ބަޖެޓް 2020: ބުރިޖް އެޅުމަށް 411 މިލިއަން، ގުޅީފަޅަށް ޕޯޓު ބަދަލުކުރުމަށް 247 މިލިއަން ރުފިޔާ
4 ނޮވެމްބަރު 2019 | ހޯމަ 07:15ބުރިޖް އެޅުމުގެ މަޝްރޫޢު ދިރާސާކުރުމުގެ މަސައްކަތް ދަނީ ކުރަމުން
ގުޅީފަޅު
މާލެ އާއި ވިލިނގިއްޔާއި ގުޅީފަޅު އަދި ތިލަފުށި ގުޅާލުމަށް ބުރިޖް އެޅުމުގެ މަސައްކަތް ފެށުމަށް 2020 ވަނަ އަހަރުގެ ބަޖެޓްގައި 411 މިލިއަން ރުފިޔާ ހިމަނައިފި އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ މި މަޝްރޫޢު ކުރިޔަށް ގެންދިޔުމަށް ކުރަންޖެހޭ ދިރާސާތަކުގެ މަސައްކަތް ކުރެވެމުންދާ ކަމުގަ އެވެ. މި ސަރަހައްދު ބުރިޖުން ގުޅާލުމުން ދަތުރުފަތުރު ފަސޭހަވެ، އިގްތިސޯދީ ގޮތުން ފައިދާ ކުރާނެކަމަށާއި މިހާރު މާލޭގައި ހުރި ގުދަންތައް، އިންޑަސްޓްރިއަލް ސަރަހައްދަށް ބަދަލުކޮށް، މުދާ އުފުލުމުގައިވެސް ފަސޭހަތައް ލިބޭނެ ކަމަށް ސަރުކާރުން ވަނީ މީގެ ކުރިން ހާމަކޮށްފައެވެ.
އަދި މިސަރަހައްދު ބްރިޖަކުން ގުޅާލައި ވިޔަފާރި ބަނދަރުގެ މަޝްރޫއު ފަށަން ބޭނުންވާ ފައިސާ ހޯދަން މިއަހަރު ބޭއްވި ޕާޓްނާޝިޕް ފޯރަމަށް ސަރުކާރުން ވަނީ ހުށަހަޅާފަ އެވެ. މިމަސައްކަތައް 488 މިލިއަން ޑޮލަރު (ގާތްގަނޑަކަށް 7.5 ބިލިއަން ރުފިޔާ) ބޭނުންވާ ކަމަށް ޕާޓްނާޝިޕް ފޯރަމްގައި ސަރކާރުން ވަނީ އިއުލާން ކޮށްފައެވެ.
މީގެއިތުރުން ބަޖެޓް ހުށަހަޅުއްވަމުން މިނިސްޓަރ ވިދާޅުވީ ރާއްޖޭގެ އިޤްތިސާދު އަހަރުން އަހަރަށް ކުރިއަރާފައިވާއިރު އަދި އިމްޕޯޓް ކުރާ މުދަލުގެ އަދަދު އެތައް ގުނައަކުން އިތުރުވަމުން ދިޔަނަމަވެސް މާލޭ ޕޯޓަށް ބޮޑު ބަދަލެއް ނާންނަތާ 30 އަށް ވުރެ ގިނަ އަހަރުވެއްޖެ ކަމަށެވެ. އެކަމުގެ ސަބަބުން މުދާ ބޭލުމަށާއި، މުދާ ގުދަން ކުރުމަށާއި ވިޔަފާރި ކުރާ ތަންތަނާއިހަމައަށް މުދާ ގެންދިއުމުގައި ޒަމާނާ ނުކިއްސަރު ގޮންޖެހުންތަކެއް ވިޔަފާރިތަކަށް ދިމާވަމުން އަންނަ ކަމަށް މިނިސްޓަރ ވިދާޅުވި އެވެ.
ގުޅީފަޅު ހިއްކުމަށާއި ޕޯޓް ތަރައްޤީކުރުމުގެ ޕްރޮޖެކްޓުތަކަށް 247 މިލިއަން ރުފިޔާ ވަނީ ބަޖެޓްގައި ހިމަނާފަ އެވެ.
