ހޮނިހިރު ދުވަހުގެ ރޭ މާލޭގައި ހިނގި އަލިފާނުގެ ޙާދިސާގައި ޙާލުގައި ޖެހުނު ޢާއިލާއަށް ވަގުތުން އެހީތެރިކަން ފޯރުކޮށްދީފައިވާނެ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނެފިއެވެ.
ގ. ޕްރީޒައިޑް ގޭގެ ފުރަތަމަ ފަންގިފިލާގައި އަލިފާނުގެ ޙާދިސާއެއް ހިނގާފައިވާއިރު، އެމްއެންޑީއެފުން ބުނީ، އަލިފާން ރޯވެފައިވަނީ ރޫމް ކަރަންޓު ޑީ ބޯޑްގައި ކަމަށާއި، އަލިފާނުގެ އަސަރު ދޮންނަ މެޝިނަށްވެސް ކޮށްފައިވާ ކަމަށެވެ. އަދި ބައެއް އަންނައުންވެސް އަނދާފައިވާ ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ވަނީ އެ ގޭގައި ރޯވި އަލިފާންގަނޑު ނިއްވާލާފައެވެ. މަންޒަރު ދުށް މީހަކު ރާއްޖެ.އެމްވީ އަށް ބުނީ، އަލިފާން ރޯވި ގަޑީގައި އެޕާޓްމެންޓުގައި އެއްވެސް މީހަކު ނެތް ކަމަށެވެ.
މި ޙާދިސާގެ ރިޕޯޓު ފުލުހުންނަށް ލިބިފައިވަނީ ހޮނިހިރު ދުވަހުގެރޭ 21:18 ހާއިރުއެވެ.
އެކަމާ ގުޅޭގޮތުން އެންޑީއެމްއޭއިން ކުރި ޓްވީޓެއްގައި ބުނީ، މި ޙާދިސާ އާއި ގުޅިގެން ޙާލުގައި ޖެހުނު ޢާއިލާއަށް ބޭނުންވާ އެހީތެރިކަން ވަގުތުން ފޯރުކޮށްދީފައިވާ ކަމަށެވެ.
