ނިމިދިޔަ 2019 ވަނަ އަހަރު 36،000 ވައިލޭޝަން ސްޓީކާ ޖަހާފައިވާ ކަމަށް ތަފާސްހިސާބުތަކުން ދައްކައިފި އެވެ.

މިދިއަ އަހަރުގެ ޖެނުއަރީ އެއްވަނަ ދުވަހުން ފެށިގެން، މިދިޔަ އަހަރުގެ ޑިސެމްބަރު މަހުގެ 31 ވަނަ ދުވަހުގެ ނިޔަލަށް، ޓްރެފިކް މައްސަލަތަކުގައި ފިޔަވަޅު އަޅާފައިވާ ގޮތުގެ ތަފްސީލްތަކުގެ ތަފާސްހިސާބުތަކުން ދައްކާގޮތުން، މިދިޔަ އަހަރު 36963 (ތިރީސްހަހާސް ނުވަސަތޭކަ ފަސްދޮޅަސްތިނެއް) ވައިލޭޝަން ސްޓިކާ ވަނީ ޖަހާފަ އެެވެ.

ގަވާއިދާ ހިލާފަށް ޕާކްކޮށްގެން ވެހިކަލްތަކުގައި ސްޓީކާ ޖެހުމުގެ މައްސަލަތައް މިހާރުވެސް އިތުރުވެ، އާންމުގެ ކަންބޮޑުވުން ފާޅުކުރަމުންދާއިރު، ޓްރެފިކް އެކި މައްސަލަތަކުގައި އަޅާފައިވާ ފިޔަވަޅުތަކާއަޅާބަލާއިރު، އެއީ މިދިއަ އަހަރު ވެސް އެންމެ ގިނަ ފިޔަވަޅު އެޅުނު ޓްރެފިކް މައްސަލައެވެ.

ސްޓީކާ ޖެހުމުގެ އިތުރުން، ދެން އެންމެގިނަ ފިޔަވަޅު އަޅާފައިވަނީ އެގިންތިއެއްގެ އުޅަނދު ދުއްވުމުގެ ލައިސަންސް ނެތި ދުއްވުމުގެ މައްސަލަތަކެވެ. އެގޮތުން އެފަދަ 7589 (ހަތްހާސް ފަސްސަތޭކަ އައްޑިހަނުވަ) މައްސަލާގައި ފުލުހުން ވަނީ ފިޔަވަޅު އަޅާފަ އެވެ.

ލައިސަން ހިފަހައްޓާފައިވަނިކޮށް، ނުވަތަ ވަގުތީ ލައިސަންސްނެތި ދުއްވި މައްސަލަތަކުގެ އަދަދު 2857 މައްސަލާގައި ފިޔަވަޅު އަޅާފައިވާއިރު، އަހަރީ ފީ ނުދައްކާ ނުވަތަ އަހަރީ ފީގެ މުއްދަތު ހަމަވެފައިވާ އުޅަނދު ދުއްވައިގެން 2684 މައްސަލާގައި ވަނީ ފިޔަވަޅު އަޅާފަ އެވެ. އަދި ރޯޑްވާދިނަސް ނުހައްދާ ނުވަތަ މުއްދަތުހަމަވެފައި ވަނިކޮށް ދުއްވުން ނުވަތަ ރޯޑްވާދުނަސް ސްޓިކާނެތި ދުއްވައިގެން 2050 މައްސަލާގައި ފުލުހުން ވަނީ މިދިއަ އަހަރު ފިޔަވަޅު އަޅާފަ އެވެ.

މިދިއަ އަހަރު ގަވާއިދާ ހިލާފަށް ޕާކުކުރުމުން، 36963 ސްޓީކާ ޖަހާފައިވާއިރު، ޖޫރިމަނާ ފީގެ އެންމެމަތީ އަގު ކަމަށްވާ 750ރ އަށް ބަލާނަމަ، 27،722،250ރ (ހަތާވީސް މިލިއަން ހަތްލައްކަ ބާވީސްހާސް ދުއިސައްތަ ފަންސާސް ރުފިޔާ) އެވެ. ގަވާއިދާ ހިލާފަށް ޕާކު ކުރާނަމަ އެ އުޅަނދެއްގައި ޖަހާ ފުރަތަމަ ސްޓިކާއަށް 250ރ ދައްކަން ޖެހޭއިރު، ދެވަނަ އަހަރަށް ޖަހާ ސްޓިކާއަށް 500ރ ދައްކަންޖެހޭއިރު، ދެން ޖަހާ ކޮންމެ ސްޓިކާއަކަށް 750ރ ދައްކަން ޖެހެއެވެ.

މާލޭގައި ޕާކް ކުރާނެ ތަން ނުދައްކާ، ސްޓިކާ ޖަހަމުންދާތީ، ގިނަ ބަޔަކު ދަނީ ނުރުހުން ފަޅުކުރަމުން ނެވެ. ނަމަވެސް އެމައްސަލައަށް ސަރުކާރުން ހައްލެއް ގެނައުމަށް މަސައްކަތް ކުރަމުންދާއިރު، މިހާރު ވެސް ޕާކުކުރާނެ އިތުރު ތަންތަން ދަނީ ގާއިމު ކުރަމުންނެވެ. މާލޭގެ ޓްރެފިކް މައްސަލައަކީ ހައްލު ނުކުރެވިއޮތް އަދި ރައްޔިތުންގެ ކަންބޮޑުވުން އިންތިހާއަށް އޮތް މައްސަލައެކެވެ.