ޔާމީނު ސަރުކާރާއި ސޯލިހު ސަރުކާރުގެ ތަފާތު: ޔައުގޫބްގެ ދުލުން

ކުރީގެ ރައީސް އަބްދުﷲ ޔާމީންގެ ސަރުކާރާއި މި ސަރުކާރާއި ހާސްބައި ތަފާތޭ ކިޔާ އަޑުވެސް އަހަމުއެވެ. އެއްވެސް ތަފާތެއް ނެތޭ، އެއްވެސް ބަދަލެއް ނުފެނެއޭ ކިޔާ އަޑުވެސް އަހައެވެ. ގިނަ ބަޔަކު ދަނީ ކުރީ ސަރުކާރާއި މި ސަރުކާރުގެ ތަފާތަކީ ކޮބާތޯ ސުވާލު އުފައްދަމުންނެވެ. މިފަހަރު މި ސުވާލަށް ޖަވާބު ދެއްވީ ވެރިކަން ކުރާ މައިޕާޓީ އެމްޑީޕީއަށް ނިސްބަތްވާ، ދާންދޫ ދާއިރާގެ މެމްބަރު ޔައުގޫބް އަބްދުﷲ އެވެ.

ޔައުގޫބް ވިދާޅުވި ގޮތުގައި ކުރީ ސަރުކާރާއި މި ސަރުކާރާއި އޮތް ތަފާތުތައް ވަރަށް ގިނައެވެ. އޭގެ ތެރޭގައި ފަނޑިޔާރުން މަގާމުން ވަކި ކުރުމާއި ސަސްޕެންޑް ކުރުމުގައި ގެންގުޅުނު ނުވަތަ ގެންގުޅޭ އުސޫލްތަކުގެ ތަފާތެވެ. ޔައުގޫބް ވިދާޅުވީ ހުކުމުގެ ކުރިން ފަނޑިޔާރު ބަދަލުވުމަކީ އިއްތިފާގެއް ކަމަށާއި ނަމަވެސް ކުރިން ފަނޑިޔާރުން ބަދަލު ކުރީ އެއްވެސް އިޖުރާއަތަކާއި އުސޫލަކާއި އެއްގޮތަކަށް ނޫން ކަމަށެވެ.

އެގޮތުން ދާދިފަހުން ފެންމަތިވި ކްރިމިނަލް ކޯޓުގެ ގާޒީ އަހުމަދު ހައިލަމްގެ މައްސަލައަށް އަލިއަޅުއްވާލައްވާ މެމްބަރު ވިދާޅުވީ ގާޒީ ހައިލަމް ސަސްޕެންޑް ކުރެވުނީ އުސޫލުތަކާއި އިޖުރާއަތްތައް ފުރިހަމަ ކުރުމަށް ފަހު ކަމަށެވެ. ގާޒީ ހައިލަމް ސަސްޕެންޑް ކުވެނީ ކުރީގެ ރައީސް ޢަބްދުﷲ ޔާމީނުގެ މައްޗަށް ތުހުމަތު ކުރެވޭ މަނީލޯންޑަރިންގެ މައްސަލައިގެ ހުކުމް އިއްވުމުގެ ޝަރީއަތް އޮތް ދުވަހެވެ. އެ ދުވަހު ވަނީ ގާޒީ ހައިލަމް ސަސްޕެންޑް ކުރެވުމާއި ގުޅިގެން ހުކުމް އިއްވުމުގެ ޝަރީއަތް ފަސްކޮށްފައެވެ. ގާޒީ ހައިލަމް ވަނީ ޔާމީނު ޖަލަށްލުމަށް ހުކުމް އިއްވާނެ ކަމުގެ ކަށަވަރުކަން ދިނުމަށް ސަރުކާރުގެ އިސްމަގާމުތަކުގައި ތިބި ފަރާތްތަކުން އެދުނު ކަމަށް ވިދާޅުވެ ބަޔާނެއް ނެރުއްވާފައެވެ.

މި ކަމާއި ގުޅިގެން ވާހަކަ ދައްކަވަމުން ޔައުގޫބް ވިދާޅުވީ ސަސްޕެންޑް ކުރުމާއި ރައީސް ޔާމީންގެ ހުކުމަކާއި އެއްވެސް ގުޅުމެއް ނެތް ކަމަށެވެ.

ކުރީގެ ރައީސް ޔާމީންގެ ވެރިކަމުގައި ސިޔާސީ ބޭނުމަށްޓަކައި ސިޔާސީ ލީޑަރުން ޖަލަށް ލި މައްސަލަ އަށް އަލިއަޅުވާލަމުން ޔައުގޫބް ވިދާޅުވީ ރައީސް ޔާމީންގެ މައްސަލަ ބަލަމުންގެންދަނީ މަނީ ލޯންޑްރިންގް އާއި ކޮރަޕްޝަގެ ތުހުމަތުތަކެއް ކުރެވޭތީ ކަމަށެވެ. ކުރިން ކަންތައްތައް ކުރި ގޮތަށް ކަންތައްތައް ކުރާނަމަ މިހާރު ރައީސް ޔާމީން ހުންނަވާނީ ޖަލުގައި ކަމަށެވެ.

ސަރުކާރަށް އެއް އަހަރު މި ނޮވެމްބަރު މަހުގެ 17 ވަނަ ދުވަހު ފުރޭއިރު، ޔައުގޫބް ވިދާޅުވީ މި އެއްއަހަރު ތެރޭގައި މި ސަރުކާރަށް ކުރެވުނު އެންމެ ތަފާތު ކަމަކީ ރާއްޖެ ލާމަރުކަޒި ކުރުން ކަމަށެވެ.

ކޮންމެއަކަސް ކުރީ ސަރުކާރާއި މި ސަރުކާރުގެ ތަފާތަކީ ކޮބާތޯ ސުވާލު އުފައްދަމުން ދާ ފަރާތްތަކަށް ވަރުގަދަ ޖަވާބެއް މިވަނީ ޖަވާބެއް ދެއްވާފައެވެ.