13 އަހަރުގެ ކުޑަކުއްޖާ ބަލިވެއިން މައްސަލާގައި އިހުމާލުވި އިދާރާތަކާއި ހިތްވަރުދިން ފަރާތްތަކަށް ހައްގު އަދަބު ލިބެންޖެހޭ ކަމަށް، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
މިމައްސަލަ އާއި ގުޅިގެން އެމަނިކުފާނު ކުރެއްވި ޓްވީޓެއްގައި ވިދާޅުވެފައިވަނީ 13 އަހަރުގެ ކުޑަ އަންހެން ކުއްޖެއްގެ ނާޖާއިޒް ބޭނުން ހިފާ އޭގެ ނަތީޖާއެއްގެ ގޮތުން އެކުއްޖާ ބަލިވެއިނދެ އެކުއްޖާއަށް ދިން އަނިޔާ އެންމެ ހަރުކަށި އިބާރާތުން ކުށްވެރި ކުރައްވާކަމަށެވެ.
ލަނޑާ ނެގުމުގެ މަސައްކަތްކުރާ ދޯނީގައި އުޅުނު ރ. މަޑުއްވަރީ މީހަކަށް އަނިޔާކޮށް ކަނޑަށް އެއްލާލި މައްސަލަ ހުކުރު ދުވަހު ފެންމަތި ވެފައިވަނިކޮށް، އޭނާ އަކީ އުމުރުން 13 އަހަރުގެ ކުއްޖަކާ ގަވައިދާ ޙިލާފަށް ކައިވެނިކޮށްގެން އުޅޭ މީހެއް ކަމުގެ މައުލޫމާތު ވަނީ ލިބިފަ އެވެ.
މިމައްސަލަ ފެންމަތިވުމާއެކު ގިނަ ބައެއްގެ ފާޑުކިޔުން ސޯޝަލް މީޑިޔާގައި ޖެންޑާ މިނިސްޓަރަށާއި އެ މިނިސްޓްރީއަށް ވަނީ އަމާޒުވެފައެވެ. މި ފާޑުކިޔުންތައް އަމާޒުވެފައި ވަނިކޮށް އެ މިނިސްޓްރީން ކޮށްފައިވާ ޓްވީޓެއްގައި ބުނެފައިވަނީ ކުޑަކުއްޖަކު ބަލިވެއިންކަމުގެ ރިޕޯޓް ލިބުމުން އެމައްސަލައިގައި ތުހުމަތު ކުރެވޭ ބޮޑެތި މީހުންނާމެދު ފިޔަވަޅު އަޅައިދިނުމަށް ތަޙުޤީޤީ އިދާރާއަށް ރަސްމީކޮށް އެދިފައިވާކަމުގެ ފުރިހަމަ ޔަޤީންކަން މިނިސްޓްރީން އަރުވާކަމުގަ އެވެ.
ފުލުހުން މިއަދު ބުނެފައިވަނީ 13 އަހަރުގެ އަންހެންކުއްޖަކު ބަނޑުބޮޑުވި މައްސަލައެއް ޖެންޑާ މިނިސްޓްރީ އާއި ފުލުހުން ގުޅިގެން ތަހުގީގު ކުރަމުންދާ ކަމަށެވެ. ރާއްޖޭގައި އުމުރުން 18 އަހަރު ނުވާ ކުޑަކުދިންނާ ކައިވެނިކުރުމަކީ ޤާނޫނީ ގޮތުން މަނާކަމެކެވެ.
