ކޮރޯނާވައިރަސް: ޝައްކުކުރެވޭ ފަތުރުވެރިންނާމެދު އަމަލުކުރާނެ ގޮތުގެ އުސޫލު އެކުލަވާލައިފި
ހެލްތު ފެސިލިޓީސް ތަކުގައި އަމަލުކުރާނެ ގޮތުގެ ކްރައިޓީރިއާ ތައްޔާރުކޮށް ތަންތަނަށް ދަނީ ފޮނުވަމުން
ކޮރޯނާވައިރަސް އާ ގުޅޭގޮތުން މައުލޫމާތު ވަނީ ދީފައި
ރިސޯޓެއްގައި ނުވަތަ ގެސްޓު ހައުސްއެއްގައި ނުވަތަ ޓޫރިސްޓުން ގޮސްއުޅޭ ތަނެއްގައި ކޮރޯނާވައިރަސް އަށް ޝައްކުކުރެވޭ މީހަކު ފެނިއްޖެނަމަ އަމަލުކުރާނެ ގޮތުގެ ގައިޑް ލައިނެއް އެކުލަވާލާ ޓޫރިޒަމް މިނިސްޓްރީ އާ ހިއްސާކޮށްފައިވާނެ ކަމަށް ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން ހާމަކޮށްފިއެވެ.
ކޮރޯނާވައިރަސް އާއި ގުޅޭގޮތުންނާއި، މިބައްޔަށް ރާއްޖެ ތައްޔާރުވެފައިވާ މިންވަރާއި މިހާރު ކުރަމުންދާ މަސައްކަތްތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ ނަޒްލާ ވިދާޅުވީ މިބައްޔަށް ޝައްކުކުރެވޭ މީހަކަށް ފަރުވާދޭ ހެލްތު ފެސިލިޓީސް ތަކުގައި އަމަލުކުރާނެ ގޮތުގެ ކްރައިޓީރިއާ ތައްޔާރުކޮށް ތަންތަނަށް ފޮނުވަމުންދާ ކަމަށެވެ.
މީގެއިތުރުން ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތު މިނިސްޓަރ އަބްދުﷲ އަމީން ވިދާޅުވީ ބައްޔާ ގުޅޭގޮތުން ރިޕޯޓްކޮށް ސުވާލުކުރުމަށް ކޯލް ސެންޓަރެއް ގާއިމުކޮށްފައިވާ ކަމަށެވެ. އެގޮތުން ރިސޯޓް ތަކުންނާއި ގެސްޓް ހައުސްތަކުން ސުވާލުކުރަން ބޭނުންވެއްޖެ ހާލަތެއްގައި ސުވާލުކުރުމަށް ހޮޓްލައިނެއް ގާއިމުކުރެވިފައިވާ ކަމަށް މިނިސްޓަރ ވިދާޅުވި އެވެ. އެގޮތުން މިހާތަނަށް އާއިރު ދެ ފަރާތަކުން ސުވާލުކޮށް މައުލޫމާތު ސާފުކޮށްފައިވާ ކަމަށް މިނިސްޓަރ ވިދާޅުވި އެވެ.
މިބަލީގެ ރިސްކް އެސިސްމެންޓާއި ސްކްރީން ކުރުމުގެ ކަންކަމާއި ގުޅޭގޮތުން މައުލޫމާތު ދެއްވަމުން ޑރ ނަޒްލާ ވިދާޅުވީ މިބަލީގެ ވާހަކަ އެންމެ ފުރަތަމަ ދުނިޔޭގެ ސިއްހަތު ޖަމިއްޔާއިން ހާމަކުރުމާއި ހިސާބުން މިބަލީގެ ރިސްކު އެސިސްމެންޓެއް ހަދާ ކަމަށެވެ. އެގޮތުގެ މަތިން ރާއްޖެއަށް މިބަލި އައުމުގެ ފުރުސަތު އޮތީ މިހާވަރަކަށްތޯ ދެނެގަނެ ބަލި އައިސްފިނަމަ ދެން ކަންތައްކުރާނެ ގޮތްތައް ބަލާފައިވާކަމަށެވެ. އަދި އޭގެ ސަބަބުން ދެންވާނެ ގޮތްތަކާއި މެނޭޖްކުރެވޭނެ ގޮތްތަކަށް ޚާއްސަ ސަމާލުކަންދީގެން ކުރަންޖެހޭ ކަންކަން ބަލާފައިވާކަމަށް ޑރ ނަޒްލާ ވިދާޅުވި އެވެ.
ޑރ ނަޒްލާ ވިދާޅުވީ މިބައްޔަށް ރާއްޖެ އަންނަ މީހުން ސްކްރީން ކުރަމުން ދަނީ އެކަމަށް އެކުލަވާލަންޖެހޭ ރިސްކް އެސިސްމެންޓަށް ބެލުމަށްފަހު އެކުލަވާލާފައިވާ ސްކްރީނިން ކްރައިޓީރިއާ އެއްގެ ދަށުން ކަމަށެވެ. މިއީ ޑަބްލިޔުއެޗްއޯގައި މިކަމަށް ކަނޑައަޅާފައިވާ ސްކްރީނިން ކްރައިޓީރިއާ ރާއްޖޭގެ ހާލަތަށް ފެއްތުމަށްފަހު ކަނޑައަޅާފައިވާ ކްރައިޓީރިއާ އެއްކަމަށް ޑރ ނަޒްލާ ވިދާޅުވި އެވެ.
ރާއްޖެއިން މިހާތަނަށް ކޮރޯނާވައިރަސް ފެނިފައިވާނުވާއިރު، އެ ބައްޔަށް ޝައްކުކުރެވޭ ފަރާތެއްވެސް އަދި މިހާތަނަށް ނުފެންނަ ކަމަށް ކަމާއިބެހޭ މުއައްސަސާތަކުން ވަނީ މައުލޫމާތު ދީފައެވެ.
