މިދިޔަ އަހަރު ދިވެހި ސިނަމާތަކަށް ނެރުނު އެންމެ ތަފާތު ފިލްމު ކަމަށްވާ ''ބަވަތި'' ލީކް ކޮށްލުމުން އެ ފިލްމު ޔޫޓިއުބުންނާއި ފޭސްބުކް އިން ނަގައިފިއެވެ. ފިލްމު ލީކް ކޮށްފައިވަނީ ޔޫޓިއުބް އަށާއި، އެފްބީ ދެ ޕޭޖަކަށެވެ.
ފިލްމު ލީކް ކޮށްލުމާއި ގުޅިގެން ބަވަތި އުފެއްދި އައި ފިލްްމްސް އިން ނެރުނު ބަޔާނެއްގައި އެ ޕްރޮޑަކްޝަނުން ވަނީ އެކަން ކުށްވެރިކޮށްފައެވެ. އެ ބަޔާނުގައި ބުނީ، ކާކުކަން ނޭނގޭ މީހަކު އެ ޕްރޮޑަކްޝަންގެ ފުރަތަމަ ފީޗާ ފިލްމު ބަވަތި ކޮޕީ ކޮށްގެން އެ ފިލްމު ޝޯޝަލް މީޑިއާގެ އެކި ޕްލެޓް ފޯމްތަކުގައި ލީކް ކޮށްފައިވާ ކަމަށެވެ.
ޕްރޮޑަކްޝަން ކުންފުނިތަކާއި، ކޮންޓެންޓް ލިޔާ މީހުންނާއި، މިއުޒިޝަނުން އަދި އާޓިސްޓުން ބުރަ މަސައްކަތުން އެތައް ފައިސާތަކެއް ހޭދަކޮށްގެން އާއްމުންނާއި ހަމަޔަށް ގެނެސްދޭ މި ފަދަ މަސައްކަތްތަކަކީ އެ އުފެއްދި މީހުންގެ އަމިއްލަ އެއްޗަކަށްވާއިރު ފިލްމުތައް ލީކްކުރުމަކީ ''ވައްކަމެއް'' ކަމަށެވެ. އަދި މި ފަދަ އެއްވެސް ކަމެއް ބައިވެރިނުވުމަށް އެ ފްރޮޑަކްޝަނުން ވަނީ ސަޕޯޓަރުންނަށް އިލްތިމާސް ކޮށްފައެވެ.
އެކަމުގައި ޝާމިލްވާ މީހުން ހޯދަންވެގެން ފުލުހަށް ހުށައެޅުމުން ފުލުހުން ބުނެފައިވަނީ، ޑޭޓާ ޕްރޮޓަކްޝަން ގާނޫނެއް ނެތުމުގެ ސަބަބުން ފޭސްބުކް މެދުވެރިކޮށް އެކަމުގައި ޝާމިލްވާ ފަރާތްތައް ހޯދެން ނެތް ކަމަށް އައި ފިލްމްސް އިން ނެރުނު ބަޔާނުގައި ބުންޏެވެ.
ކ. ކާށިދޫގެ އިތުރުން މާލޭގައި މަންޒަރުތައް ނަގާފައިވާ "ބަވަތި" އަކީ ޒުވާން ދެމަފިރިއަކަސް ދިމަވާ ކަންތައްތައްތަކެއް ދައްކުވައިދޭ ސަސްޕެންސް ތްރިލާއެކެވެ. ބަވަތި އެއީ ބިރުވެރި ފިލްމެއް ނޫނެވެ.
ފިލްމުގެ ލީޑު ރޯލުން ފެނިގެންދިޔައީ މިހާރު ފިލްމީ ދާއިރާގެ އުހުގައި ފިޔަޖަހަމުން އަންނަ ބަތަލާ ނުޒުހަތު ޝުއައިބް އާއި ފިލްމީ ދާއިރާ އަށް މުޅިން އަލަށް ނިކުތް ތަރި އަހުމަދު އިންފާޒް އެވެ. އައު މޫނު ތަކެއް ފިލްމުން ފެނިގެން ދިޔަ ނަމަވެސް ފިލްމީ ދާއިރާގެ ސީނިއާ ތަރިންގެ އެކްޓިން ވެސް ކޮންމެވެސް ވަރަކަށް ފިލްމުން ފެނުނެވެ.
