ރައީސް އިބްރާހިމް މުހައްމަދު ސޯލިހު ރާއްޖޭގެ ވެރިކަމާއި ހަވާލުވަވަޑައިގެންނެވިިއިރު ރާއްޖެ އޮތީ ބޭރު ދުނިޔެއާ އެކަހެރިވެފައެެވެ. ބައިނަލްއަގްވާމީ މަސްރަހުގައި ރާއްޖޭގެ ނަން އޮތީ ކިލަނބުވެ، އެއްކޮށް އެކަހެރިވެފަ އެވެ.

އެ ސަބަބުތަކާއިހުރެ ރާއްޖެއަކީ ދުނިޔޭގެ މަޝްރަހުގައި ބަލައިގަންނަ ތަނަކަށް ހެދުމަށް ކުރަން ޖެހުނު މަސައްކަތްތައް ގިނައެވެ. އެކަމާއި ހަވާލުވެވަޑައިގަތީ ހާރިޖީ ދާއިރާގައި ގިނަ މަސައްކަތްތަކެއް ކުރައްވާފައިވާ އަބްދުﷲ ޝާހިދުއެވެ. ވަޒީރުކަމާއި ހަވާލުވެވަޑައިގަތް ފަހުން ބޭރުގެ ގައުމުތަކަށް އެމަނިކުފާނު ކުރައްވާ ދަތުރުފުޅުތައް އެހާމެ ގިނައެވެ. އެހާ ގިނައިން ބޭރަށް ދަތުރު ކުރައްވާތީ އަމާޒުވާ ފާޑު ކިޔުންތަށްވެސް މަދެއް ނޫނެވެ.

އެކަމަކު ހަގީގަތަކީ މިނިސްޓަރ ޝަހިދުގެ ދަތުރުފުޅުތަކުން ނިކުތް ނަތީޖާތައް ފޮނިވެފައި، އެހާމަ ޗާލުކަމެވެ. އެކަމުގެ ހުރިހާ ފައިދާއަކާއި، ފަސޭހައެއްވެސް ލިބިގެންގޮސްފައިވަނީ ދިވެހި ރައްޔިތު މީހާއަށް ކަމެވެ.

ސަރުކާރުގެ ފުރަތަމަ ސަތޭކަ ދުވަހު ފޮރިން މިނިސްޓްރީ އަށް ހަވާލުކޮށްފައިވަނީ ދިވެހިރާއްޖެ އަލުން އަނބުރާ ކޮމަންވެލްތުގައި ބައިވެރިވުމަށް ހުށައެޅުމެވެ. ކޮމަންވެލްތްގައި ބައިވެރިވުމުގެ މަސައްކަތް މިދިޔަ އަހަރު ޑިސެމްބަރު މަހު ފަށައި އެކަން ދަނީ ބާރަށް ކުރިޔަށެެވެ.

މިނިސްޓަރ ޝާހިދު އިސްކަންދެއްްވީ ހަމައެކަނި އެކަމަށް އެކަންޏެއް ނޫނުވެ. މިނިސްޓަރ ޝާހިދު ވިދާޅުވާ ގޮތުންނަމަ އެންމެ ބޮޑު މަގްސަދަކީ ރާއްޖެ ދުނިޔޭގެ މަޝްރަހުގައި ބަލައިގަންނަ ތަނަކަށް ހަދައި ގައުމުތަކާއިއެކު އޮންނަ ގުޅުން އިހަށްވުރެ ބަދަހި ކުރުމެެވެ.

މިނިސްޓަރ ޝާހިދު ވަނީ މިހާތަނަށް 81 ގައުމެއްގެ އެކި ފަންތީގެ މަންދޫބުންނާއި، 11 ގައުމެއްގެ ރައީސުންނާއި 13 ގައުމެއްގެ ބޮޑު ވަޒީރުންނާއި، 39 ގައުމެއްގެ ހަރިޖީ ވަޒީރުންގެ އިތުރުން 56 ގައުމެއްގެ ސަފީރުންނާ ބައްދަލުކުރައްވާފައެވެ.

