އަފްޣާނިސްތާނާއި، ޕާކިސްތާނަށް ކުރިމަތިވި މޫސުމީ ޙާދިސާތަކުގައި 130 މީހުން މަރުވެއްޖެ

އަފްޣާނިސްތާނާއި، ޕާކިސްތާނަށް މިހާރު ފިނިމޫސުމާއި ކުރިމަތިވެފައިވާއިރު، ކުރިމަތިވި މޫސުމީ ކާރިސާތަކުގައި ދެޤައުމުން 130 އަށް ވުރެ ގިނަ މީހުން މަރިވެއްޖެއެވެ.

ބައިނަލްއަޤުވާމީ މީޑިއާތަކުން ރިޕޯޓުކުރާގޮތުގައި ގިނަ މީހުން މަރުވެފައިވަނީ ސްނޯބޯވެ، ސްނޯވގަނޑު ކަނޑައިގެން ދިޔުމުގެ ޙާދިސާތަކާއި، އައިސް ވިރިގެން ފެންބޮޑުވުމާއި، ފިނިހޫނުމިން އިންތިހާއަށް ދަށްވުމުގެ ސަބަަބުން ކުރިމަތިވި ތަފާތު އެކި ޙާދިސާތަކުގައެވެ.

ޕާކިސްތާނަށް ބަލާލާއިރު، އެޤައުމުގެ އެކިކަންކޮޅުތަކުގައި ހިނގި މިފަދަ ގިނަ ޙާދިސާތަކުގައި 93 މީހުން މަރުވެ، 76 މީހުން ޒަޚަމްވެ، ވީނުވީއެއް ނޭނގި ގިނަ ބަޔަކު ވަނީ ގެއްލިފައެވެ. ފިނިމޫސުމުގެ އަސަރު އެންމެ ބޮޑަށް ކޮށްފައިވަނީ ޕާކިސްތާނުގެ ކަޝްމީރަށެވެ. ކަޝްމީރުން އެކަނިވެސް 62 މީހުން މަރުވެ 10 މީހުން ވީނުވީއެއް ނޭނގި ގެއްލިފައިވާކަމަށް ޕާކިސްތާނުގެ ކާރިޘާތަކާއި ބެހޭ އިދާރާއާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓުކޮށްފައިވެއެވެ.

ޕާކިސްތާނަށް ބަލާއިރު، ސްނޯބޯވެ މަގުތައް ވަނީ ބަންދުވެފައެވެ. ޚާއްޞަކޮށް ފަރުބަދަމަތީ އަވަށްތައް ވަނީ އެހެން އަވަށްތަކާއި ގުޅުން ކެނޑިފައެވެ. ހައިވޭތައް ބަންދުވުމުގެ ސަބަބުން ދަތުރުފަތުރުތައް ވަނީ މެދުކެނޑިފައެވެ. ފަރުބަދަމަތީ ގިނަ އަވަށްތަކުގައި ސްކޫލްތަކާއި ،ޢާންމު ޚިދުމަތްދޭތަންތަން ވަނީ ސަރުކާރުން މުއްދަތެއް ނެތްގޮތައް ބަންދުކޮށްފައެވެ.

އަދި އަފްޣާނިސްތާނަށް ކުރިމަތިވި ފިނި މޫސުމުގެ ކާރިޘާތަކުގައި 39 މީހުން މަރުވެފައިވާކަމަށް ޚަބަރު ލިބެއެވެ. އަދި މީހުން ދިރިއުޅޭ އަވަށްތަކުގެ ބައިބޯ ހިސާބުތަކާއި، މަގުތަކާއި ހައިވޭތަކުގައި ސްނޯ ބޯވެ، ޢާންމު ދިރިއުޅުމަށް ވަނީ ބުރޫ އަރާފައެވެ. އާންމު ދަތުރުފަތުރުގެ ނިޒާމު ހުއްޓުމަކަށް އައިސްފައިވާއިރު، ޓްރެފިސް ފުލުހުންނާއި، ކާރިޘާތަކުގައި އެހީތެރިވެދޭ ވޮލަންޓިއަރުންގެ އެހީގައި ސްނޯކެހުުމުގެ މަސައްކަތާއި ގެއްލިފައިވާ މީހުން ހޯދުމުގެ މަސައްކަތް ކުރިޔަށްދާކަމަށް ޚަބަރު ލިބެއެވެ. އަފްޣާނިސްތާނާއި ޕާކިސްތާނުގެ ގުޅޭ ޞަރަޙައްދީ އިން ކައިރި އަވަށްތަކުން 300 އަށް ވުރެ ގިނަ ގެތައް ބޭނުން ނުކުރެވޭ ވަރަށް ހަލާކުވެފައިވާކަމަށްވެސް ބައިނަލްއަޤުވާމީ މީޑިއާތަކުން ރިޕޯޓުކުރެއެވެ.