މި އަހަރު އެންމެ އިސްކަމެއް ދޭނީ ކުނީގެ މައްސަލަ ހައްލުކުރުމަށް: މިނިސްޓަރ

މިއަހަރު އެންމެ އިސްކަމެއް ދީގެން ކުރާނެ އެއް މަސައްކަތަކީ ރާއްޖެއަށް ދިމާވެފައިވާ ކުނީގެ މައްސަލައަށް ހައްލެއް ހޯދައިދެއްވުން ކަމަށް އެންވަޔަރމަންޓް މިނިސްޓަރ ޑރ ހުސައިން ރަޝީދް ހަސަން ވިދާޅުވެއްޖެއެވެ.

ހޯމަ ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، މި އަހަރު ތެރޭގައި އެންމެ މުހިއްމު އެއް ކަމެއްގެ ގޮތުން ކުރާނެ މަސައްކަތަކީ ރާއްޖެއަށް ދިމާވެފައިވާ ކުނީގެ މައްސަލައަށް ހައްލެއް ހޯދައިދެއްވުން ކަމަށާއި، މިހާރު އެ މަސައްކަތް ކުރުމަށް އިތުރަށް ފަސޭހަވެފައިވާ ކަމަށެވެ.

އެގޮތުން ސަރުކާރުން ލާމަރުކަޒީ ކުރުމަށްޓަކައި ކުރަމުންދާ މަސައްކަތްތަކާއި، ލާމަރުކަޒީ ޤާނޫނަށް ގެނެސްފައިވާ ބަދަލުތަކާއެކު އެ މަސައްކަތް އިތުރަށް ފަސޭހަވެގެންދާނެ ކަމަށް މިނިސްޓަރ ވިދާޅުވިއެވެ.

އޭގެ އިތުރުން، ހުރިހާ ރަށެއްގައި އުފެދޭ ކުނީގެ ތެރެއިން އެރަށަކުން މެނޭޖުނުކުރެވި ބޭރު ކުރަންޖެހޭ ކުނި ބޭރު ކުރުމަށް ޞަރަޙައްދީ ކުނި މެނޭޖް ކުރާ ސެންޓަރުތަކަށް ގެންދާނެ ކަމަށާއި، 3 ޞަރަޙައްދަށް ބަހާލައިގެން އެކަން ކުރެވިދާނެ ކަމަށް މިނިސްޓަރ ވަނީ ވިދާޅުވެފައެވެ.

އެގޮތުން ޞަރަޙައްދީ މަރުކަޒުތައް ޤާއިމު ކުރުމަށްޓަކައި މިހާރު ރ ވަންދޫގައި ޤާއިމު ކުރެވިފައިވާ ސެންޓަރުގެ އިތުރުން، ތިލަފުއްޓާއި، އައްޑޫސިޓީގައި ކުނި މެނޭޖްކުރާ ސެންޓަރުތައް ޤާއިމުކުރުމުގެ މަސައްކަތް މިނިސްޓްރީން ދަނީ ކުރަމުންނެވެ.

އޭގެ އިތުރުން، ކުންޏަކީވެސް ޢާމްދަނީގެ ވަޞީލަތަކަށް ހެދުމަކީ މި ސަރުކާރުގެ ޢަމާޒެއްކަން ފާހަގަކުރައްވައި މިނިސްޓަރ ވަނީ ކުނި އުފައްދާ ނިޞްބަތަށް ބަލައި އެފަރާތްތަކުން އަގެއް ދައްކާގޮތަށް ހަމަޖެއްސުމަކީ މުހިއްމު ކަމެއް ކަން ފާހަގަކުރައްވާފައެވެ. އަދި ކުނި މެނޭޖް ކުރުމަށްޓަކައި ރަށްރަށުގެ ކައުންސިލު ތަކުގެ ޒިންމާވެސް ބޮޑުކަމަށް މިނިސްޓަރ ވިދާޅުވިއެވެ.