ބައިނަލްއަގްވާމީ ޖަމިއްޔާތައް ކަމަށްވާ، އޯއައިސީ، އދ.ގެ ސެކެރެޓަރީ ޖެނެރަލުންނާއި ބައްދަލުކުރައްވާއި، އެ ޖަމިއްޔާތަކާއި އެކު އޮންނަ ގުޅުން ބަދަހި ކުރުމަށް އެމަނިކުފާނު ދަނީ ވަރަށް ބުރަކޮށް މަސައްކަތް ކުރައްވަމުންނެވެ. ކުރީގެ ރައީސް އަބްދުﷲ ޔާމިންގެ ސަރުކާރުގައި އދ. ސްޕެޝަލް ރެޕެޓުއާއިން ރާއްޖެ އައުން ހުއްޓުވާފައި އޮތް އޮތުން ނިމުމަކަށް ގެނެސް ރާއްޖެ ވަޑައިގަތުމުގެ ދައުވަތު ވަނީ އަރުއްވާފައެވެ.

އަންނަ އަހަރުވެސް ބައެއް ރެޕަޓަރުން ރާއްޖެއަށް ވަޑައިގަތުމަށް ވަނީ ހަމަޖެހިފައެވެ. ރާއްޖެއާ އެކު އީޔޫއާ އޮންނަ ގުޅުން ބަދަހިވެ ޔޫރަޕިއަން ކޮމިޝަންގެ ނައިބު ރައީސާ ފެޑެރީކާ މޮގެރީނީ ވަނީ ރާއްޖެއަށް ރަސްމީ ދަތުރުފުޅެއް ކުރައްވާފައެވެ. މިއީ އީޔޫގެ އިސްވެރިއަކު ރާއްޖެއަށް ދަތުރުފުޅެއް ކުރެއްވި ފުރަތަމަ ފަހަރެވެ.

ނިމުނު އަބްދުﷲ ޔާމީންގެ ސަރުކާރުން ހާރިޖީ ގުޅުންތައް ބަދަހިކުރަމުންގެންދިޔައީ ޗައިނާއާއެކު އެކަނިކަމަށް ބުނުމަކީ ދޮގަކަށް ނުވާނެ އެވެ. އެ ސަރުކާރުގެ ހާރިޖީ ސިޔާސަތުތަކުގެ ތެރެއިން އަވައްޓެރި ޤައުމުތައްވެސް އޮތީ ވަރަށް ބޮޑަށް އެކަހެރިކޮށްފަ އެވެ.

މިނިސްޓަރ ޝާހިދު، މިނިސްޓަރުކަމާއި ހަވާލުވެވަޑައިގެން އަވައްޓެރި ޤައުމުތަކާއެކު އޮންނަ ގުޅުންތައް ބަދަހިކުރުމަށް ހާއްސަ އިސްކަމެއްދެެއްވިއިރު، އޭގެ ސަބަބުން ދިވެހިންނަށް އެތަށް ލުއިތަކެއް ލިބިގެންގޮސްފައިވެއެވެ. އެގޮތުން އަވައްޓެރި ދެ ޤައުމުކަމަށްވާ އިންޑިއާ އާއި ލަންކާއާއިއެކު އޮންނަ ގުޅުން އިންތިހާއަށް ރަނގަޅުވެގެންގޮސްފައިވާއިރު، ދިވެހިންނަށް ވިސާ ލިބުމުގައި ދިމާވަމުންދިޔަ ދަތިތައް ވަނީ އެއްކޮށް ހައްލުވެފަ އެވެ.

އިންޑިއާއިން މިއިން ތާރީހެއްގައިވެސް ހިލޭ އެހީ ނުދޭ މިންވަރަށް ހިލޭ އެހީދީފައިވާއިރު، ދިވެހިނަށް ތަމްރީންގެ އެތަށް ފުރުސަތުތަކެއް ވަނީ ފަހިވެގެންގޮޮސްފަ އެވެ. ފިޔާފަދަ އަސާސީ ބާވަތްތައް ރާއްޖެއަށް ފޯރުކޮށްދިނުން ހުއްޓުމެއް ނެތި ކުރިއަށްގެންދެވެނީވެސް ދެ ޤައުމުގެ ދެމެދުގައި އޮންނަ ގުޅުން އިންތިހާއަށް ބަދަހިވެގެންގޮސްފައިވުމުގެ ސަބަބުންނެވެ.

