އިނގިރޭސި އެފްއޭ ކަޕްގެ ފަސްވަނަ ބުރުގައި ތިންވަނަ ޑިވިޝަނުގެ ޕޯޓްސްމައުތު އަތުން މޮޅުވެ އާސެނަލް ކުއާޓާ ފައިނަލަށް ދަތުރުކޮށްފި އެވެ.

ގިނަ ބަދަލުތަކަކާއެކު ކުޅުނު އާސެނަލުން މި މެޗު ކާމިޔާބު ކުރީ 2-0 ގެ ނަތީޖާ އަކުންނެވެ.

ހޯމަ ދުވަހުގެރޭ ކުޅުނު މި މެޗުގައި އާސެނަލުގެ ފުރަތަމަ އެގާރައިން ޖާގަ ލިބުނީ އާންމުކޮށް ކުޅޭ ކުޅުންތެރިންގެ ތެރެއިން ޑޭވިޑް ލުއިސް އަށާ،އި ބަކަޔޯ ސަކާ އަށް އެކަންޔެވެ. ދެން އާސެނަލްގެ ސްކޮޑުގައި ގިނައީ 20 އަހަރުން ދަށުގެ ކުޅުންތެރިންނެވެ. އާސެނަލްގެ ކޯޗު މިކޭލް އާޓެޓާ ބުނީ މިއީ އޭނާ ނެގި ރިސްކެއް ކަމަށެވެ.

މެޗު ފަށައިގެން އާސެނަލުން ވަނީ ޕޯޓްސްމައުތްގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައެވެ. މެޗުގަ އާސެނަލުން ފުރަތަމަ ލަނޑު އެޓީމުން ކާމިޔާބުކުރީ ފުރަތަމަ ހާފުގެ އިތުރު ވަގުތުގައެވެ. މި ލަނޑު އެޓީމަށް ކާމިޔާބު ކޮށްދިނީ ޑިފެންޑަރ ސޮކްރަޓިސް ޕަޕަސްތަތޮފޫލްސް އެވެ.

މެޗުގެ ދެވަނަ ހާފުގެ ވަރަށް ކުރީކޮޅު އާސެނަލުން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އެޑްވަޑް ކެޓިއާއެވެ.

މެޗަށްފަހު ވާހަކަދައްކަމުން އާސެނަލްގެ ކޯޗު އާޓެޓާ ބުނީ ޒުވާން ކުޅުންތެރިންނަށް މި ފުރުސަތު ހައްގު ކަމަށާއި، އެފްއޭ ކަޕްގެ މިހާ ހިސާބުން ޒުވާން ކުޅުންތެރިން ބޭނުން ކުރުމަކީ ރިސްކެއް ނަމަވެސް، ހޯމަ ދުވަހުގެރޭ ކުޅުނު މެޗުން ރިސްކު ނެގުން ހައްގުކަން އެނގިގެން ދިޔައެވެ. އަދި އާޓެޓާ ވަނީ މި މެޗުގައި ޒުވާން ކުޅުންތެރިން ދެއްކި ކުޅުމަށް ތައުރީފު ކޮށްފައެވެ. އާޓެޓާ އިތުރަށް ބުނީ ޕޯޓްސްމައުތުން އާސެނަލްގެ ގޯލަށް ނުރައްކާކުރި ކަމަށާއި ނަމަވެސް އާސެނަލުން މުޅި މެޗުގެ ކޮންޓްރޯލް ނަގާ، ރަނގަޅަށް ކުޅެ ދެ ލަނޑަށްވުރެ އިތުރަށް ލަނޑު ޖަހަން ފުރުސަތު ތަނަވަސް ކުރި ކަމަށެވެ.

އެފްއޭ ކަޕުގައި އަންގާރަ ދުވަހުގެރޭ ކުޅޭނީ ލިވަޕޫލާއި ޗެލްސީ އެވެ. ޗެލްސީގެ ދަނޑުގައި ކުޅޭ މި މެޗު ފަށާނީ ރާއްޖެ ގަނޑިން އަންގާރަ ދުވަހުގެރޭ ދަންވަރު 00:45 ގައެވެ.