މި ސީޒަން ނިމުމުން ވިލިއަން ޗެލްސީ ދޫކޮށްލަނީ

މި ސީޒަން ނިމުމުން ޗެލްސީ ދޫކޮށްލަން ބްރެޒިލްގެ ފޯވާޑް ވިލިއަން ނިންމާފައިވާ ކަމަށް ރިޕޯޓުތައް ބުނެފި އެވެ.

ޗެލްސީއާއެކު ވިލިއަން ހަދާފައިވާ އެއްބަސްވުން މި ސީޒަނަށްފަހު ހަމަވާނެ އެވެ. ރިޕޯޓުތައް ބުނާ ގޮތުން ޗެލްސީން ވަނީ ވިލިއަންގެ އެއްބަސްވުން އާކުރަން މަސައްކަތް ކޮށްފައެވެ. އެކަމަކު ވިލިއަން އަށް ކުރު މުއްދަތެއްގެ އެއްބަސްވުމެއް ހުށަހެޅުމުން، އެ އެއްބަސްވުން ގަބޫލުނުކުރަން ވިލިއަން ވަނީ ނިންމާފައެވެ.

އެހެންކަމުން ހޫނު މޫސުމުގެ ޓްރާންސްފާގައި ހިލޭ ޓްރާންސްފާއެއްގެ ދަށުން އޭނާ އެހެން ކްލަބަކަށް ބަދަލުވުން ގާތެވެ. ވިލިއަން ހޯދަން އެންމެ ބޮޑަށް މަސައްކަތް ކުރަމުން އަންނަނީ ޓޮޓެންހަމް ހޮޓްސްޕާސް އާއި ބާސެލޯނާގެ އިތުރުން ޔުވެންޓަސް އިންނެވެ.

ރިޕޯޓުތައް ބުނާ ގޮތުން މި ތިން ކްލަބުގެ ތެރެއިން އޭނާ ބަދަލުވުން އެންމެ ގާތީ ޓޮޓެންހަމަށެވެ.

ބްރެޒިލްގެ ކޮރިންތިއަންސް އިން ކެރިއަރު ފެށި ވިލިއަން ޗެލްސީއަށް ބަދަލުވީ 2013 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 328 މެޗުގައި 58 ލަނޑު ކާމިޔާބު ކޮށްފައެވެ.

ވިލިއަން ވަނީ ޗެލްސީއާއެކު އިނގިރޭސި ޕްރިމިއާ ލީގު ދެފަހަރު، އެފްއޭ ކަޕް އެއް ފަހަރު އަދި ލީގު ކަޕް އެއް ފަހަރު ކާމިޔާބު ކޮށްފައެވެ.