އިންތިޚާބުގެ ނަތީޖާ ގަބޫލުނުކުރާ ކަމަށް ވިދާޅުވެ މައްސަލަ ބަލައިދޭން އަސްލަމް ހުށަހަޅުއްވައިފި
24 ނޮވެމްބަރު 2019 | އާދީއްތަ 13:0611 ކަމެއް ފާހަގަކޮށް މައްސަލަ ހުށަހަޅާފައިވާ ކަމަށް އަސްލަމް ވިދާޅުވި
އެމްޑީޕީގެ ނައިބު ރައީސް ކަމަށް ކުރިމަތިލެއްވި މުހައްމަދު އަސްލަމް
މިދިޔަ ހުކުރު ދުވަހު ބޭއްވި އެމްޑީޕީގެ އެތެރޭގެ އިންތިޚާބުގެ ނަތީޖާ ގަބޫލުނުކުރައްވާ ކަމަށް ވިދާޅުވެ އެމައްސަލަ ބަލައިދޭން އެމްޑީޕީގެ ސެކެޓްރީ ޖެނެރަލަށް, އެ އިންތިޚާބުގައި ނާކާމިޔާބީ އާ ކުރިމަތިވެވަޑައިގެންނެވި ހިތަދޫ އުތުރު ދާއިރާގެ މެމްބަރ މުހައްމަދު އަސްލަމު ހުށަހަޅުއްވައިފި އެވެ.
އަސްލަމް ކުރިމަތިލެއްވީ އެމްޑީޕީގެ ނައިބު ރައީސްގެ މަގާމަށެވެ. މައްސަލަ ބަލައިދިނުމަށް އެމްޑީޕީގެ ސެކްޓްރީ ޖެނެރަލަށް ހުށަހެޅުއްވާ އެކަމުގެ ތަފްސީލު "ރާއްޖެއެމްވީ" އަށް ދެއްވަމުން އަސްލަމް ވިދާޅުވީ އިންތިޚާބު ތެރޭގައި އޮޅުވާލުންތަކެއް ހުރިކަމަށް ގަބޫލުކުރައްވާ ކަމަށެވެ. ޕާޓީގެ އެތެރޭގެ އިންތިޚާބަކަށްވާތީ ހުށަހަޅާފައިވާ މައްސަލައިގައި ފާހަގަކޮށްފައިވާ 11 ކަންތައްކުގެ ތަފްސީލު ހާމަކުރައްވަން ބޭނުންނުވާކަމަށް އަސްލަމް ވިދާޅުވި އެވެ. ނަމަވެސް ޖުމްލަކޮށް އެކަންތައްތައް ފާހަގަކުރާނަމަ މުޅި އިންތިޚާބުގެ އުސޫލުތަކުގައި މައްސަލަތަކެއް ހުރިކަމަށް ފާހަގަކުރެވިފައިވާ ކަަމަށާއި ނަތީޖާ އޮޅުވާލުމުގެ ކަންތައްތަކެއް ފާހަގަ ކުރެވިފައިވާކަމަށް އަސްލަމް ވިދާޅުވި އެވެ.
އަސްލަމް ވިދާޅުވީ އެމްޑީޕީއަކީ އެންމެ ބޮޑަށް ދެފުށް ފެންނަ އިންސާފުވެރި އިންތިޚާބުތަކަށް ވަކާލާތު ކުރަމުންދާ ޕާޓީކަމަށާއި އެހެންކަމުން ޕާޓީގެ އެތެރޭގެ އިންތިޚާބުތައް ދެފުށް ފެންނަގޮތަކަށް ބާއްވަންޖެހޭކަމަށް ގަބޫލުކުރައްވާ ކަމަށެވެ.
އަސްލަމް ވިދާޅުވީ އެކި ތަންތަނުން މައުލޫމާތު ލިބޭ މިންވަރަކުން ރިޕޯޓް އެކުލަވާލަމުންދާނެ ކަމަށެވެ.
އެމްޑީޕީގެ ނައިބު ރައީސް ކަމަށް އަސްލަމާއެކު ވާދަކުރެއްވީ އެމްޑީޕީގެ ކުރީގެ ނައިބު ރައީސްގެ މަގާމުގައި ހުންނެވި މުހައްމަދު ޝިފާޒެވެ. ޝިފާޒު އެ މަގާމު ދިފާއު ކުރެއްވީ 13233 ވޯޓުންނެވެ. އަސްލަމަށް ލިބިވަޑައިގަތީ 9957 ވޯޓެވެ.
