ޗެމްޕިއަން އޮފް ޗޭންޖް އެވޯޑު، ޝިލްޕާއަށާއި އޭނާގެ ފިރިމިހާއަށް

"ޗެމްޕިއަން އޮފް ޗޭންޖް އެވޯޑް 2019" ޝިލްޕާ ޝެޓީއަށާއި، އޭނާގެ ފިރިމިހާ ރާޖް ކުންދްރާއަށް ލިބިއްޖެއެވެ.

މި ދެމަފިރިންނަށް މި އެވޯޑު ލިބުނީ "ސްވަޗް ބަހަރަތް އަބިޔާން" ކެމްޕޭން ގައި ޢާންމުން ބައިވެރިވުމަށް ހިތްވަރުދީ އެކަމުގެ ނަމޫނާ ދެއްކުމުގެ ސަބަބުންނެވެ. ސްވަޗް ބަހަރަތް އަބިޔާން ކެމްޕޭނަކީ އިންޑިއާ ސަރުކާރުން 2014 ވަނަ އަހަރުން ފެށިގެން 2019 ވަނަ އަހަރުގެ ނިޔަލަށް ކުރިޔަށްގެންދިޔަ ކެމްޕޭނެކެވެ. މި ކެމްޕޭނަކީ އިންޑިއާގެ އެކި ޞަރަޙައްދުތަކުގެ މަގުތައް ސާފު ކުުރުމުގެ އަޒުމުގައި ޙަރަކާތްތަކެއް ހިންގަން ކުރިޔަށްގެންދިޔަ ކެމްޕޭނެކެވެ.

މި އެވޯޑް ޝިލްޕާއާ ޙަވާލުކޮށްދެއްވީ އިންޑިއާގެ ކުރީގެ ރައީސް ޕްރަނާބް މުކަރްޖީއެވެ.

ސްވަޗް ބަހަރަތް އަބިޔާން ކެމްޕޭން 02 އޮކްޓޯބަރު 2014 ގައި ލޯންޗުކޮށްފައިވާއިރު އިންޑިއާގެ ވެރިރަށް ނިއުދިއްލީގައި ކެމްޕޭން ލޯންޗުކޮށްދެއްވީ އިންޑިއާގެ ބޮޑުވަޒީރު ނަރެންދްރަ މޯދީއެވެ. އެމަނިކުފާނު ވަނީ މި ކެމްޕޭން ފުޅާދާއިރާއެއްގައި ކުރިއަށް ގެންދިޔުމަށްޓަކައި ބޮލީވުޑުގެ ބައެއް ތަރިން ވެސް މި ކެމްޕޭނުގައި ހިމަނާފައެވެ. އެގޮތުން ހިމާނާފައިވާ ބައެއް ތަރިންނަކީ ޕްރިޔަންކާ ޗޯޕްރާ، ސަލްމާން ޚާން، ވިދިޔާ ބާލަން، ކަމާލް ހަސަން އަދި އަމީތާބް ބައްޗަންއެވެ.