ސައުދީ އަރަބިއްޔާގައި އަދި ކޮރޯނާވައިރަސް ރެކޯޑުކުރެވިފައެއް ނެތް: ހެލްތު މިނިސްޓަރ

ސައުދީ ސަރުކާރުން މިހާތަނަށް ބެލިބެލުމުން ނޮވެލް ކޮރޯނާވައިރަސް ޖެހިފައިވާ މީހަކު ރެކޯޑުކުރެވިފައިނުވާކަމަށް އެޤައުމުގެ ހެލްތު މިނިސްޓަރ ތައުފީޤް އަލް-ރާބިއާ ވިދާޅުވެއްޖެއެވެ.

ސައުދީ ގެޒެޓަށް ދެއްވި ބަސްދީގަތުމެއްގައި ތައުފީޤް ވިދާޅުވެފައިވަނީ، ޗައިނާއިން ސައުދީއަރަބިއްޔާގެ ވައިގެ ބަނދަރުތަކަށް ޖެއްސި ފްލައިޓުތަކުން އައި ހުރިހައި ފަސިންޖަރުން ސަވައިލެންސް ޕްރޮގުރާމެއްގެ ދަށުން ސްކްރީން ކުރެވުނު ކަމަށެވެ. އެގޮތުން ފާއިތުވެ ދިޔަ 14 ދުވަހުގެ ތެރޭގައި ކުރިޔަށް ގެންދިޔަ ސްކްރީނިންގް ޕްރޮގުރާމުގެތެރެއިން، އެއްވެސް މީހަކު ނޮވެލް ކޮރޯނާވައިރަސްއަށް ޕޮޒިޓިވް ވެފައި ނުވާކަމަށް ތައުފީޤް ވިދާޅުވިއެވެ. ތައުފީޤް ވިދާޅުވީ ޗައިނާއިން ސީދާ އަދި އެޤައުމުގައި ޓްރާންސިޓްކޮށްފައި އަންނަ ފްލައިޓްތަކުން ސައުދީއަށް އެތެރެވާ ފަސިންޖަރުން ސްކްރީން ކުރުމަށްފަހު، ޑޮކްޓަރެއްގެ އިރުޝާދުގެ މަތިން ނޫނީ އެތެރެއަށް ވަނުމުގެ ހުއްދަ ނުދޭކަމަށެވެ.

މި ދުވަސްވަރަކީ ދުނިޔޭގެ އެކި ޤައުމުތަކުްނ އުމުރާގެ އަޅުކަން އަދާކުރުމަށް ސައުދީ ޢަރަބިއްޔާއަާށް ދަތުރުކުރަމުންދާ ދުވަސް ވަރަކަށް ވާތީ ސައުދީ ސަރުކާރުން ދަނީ ސަލާމަތާއި ރައްކާތެރިކަމުގެ ފިޔަވަޅުތައް ވަރުގަދަ ކުރަމުންނެވެ. އަދި ސައުދީ ރައްޔިތުންނެކޭ އެއްފަދައިން އުމްރާގެ އަޅުކަން އަދާކުރަން ސައުދީ އަށް މިދުވަސްވަރު ދަތުރުކުރާ ފަރާތްތަކަށްވެސް ފަސޭހައިން މާސްކާއި ބޭސް ލިބޭނެ ފަދަ އިންތިޒާމު ސައުދީ ސަރުކާރުން ވަނީ ހަމަޖައްސާފައެވެ. އަދި ސައުދީން ވަނީ އެޤައުމުގެ ރައްޔިތުން އެއްވެސް ބޭނުމެއްގައި ޗައިނާއަށް ދަތުރުނުކުރަން އިލްތިމާސްކޮށްފައެވެ.

ދުނިޔޭގެ 20 ޤައުމަކުން ނޮވެލް ކޮރޯނާވައިރަސްގެ ވައިރަސް މިހާރު ފެނިފައިވާއިރު، މީގެތެރޭގައި ގަލްފްގެ ޤައުމުތައްވެސް ހިމެނެއެވެ. ގިނަ ޤައުމުތަކަކަށް ކޮރޯނާވައިރަސް ފެތުރުމުގެ ބިރު އޮތުމާއެކު،އަދި މި ބަލި ފެތުރި އަދި މިބަލީގައި މަރުވާ މީހުންގެ ނިޞްބަތް ދުވަހުން ދުވަހަށް އިތުރުވަމުންދާތީ ދުނިޔޭގެ ޞިއްޙަތު ޖަމްޢިއްޔާއިން ވަނީ "ޕަބްލިކް ހެލްތު އެމަރޖެންސީ" އެއް އިޢުލާންކޮށްފައެވެ.