13 އަހަރުގެ ކުއްޖާގެ މައްސަލަ: ސިއްރު އަޑުއެހުމުގެ ގޮތުގައި ހައްމާދުގެ މައްޗަށް ކުރެވޭ ދައުވާގެ އަޑުއެހުންތައް ފަށައިފި
ކުށް ސާބިތުވެއްޖެނަމަ މަދުވެގެން 10 އަހަރުގެ ޖަލު ހުކުމެއް އަންނާނެ
ކްރިމިނަލް ކޯޓް
13 އަހަރުގެ ކުޑަ އަންހެން ކުއްޖަކާއި ކޯޓުން ބޭރުގައި ކައިވެނިކުރި މައްސަލާގައި ދަޢުވާ އުފުލާފައިވާ އިސްމާއީލް ހައްމާދުގެ ޝަރީޢަތުގެ އަޑުއެހުންތައް ސިއްރުކޮށްގެން ކްރިމިނަލް ކޯޓުން އެ މައްސަލައިގެ އަޑުއެހުންތައް ފަށައިފިއެވެ.
ރ މަޑުއްވަރީގައި 13 އަހަރުގެ ކުޑަ އަންހެން ކުއްޖަކާއި ކައިވެނިކޮށް، އެކުއްޖާ ރޭޕްކުރި މައްސަލާގައި ހައްމާދުގެ މައްޗަށް އުފުލާފައިވަނީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަސްތުގައި އަތްލުމުގެ ކުށުގެ ދަޢުވާއެވެ. އެގޮތުން މި ދަޢުވާގެ އިބްތިދާޢީ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފައިވާއިރު، ކްރިމިނަލް ކޯޓުން ބުނީ، އެ މައްސަލައަކީ ކުޑަކުއްޖަކާ ގުޅޭ ޖިންސީ މައްސަލައަކަށްވާތީ މައްސަލަ ކުރިއަށްދާނީ ސިއްރުކޮށްގެން ކަމަށެވެ. ޖިންސީ ނިޔަތެއް އޮވެގެން ކުޑަ ކުއްޖެއްގެ ހަށިގަނޑުގައި އަތްލުމުގެ ދަޢުވާ ހައްމާދުގެ މައްޗަށް އުފުލާފައިވީނަމަވެސް އެ މައްސަލައާއި ގުޅުން ހުރި އިތުރު ދަޢުވާތައް އޭނާގެ މައްޗަށް ކުރެވޭނެ ކަމަށް ވަނީ ބެލެވިފައެވެ.
ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްޞަ އުޞޫލުތަކަށް ޢަމަލު ކުރުމުގެ ޤާނޫނުގައި ޖިންސީ ނިޔަތެއް އޮވެގެން ކުޑަ ކުއްޖެއްގެ ހަށިގަނޑުގައި އަތްލުމުގެ ކުށް ހިމެނިފައިވެއެވެ. އެގޮތުން އެ ކުށް ސާބިތުވާ މީހަކަށް 10 އަހަރާއި 14 އަހަރާއި ދެމެދުގެ ޖަލު ޙުކުމެއް އަންނާނެ ކަމަށް ޤާނޫނުގައި ބުނެފައިވެއެވެ.
ރ މަޑުއްވަރީގައި އުމުރުން 13 އަހަރުގެ ކުއްޖަކާއި ޤަވާއިދާ ޚިލާފަށް ކައިވެނި ކޮށްގެން އުޅޭކަމަށް އަޑު ފެތުރިފައިވަނީ ލަނޑާ ނެގުމުގެ މަސައްކަތްކުރާ ދޯނީގައި ހައްމާދު އުޅެނިކޮށް އޭނާއަށް އަނިޔާކޮށް ކަނޑަށް އެއްލާލި މައްސަލަ ފެންމަތިވުމާއި އެކުއެވެ.
ހައްމާދު، އެ ކުއްޖާއާއި ކައިވެނިކޮށްފައިވަނީ ކޯޓުން ބޭރުގައެވެ. އެކުއްޖާ ވިހެއި ދަރިފުޅަކީ އޭނާގެ ދަރިއެއްކަން ޑީއެންއޭއިން ވަނީ ކަށަވަރުވެފައެވެ.
