ހިޝާންގެ މައްސަލަ: ޖެންޑަރ މިނިސްްޓްރީން ވެފައިވާ އިހުމާލުގެ މައްސަލަ ރައްޔިތުންގެ މަޖިލީހަށް!
5 ފެބުރުއަރީ 2020 | ބުދަ 05:06މި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް އަޙްމަދު ނަސީމް
ކުރީގެ ޑިސްއެބިލިޓީ އެމްބެސެޑަރު އަހުމަދު ހިޝާން
ކުރީގެ "އޮނަރަރީ ޑިސްއެބިލިޓީ އެމްބެސެޑަރ" އަހުމަދު ހިޝާންގެ މައްސަލައާއި މެދު ޖެންޑަރ މިނިސްޓްރީން އިހުމާލުވެފައިވާ މައްސަލަ ރައްޔިތުންގެ މަޖިލީހަށް ކުއްލި މައްސަލައެއްގެ ގޮތުގައި ހުށަހަޅައިފިއެވެ.
މި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމެވެ. މި މައްސަލަ މަޖިލީހުން ބަލައިގަތީ 41 މެންބަރުންގެ ވޯޓާއި އެކުއެވެ.
ކުއްލި މައްސަލައިގައިވަނީ އޭނާގެ ފަރާތުން ހައިކޯޓުގައި އިސްތިޢުނާފު ކުރުމާއި ގުޅިގެން 3 ފެބްރުވަރީ 2020 ވަނަ ދުވަހު ބޭއްވުނު އެމައްސަލައިގެ ޝަރީޢަތުގެ މަޖިލީހުގައި އޭނާއަށް "އޮނަރަރީ ޑިސްއެބިލިޓީ އެމްބެސެޑަރ" ކަމާއި ޤައުމީ އިނާމު ދިން އިރުވެސް އޭނާއާއި މެދު ޖިންސީ ގޯނާގެ ސީރިއަސް ތުހުމަތުތަކެއް ކުރެވޭކަން ޖެންޑަރ މިނިސްޓްރީއަށް އެނގޭކަން ހާމަވެފައިވާކަމަށެވެ. މި މައްސަލަ ހުށަހެޅުމުގެ ބޭނުމަކީ ޖެންޑަރ މިނިސްޓްރީން މިމައްސަލައިގައި ވެފައިވާ އިހުމާލު ރައްޔިތުންގެ މަޖިލީހުގެ ސަމާލުކަމަށް ގެނައުން ކަމަށް މެންބަރު މީކާއިލް ވިދާޅުވިއެވެ.
މީގެއިތުރުން 4 ފެބްރުވަރީ 2020 ވަނަ ދުވަހު ހައި ކޯޓުގައި ބޭއްވުނު ޝަރީޢަތުގެ މަޖިލިހުގައި ހާމަވެފައިވާ ގޮތުގައި 17 ޖަނަވަރީ 2018 ގައި ފެމިލީ ކޯޓުން މިދެންނެވި މައްސަލައިގައި ޙުކުމްކޮށްފައިވަނީ އަޙްމަދު ހިޝާނާމެދު ސީރިއަސް ތުހުމަތުތަކެއް ކުރެވޭ ކަމަށް ފުލުހުންގެ އިންޓެލިޖެންސުން ދިން މަޢުލޫމާތާއެކު ޖެންޑަރ މިނިސްޓްރީން އެކުލަވާލި ރިޕޯޓަކަށް ރިޢާޔަތްކޮށްފައިވާ ކަމަށް ކުއްލި މައްސަލާގައިވެއެވެ.
އެގޮތުން 19 އަހަރުގެ ޚާއްޞަ އެހީއަށް ބޭނުންވާ ޒުވާނެއްގެ ބެލެނިވެރިކަން އަޙްމަދު ހިޝާނަށް ދެވެން ނެތްކަމަށް ފެމިލީ ކޯޓުން ނިންމީ 2018 ވަނަ އަހަރެވެ. އަދި އެޒުވާނާގެ ބެލެނިވެރިކަން، 2020 ވަނަ އަހަރުގެ ޖަނަވަރީ މަހާއިހަމައަށް ހިޝާނަށް ދެވެން ނެތްކަމަށް ފެމެލީ ކޯޓުން ޙުކުމްކުރި ނަމަވެސް އޭރުން ފެށިގެން މިއަދާއި ހަމައަށްވެސް އެޒުވާނާ އުޅެނީ އަޙްމަދު ހިޝާނާއެކު ކަމަށް ހައިކޯޓަށް މަޢުލޫމާތު ލިބިފައިވާކަންވެސް ވަނީ ހާމަވެފައެވެ. އެގޮތުން ޖެންޑަރ މިނިސްޓްރީން އެކަމާއި އަޅާނުލާ އޮތްކަމީ އެމިނިސްޓްރީގެ އިހުމާލު އިންތިހާއަށް ހާމަވާ ކަމެއް ކަމަށް ކުއްލި މައްސަލައިގައިވެއެވެ.
އެހެންކަމުން ރައްޔިތުންގެ މަޖިލިހުގެ ކަމާއިބެހޭ ކޮމެޓީން މިމައްސަލަ ބަލާ ޚާއްޞަ އެހީއަށް ބޭނުންވާ ޒުވާނާއާއިމެދު އިހުމާލުވީ ވަކިވަކި ފަރާތްތައް ދެނެގަނެ އެފަރާތްތަކާއިމެދު ފިޔަވަޅު އެޅުމަށް މެންބަރު މީކާއިލް ވަނީ ގޮވާލައްވާފައެވެ.
