މެޖިސްޓްރޭޓް ހަސަން ދީދީގެ ޖިންސީ މައްސަލަ: 9 ފަރާތަކާއި ސުވާލުކޮށް، ބަޔާން ނަގައިފި
21 ޖެނުއަރީ 2020 | އަންގާރަ 11:41ހަސަންދީދީއާ ދެކޮޅަށް ސީރިއަސް މައްސަލަތަކެއް ހިމެނޭ
ކަނޑުހުޅުދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް ޙަސަންދީދީ
ޖިންސީ މައްސަލައަކާއި ގުޅިގެން ސަސްޕެންޑްކޮށްފައިވާ ގއ. ކަނޑުހުޅުދޫ އިސް މެޖިސްޓްރޭޓް ހަސަން ދީދީގެ މައްސަލައިގައި މިހާތަނަށް 9 ފަރާތަކާއި ސުވާލުކޮށް ބަޔާން ނަގާފައިވާކަމަށް ފުލުހުން ބުނެފިއެވެ.
އަންގާރަ ދުވަހު ފުލުހުން ނެރުނު ބަޔާނެއްގައި ބުނީ، ގއ. ކަނޑުހުޅުދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް ހަސަންދީދީ، ގއ. ކަނޑުހުޅުދޫ މެޖިސްޓްރޭޓް ކޯޓުގެ މުވައްޒަފުންނަށް ޖިންސީ ގޯނާ ކުރާކަމަށް ތުހުމަތު ކުރެވޭ މައްސަލަ ޖޭއެސްސީން ފުލުހުންނަށް ހުށައަޅާފައިވާ ކަމަށެވެ. އެގޮތުން މި މައްސަލައިގެ ތަޙްޤީޤުގައި މިހާތަނަށް 09 ފަރާތަކާއި ސުވާލުކޮށް ބަޔާން ނެގިފައިވާ ކަމަށް ފުލުހުން ބުނެއެވެ.
އޭގެއިތުރުން، މި މައްސަލައިގެ ތަޙްޤީޤުގައި ފާހަގަކުރެވިފައިވާ އިތުރު ކަންކަމާއި ގުޅިގެން އިތުރު ފަރާތްތަކައި ސުވާލުކުރުމުގެ މަސައްކަތް މިހާރު ކުރިއަށްދާކަމަށާއި، ތަޙްޤީޤަށް އިތުރު ހެއްކާއި ޤަރީނާ ހޯދުމުގެ މަސައްކަތްވެސް ކުރިއަށް ގެންދާކަމަށް ފުލުހުންގެ ބަޔާނުގައި ބުނެފައިވެއެވެ.
ހަސަންދީދީއާއި ގުޅޭ މައްސަލަތަކެއް ފުލުހުން ތަހުޤީޤު ކުރަމުންދާއިރު، މިދިޔަ އަހަރުގެ އޭޕްރީލް މަހުގެ 24 ވަނަ ދުވަހުން ފެށިގެން ހަސަން ދީދީއާ ގުޅޭ ހަތް މައްސަލައެއް ޖޭއެސްސީއަށް ވަނީ ހުށައެޅިފައެވެ. އެ ކޮމިޝަނުންވެސް ދަނީ އެ ހުރިހާ މައްސަލަތަކެއް ބަލަމުންނެވެ.
އެކަމާ ގުޅޭގޮތުން ޖޭއެސްސީން ބުނީ، ހަސަން ދީދީ މަސައްކަތަށް ނުކުމެ އުޅުމަކީ ކޮމިޝަނުގެ ކޮމިޓީން ކުރަމުންދާ ތަހުގީގަށް ހުރަސްތަކެއް އެޅިދާނެފަދަ ފުރުޞަތު އޮތްކަމެއް ކަމަށް ބެލެވޭތީ، މައްސަލައިގެ ތަހުގީގު ފުރިހަމަކޮށް، ކޮމިޝަނުން ވަކިގޮތެއް ކަނޑައަޅަންދެން ގއ. ކަނޑުހުޅުދޫ ކޯޓުގެ އިސްމެޖިސްޓްރޭޓް ޙަސަން ދީދީ ވަޒީފާއަށް ނުނިކުމެ މަޑުކުރުމަށް އަންގާފައިވާނެ ކަމަށެވެ.
ޖޭއެސްސީ އަށް ހުށައެޅިފައިވާ ޝަކުވާތަކާއި ގުޅިގެން ހަސަން ދީދީ ސަސްޕެންޑުކުރަން ނިންމާފައިވަނީ ނިމިދިޔަ އަހަރުގެ ޖުލައި މަހުގެ 29 ވަނަ ދުވަހުއެވެ.
