ޤަވާއިދާއި ޚިލާފަށް ލަންކާ ކަނޑުގެ ޞަރަޙައްދަށް ވަދެއުޅުނު އިންޑިއާ މަސްވެރިންތަކެއް ހައްޔަރުކޮށްފި
3 ނޮވެމްބަރު 2019 | އާދީއްތަ 10:54އިންޑިއާ 10 މަސްވެރިން އަތުލައިގަތީ ސްރީލަންކާ ހުޅަނގު އުތުރު ކަނޑުގެ ޞަރަޙައްދުން
ސްރީލަންކާ ކަނޑުގެ ޞަރަހައްދުން ހިފެހެއްޓި ސްރީލަންކާ މަސްވެރި އުޅަނދު
ސްރީލަންކާގެ ކަނޑުގެ ޞަރަޙައްދުގައި ޤާނޫނާއި ޚިލާފަށް މަސްވެރިކަން ކުރަން އުޅުނު އިންޑިއާގެ 10 މަސްވެރިއަކު ސްރީލަންކާ ކަނޑުގެ އަސްކަރިއްޔާއިން ހައްޔަރުކޮށްފިއެވެ.
ސްރީލަންކާ ކަނޑުގެ އަސްކަރިއްޔާއާއި ޙަވާލާދީ ސްރީލަންކާ ނޫސްތަކުން ރިޕޯޓްކުރާގޮތުގައި އިންޓަރނޭޝަނަލް މެރިޓައިމް ބައުންޑަރީ ނުވަތަ ބައިނަލް އަޤުވާމީ ޤާނޫނުތަކުން ސްރީލަންކާގެ ކަނޑުގެ ޞަރަޙައްދުގެގޮތުގައި ކަނޑައަޅާފައިވާ ޞަރަޙައްދަށް ވަދެ އުޅެނިކޮށް ހައްޔަރުކޮށްފައިވަނީ އިންޑިއާގެ ދެކުނު ޓެމިލްނާޑޫ ސްޓޭޓަށް ނިޞްބަތްވާ މަސްވެރިންނެވެ.
ސްރީލަންކާގެ ނޮދަން ނޭވަލް ކޮމާންޑަށް ލިބުނު މަޢުލޫމާތުގެ އަލީގައި އެޤައުމުގެ ކޯސްޓްގާޑުން ޕެޓްރޯލް ކުރަމުންދަނިކޮށް އިންޑިއާގެ 10 މަސްވެރިންނާއި މަސްވެެރި ދެއުޅަނދެއް އަތުލައިގަތީ ސްރީލަންކާގެ ހުޅަނގު އުތުރު ކަނޑުގެ ޞަރަޙައްދުން، ޑެލްފްތް އައިލޭންޑް ކައިރިންނެވެ.
ސްރީލަންކާ ކަނޑުގެ އަސްކަރިއްޔާގެ ބެލުމުގެ ދަށުގައި ތިބި އިންޑިއާ މަސްވެރިން، އެމީހުންގެ ޞިއްހީގޮތުން ހަދަން ޖެހޭ ޓެސްޓުތައް ހެދުމަށްފަހު ސްރީލަންކާގެ ޖަފްނާގެ މަސްވެރިކަމާބެހޭ އިދާރާއާއި ޙަވާލުކުރާނެކަމަށް ސްރީލަންކާ ކަނޑުގެ އަސްކަރިއްޔާއިން ބުނެއެވެ.