މިދިޔަ އަހަރެއްހާ ދުވަހަކީ، ހާރިޖީ ދާއިރާއިން ރާއްޖެއަށް ވަރަށް ކާމިޔާބު އަހަރެއްކަން ރައީސް ސޯލިހު ވަނީ ވިދާޅުވެފައެވެ. ރައީސް ވިދާޅުވީ، ހާރިޖީ އަދި އަވަށްޓެރި ރަޙްމަތްތެރިކަން، އޭގެ ހަގީގީ މަގަށް އިއާދަކުރެވިއްޖެ ކަމަށެވެ. މިދިޔަ އަހަރެއްހާ ދުވަހުގެ ތެރޭގައި، ހިލޭ އެހީގެ ގޮތުގައި 3.21 ބިލިއަން ރުފިޔާ ރާއްޖެއަށް ލިބިފައިވާކަން އެމަނިކުފާނު ވަނީ ފާހަގަކުރައްވާފައެވެ.

ދިވެހިންނަކީ ބޭރުގެ ގައުމުތަކަށް އެކި ކަންތައްތަކުގައި ދަތުރުކުރާ ބަޔަކަށްވާއިރު، ފަސޭހަ ގޮތުގައި ވިސާ ލިބުން އެއީ މުހިއްމު ކަމަކަށް ޝާހިދު ދެކިވަޑައިގަތެވެ. އެމަނިކުފާނުގެ ދަތުރުފުޅުތަކުގެ ވީވަަރަކުން ގެންދެވީ ވިސާއާ ހޯދުމުގެ މަސައްކަތް ކުރައްވަމުންނެވެ.

ރަޝިޔާ، ތައިލެންޑް އަދި ޔޫއޭއީއަށްވެސް ފަސޭހަކަމާއެކު ވިސާއާއި ނުލައި ދިވެހިންނަށް މިހާރު ދަތުރުކުރެވެއެވެ. މިއީވެސް ޝާހިދު އެޤައުމުތަކަށް ވަޑައިގެން ކުރެއްވި ބުރަ މަސައްކަތުގެ ނަތީޖާއެވެ.

އަވަށްޓެރި ލަންކާއަށް ދެވޭހާ ފަސޭހައިން ޓިކެޓް ނަގައިގެން މިޤައުމުތަކަށް މިހާރު ދަތުރުކުރެވޭނެއެވެ. އެންމެ ފަހުން ޝާހިދު މޮރޮކޯ އަށް ކުރެއްވި ދަތުރުފުޅުގައި އެމަނިކުފާނު ވަނީ އަންނަ އަހަރު ފެބްރުއަރީ މަހުން ފެށިގެން ވިސާނެތި ދިވެހިންނަށް މޮރޮކޯއަށް ދަތުރު ކުރެވޭ ގޮތަށް ހަމަޖައްސާފައެވެ.

ރާއްޖޭއިން ބޭރުގައި އުޅޭ ދިވެހިންނަށް ދިމާވާ ކަންތައްތަކުގައި ފޮރިން މިނިސްޓްރީން ފޯރުކޮށްދޭ އެހީތައް މިވަނީ އަވަސްވެފައެެވެ. މިނިސްޓަރު ވިދާޅުވެފައިވާ ގޮތުން މިއަހަރު އެންމެ އިސްކަމެއްދޭ ކަންތަކުގެ ތެރޭގައި ބޭރުގައި ދިރިއުޅޭ ދިވެހިންނަށް ލުއި ފަސޭހަ ގޮތްތަށް ހޯދައިދިނުން ހިމެނޭއެވެ. ބޭރު ގައުމުތަކުގައި ހުންނަ ރާއްޖޭގެ އެމްބަސީން ދެމުންދާ ހިދުމަތްތައް އަވަސްވެ އޭގެ ސަބަބުން ދިވެހިންނަށް އެތައް ލުއިފަސޭހަތަކެއް ދަނީ ލިބެމުންނެވެ.

މި ހުރިހާ ކަމަކަށް މަގުފަހިވުމުގެ އަސްލަކީ ޝާހިދުގެ ވަރުގަދަ އުކުޅުތަކެެވެ. ސަރުކާރަށް އަހަރެއް ފުރޭއިރު ރާއްޖޭގެ ހާރިޖީ ދާއިރާ މިއޮތީ މެކުހަށް ޖަހާފައެވެ. ޝާހިދުގެ ކާމިޔާބީތަކާއި އެކު ރާއްޖެ މިވަނީ ބައިނަލްއަގްވާމީ މަސްރަހުގައި މީހުން ބަލައިގަންނަ ގައުމަކަށް ވެފައެވެ. ޝާހިދުގެ މަސައްކަތަށް ބަލާއިރު އެމަނިކުފާނަށް ދޭން ޖެހޭނީ ''އޭ ޕްލަސް'' އެކެވެ.