއްޖެއިން މިހާތަނަށް ދެ މީހަކު ޕްޒިޓިވް ވެފައިވާއިރު، އެ ދެ މީހުންނަކީ ކުރެއްދޫ އައިލޭންޑް ރިސޯޓުގައި މަސައްކަތްކުރި ދެ މުވައްޒަފުންނެވެ. އަދި އެ ދެ މީހުން ވައިރަހަށް ޕޮޒިޓިވް ވުމާއިއެކު އެ ރިސޯޓުވަނީ ލޮކްޑައުން ކުރެވިފައެވެ. އަދި މުޅި ރާއްޖެއަށް ޔެލޯ އެލާޓް ނެރެފައިވާއިރު ކުރެއްދޫ އަށް ވަނީ އޮރެންޖް އެލާޓް ނެރެފައެވެ.

ރާއްޖޭގެ އިތުރުން ދުނިޔޭގެ ކުޅިވަރަށް ކޮވިޑް-19 ގެ ސަބަބުން ބޮޑެތި ގެއްލުންތަކެއް އަންނަނީ ވަމުންނެވެ. އެގޮތުން ދުނިޔޭގެ ފުޓުބޯޅައިގައި އެންމެ ބޮޑު ދެ ލީގު ކަމަށްވާ ފްރެންޗް ލީގާއި އިޓާލިއަން ލީގުގެ މެޗުތައް އަންނަނީ ފަސްކުރަމުންނެވެ. މީގެ އިތުރުން ޓޯކިޔޯގައި ބޭއްވުމަށް ހަމަޖެހިފައިވާ އޮލިމްޕިކްސް ގޭމްސް އާއި މެދު ސުވާލު އުފެދިފައިވާއިރު، މި އަހަރު ބާއްވަން ހަމަޖެހިފައިވާ ޔޫރޯ އާއި މެދު ވެސް ވަނީ ސުވާލު އުފެދިފައެވެ.