ފަސް އަހަރު ދުވަހުގެ ތައުލީމީ ދާއިރާގެ ޕްލޭން އިފްތިތާހުކޮށްފި
21 ޑިސެމްބަރު 2019 | ހޮނިހިރު 08:41މިއީ 1995 ގެ ފަހުން ތައުލީމީ ދާއިރާއާއި ގުޅުން ހުރި ކަންކަން ބަލާ ދިރާސާ ކުރުމަށްފަހު ހެދުނު ފުރަތަމަ ޕްލޭން
ސްކޫލް ކުދިންތަކެއް ފީލްޑް ޓްރިޕަކަށް ދަނީ
ތަޢުލީމީ ދާއިރާގެ ފަސް އަހަރު ދުވަހުގެ ޕްލޭން (އީއެސްޕީ) އިފްތިތާޙު ކޮށްފިއެވެ.
"އެޑިއުކޭޝަން ސެކްޓަރ ޕްލޭން" އީއެސްޕީ ތައްޔާރުކޮށްފައިވަނީ އެޑިއުކޭޝަން މިނިސްޓްރީއާއި ހަޔަރ އެޑިއުކޭޝަން މިނިސްޓްރީއާއި ގުޅިގެންނެވެ. މި ޕްލޭނަށް އެހީތެރިވެދީފައިވަނީ ގްލޯބަލް ޕާޓްނަރޝިޕް ފޮރ އެޑިއުކޭޝުން ޖީޕީއީންނެވެ. އެހީގެ ގޮތުގައި ޖީޕީއީން ވަނީ ފަސްލައްކަ އެމެރިކާ ޑޮލަރު ދީފައެވެ.
އެޑިއުކޭޝަން ދާއިރާގެ ޕްލޭން އިފްތިތާޙުކޮށްދެއްވީ އެޑިއުކޭޝަން މިނިސްޓަރ ޑރ. އައިޝަތު އަލީއާއި ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަންއެވެ.
ތަޢުލީމީ ދާއިރާގެ އާ ޕްލޭނުގެ މަޤުޞަދަކީ ޤައުމު ބިނާކުރުމުގައި އަންހެން ކުދިންނާއި ފިރިހެން ކުދިން އަދި ޒުވާނުންނާއި ބޮޑެތި މީހުންގެ ބައިވެރިވުން ހިމަނައި، ހުރިހާ ދާއިރާއަކުން ފުރުޞަތުތައް ފޯރުކޮށްދިނުމެވެ. މީގެ އިތުރުން ބަވަނަވެފައިވާ ދުނިޔެއެއްގައި ޒިންމާދާރު ރައްޔިތުން ބިނާ ކުރުމަކީ ވެސް މި ޕްލޭނުގެ މަޤުޞަދެކެވެ.
މި ޕްލޭން ހަދާފައިވަނީ ޔުނިސެފާއި ގުޅިގެން ތަޢުލީމީ ދާއިރާއި ގުޅުންހުރި ކަންކަން ބެލުމަށްފަހުގައެވެ. އަދި މިއީ 1995 ގެ ފަހުން ތަޢުލީމީ ދާއިރާއާއި ގުޅުން ހުރި ކަންކަން ބަލާ ދިރާސާ ކުރުމަށްފަހު ހެދުނު ފުރަތަމަ ޕްލޭން ކަމަށް ވެސް އެޑިއުކޭޝަނުން ބުނެއެވެ.
