އުމުރުން ދެ އަހަރު ކުއްޖާގެ މައްސަލަ ދިރާސާކުރަމުންދާ ކޮމިޓީން މިއަދު ގޮތެއް ނިންމަނީ

އުމުރުން 2 އަހަރުނުވާ ކުޑަކުއްޖަކަށް ޖިންސީ ގޯނާކުރި މައްސަލަ ދިރާސާކުރަމުންދާ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން އާދިއްތަ ދުވަހު ގޮތެއް ނިންމަވާނެކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.

މިމައްސަލާގައި ކޮމިޓީގެ ދެ ބައްދަލުވުމެއް ބާއްވާފައިވާއިރު އާދިއްތަ ދުވަހުގެ މެންދުރު 14:00 ގައި ކޮމިޓީގެ ބައްދަލުވުމެއް ބޭއްވުމަށް ވަނީ އެޖެންޑާކޮށްފަ އެވެ. އަދި މިބައްދަލުވުމުގައި މިމައްސަލަ ދިރާސާކުރެއްވުމަށް ވަނީ ހަމަޖެހިފަ އެވެ.

ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރ ޙަސަން ޒިޔާއު ވިދާޅުވީ މިމައްސަލާގައި ކޮމިޓީން ނިންމާގޮތެއް މަޖިލީހުގެ ރައީސަށް އަންގަވާނެކަމަށާއި އަދި އެނިންމެވުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ތަންފީޒުކުރައްވާނެ ކަމަށެވެ.

މިމައްސަލައާއި ގުޅިގެން ރައްޔިތުންގެ މަޖިލީހުން މީގެކުރިން ނެރެފައިވާ ބަޔާނެއްގައި ބުނެފައިވަނީ ކުޑަކުދިންނާ ގުޅޭ މިފަދަ ހުރިހާ މައްސަލަތައް ދިރާސާކޮށް، އެކަމުގައި ހިމެނޭ މީހުން އިންސާފުގެ ކުރިމަށްޗަށް ގެނައުމަށާއި، ކުޑަކުދިންގެ ޙައްޤުތައް ރައްކާތެރިކުރުމަށް، ރައްޔިތުންގެ މަޖިލީހުން ކުރަންޖެހޭ ހުރިހާކަމެއް ފަސްޖެހުމެއް ނެތި ކުރާނެކަމުގެ ޔަޤީންކަން އަރުވާ ކަމަށެވެ.

އަދި މިކަމާއި ގުޅިގެން މަޖިލީހުގެ ރައީސް މުޙައްމަދު ނަޝީދު ކުރެއްވި ޓްވީޓެއްގައި ވިދާޅުވީ ތުއްތު ކުއްޖަކު އޭނާގެ އަމިއްލަ މުނިކާފަ، ކާފަ އަދި ބައްޕަގެ ޖިންސީ ޝިކާރައަކަށްވީ ކަމީ އިންތިހާއަށް ކަންބޮޑުވުން ހުރި ލަދުވެތި ކަމެއްކަމަށެވެ. އަދި މިކަމާއި ގުޅިގެން އެކި ފަރާތްތައް ޒިންމާދާރުކުރުމުގެ މަސައްކަތް ކުރަމުންދާނެ ކަމަށް ރައީސް ނަޝީދު ވަނީ ވިދާޅުވެފައެވެ.

އެންމެފަހުން ކޮމިޓީން ބޭއްވި ބައްދަލުވުމުގައި ވަނީ ޖެންޑަރ މިނިސްޓްރީ އާއި ޕީޖީ އަދި ފުލުހުން ކޮމިޓީއަށް ހާޒިރުކޮށް ސުވާލުކޮށްފަ އެވެ. މީގެއިތުރުން މިކޮމިޓީ ބައްދަލުވުމުގައި މިމައްސަލަ ފެންމަތިވެގެން އުޅޭ ގއ ކަނޑުހުޅުދޫ ކައުންސިލުގެ ރައީސާ ފޯނުން ގުޅައިގެންވެސް ކޮމިޓީން ވަނީ މިމައްސަލައިގެ އިތުރު މަޢުލޫމާތު ސާފުކޮށްފަ އެވެ.