އަންޗެލޮޓީ ޖޫރިމަނާކުރަން އެފްއޭ އިން ނިންމައިފި

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ އެވަޓަން އާއި މެންޗެސްޓާ ޔުނައިޓެޑް ބައްދަލުކުރި މެޗަށް ފަހު އެވަޓަންގެ ކޯޗު ކާލޯ އަންޗެލޮޓީ އަށް ރަތް ކާޑު ދެއްކުމުން، އޭނާ ޖޫރިމަނާކުރަން އިނގިރޭސި އެފްއޭ އިން ނިންމައިފި އެވެ.

އެވަޓަންގެ ދަނޑުގައި ކުޅުނު މި މެޗު 1-1 އިން އެއްވަރުވިއިރު، މެޗު ނިމެން ގާތްވެފައި ވަނިކޮށް އެވަޓަންގެ ކެލްވަޓް-ލެވިން އެވަޓަންއަށް އިތުރު ލަނޑެއް ޖަހައިދިން ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރް) އިން ވަނީ އެ ލަނޑު ބާތިލުކޮށްފައެވެ. އެ ލަނޑު ބާތިލުކުރީ ކެލްވަޓް-ލެވިން ފޮނުވާލި ބޯޅަ، ޔުނައިޓެޑްގެ ޑިފެންޑަރު ހެރީ މެގުއާ ގައިގަ ޖެހިފައި ބައިކޮޅަށް ގޯލަށް ވަންނަމުން ދިޔަ ވަގުތު، އެވަޓަންގެ ގިލްފީ ސިގަޑްސަން އޮފްސައިޑް މަގާމެއްގައި ހުރެ ބޯޅައަށް ހަރަކާތްކުރި ކަމަށް ބުނެ އެވެ.

މެޗަށް ފަހު އަންޗެލޮޓީ ދަނޑަށް އަރައި ރެފްރީންނާ ހިތްހަމަނުޖެހުން ފާޅުކޮށް ވާހަކަ ދައްކަން ފެށުމުން ރެފްރީ ވަނީ އޭނާ އަށް ރަތް ކާޑެއް ދައްކާފައެވެ.

މި މައްސަލައިގައި އިނގިރޭސި އެފްއޭއިން އެންޗެލޮޓީ ޖޫރިމަނާކޮށްފައިވަނީ 8،000 ޕައުންޑުންނެވެ. އަދި ބުރާސްފަތި ދުވަހުގެ ކުރިން ޖޫރިމަނާ ފައިސާ ދައްކައިފިނަމަ، ޗެލްސީއާ ދެކޮޅަށް ކުޅޭ މެޗުގައި އަންޗެލޮޓީ އަށް ބެންޗުގައި ހުރެވޭނެ އެވެ. އެކަމަކު މި މައްސަލަ އިސްތިއުނާފުކޮށް އެކަން ކާމިޔާބުނުވެއްޖެ ނަމަ، ޖޫރިމަނާ ފައިސާ 12،000 ޕައުންޑަށް އިތުރު ކުރުމަށް އެފްއޭއިން ވަނީ ނިންމާފައެވެ.

އެވަޓަން އާއި ޔުނައިޓެޑް ބައްދަލުކުރި މެޗަށްފަހު އަންޗެލޮޓީ ބުނީ އެ ލަނޑު ބަލައިނުގަންނަން ޖެހޭ ސަބަބެއް ނެތް ކަމަށާއި، އެއީ އޮފްސައިޑްގައި ވިޔަސް ސިގަޑްސަން އިށީނދެ އިދުމުން، އޭނަ ކުޅުމަށް ހުރަސް ނާޅާ ކަމަށެވެ.