ހަތް ޓީމާއި އެކު ޅަވިޔަނި ފުޓްސެލް ޗެލެންޖް 2019 ފަށައިފި
21 ނޮވެމްބަރު 2019 | ބުރާސްފަތި 03:53މި މުބާރާތުގެ މެޗުތައް ކުރިޔަށްދާނީ ހިންނަވަރު ފުޓްސެލް ދަނޑުގައި
ޅަވިޔަނި ފުޓްސެލް ޗެލެންޖްގެ ތެރެއިން
ޅ. ހިންނަވަރު އިޖުތިމާއީ މަރުކަޒާއި، ހިންނަވަރު ކައުންސިލް އަދި ހިންނަވަރު ޕޮލިސް ސްޓޭޝަނުން އިންތިޒާމުކޮށްގެން ބާއްވާ ޅަވިޔަނި ފުޓްސެލް ޗެލެންޖް 2019 ފަށައިފިއެވެ.
މި މުބާރާތުގައި މިއަހަރު ހަތް ޓީމަކުން ވާދަކުރާއިރު މި މުބާރާތުގައި ހިންނަވަރުން ތިން ޓީމާއި، ނައިފަރުން އެއް ޓީމާއި ފެލިވަރުގެ ދެ ޓީމް އަދި ހިންނަވަރުގައި ދިރިއުޅެމުން އަންނަ ބަންގްލަދޭޝް ރައްޔިތުންގެ ޓީމެއް ވާދަކުރާނެއެވެ.
މި މުބާރާތުގެ މެޗުތައް ކުރިޔަށްދާނީ ހިންނަވަރު ފުޓްސެލް ދަނޑުގައެވެ.
މި މުބާރާތުގައި ބުދަ ދުވަހުގެ ރޭ ދެ މެޗު ކުޅެފައިވާއިރު ފުރަތަމަ މެޗުގައި ވާދަކޮށްފައިވަނީ ސްކޯޕިއަންސް އަދި ބަންގްލަދޭޝް އެމްވީއެވެ. މި މެޗު ފަސޭހަކަމާއި އެކު ސްކޯޕިއަންސް އިން ކާމިޔާބުކޮށްފައިވަނީ 13-0 ގެ ތަފާތު ބޮޑު ނަތީޖާ އަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ސްކޯޕިއަންސްގެ އަހްމަދު އަވީނެވެ.
ދެވަނަ މެޗުގައި ތޯރާ ބޯރާ އާއި ފެލިވަރު 25 ބައްދަލުކުރި އިރު މި މެޗު ތޯރާ ބޯރާއިން ކާމިޔާބުކުރީ 11-4 އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ތޯރާ ބޯރާގެ އިސްމާއީލެވެ.
ހިންނަވަރުގައި ބޭއްވޭ ފުޓްސެލް މުބާރާތް ތަކުން ޒުވާން ގިނަ ކުޅުންތެރިންގެ ހުނަރު ފެނިގެންދާއިރު ޅ އަތޮޅުގެ ރަށްރަށުގެ ޓީމުތަކާއި ރިސޯޓު ތަކުން އަންނަނީ މުބާރާތްތަކުގައި ބައިވެރިވަމުންނެވެ. އަދި މަޝްހޫރު ގިނަ ކުޅުންތެރިން މުބާރާތް ތަކުގައި ކުޅެއެވެ.
