ޝަހީދުގެ ޝަރުތުގެ މައްސަލަ ނުބަލާގޮތަށް ކޮމެޓީން ނިންމައިފި
30 އޮކްޓޯބަރު 2019 | ބުދަ 11:48ޝަހީދު މަގާމަށް އައްޔަން ކުރައްވާފައި ވަނީ 2015 ވަނަ އަހަރުގެ ނޮވެމްބަރު މަހު، 18 ވަނަ ރައްޔިތުންގެ މަޖިލީހުން
ސީއެސްސީގެ ނާއިބު ރައީސް ޝަހީދު މުހައްމަދު، މަޖިލީހުގެ ކޮމެޓީގައި
ސިވިލް ސަރވިސް ކޮމިޝަން (ސީއެސްސީ)ގެ ނައިބް ރައީސް ޝަހީދު މުހައްމަދުގެ މަގާމުގެ ޝަރުތު ފުރިހަމަ ނުވާކަމަށް ބުނެ، މަގާމުން ވަކިކުރުމުގެ މަސައްކަތް ކުރިއަށް ނުގެންގޮސް، އެކޮމިޝަނުގައި ހިމެނޭ ހަތަރު މެމްބަރުންގެ މައްސަލަ ބެލުމަށް މަޖިލީހުގެ މިނިވަން މުއައްސަސާތަކާބެހޭ ކޮމެޓީން ނިންމައިފި އެވެ.
މިނިވަން މުއައްސަސާތަކާބެހޭ ކޮމެޓީން ބުދަ ދުވަހު ބޭއްވި ބައްލުވުމުގައި އެކޮމެޓީން އެގޮތަށް ނިންމީ، ޝަހީދު އައްޔަން ކުރަން ފާސްކޮށްފައިވަނީ އޭރު ހިނގަމުންދިޔަ 18 ވަނަ ރައްޔިތުންގެ މަޖިލީހުން ކަމަށާއި، އެއީ މަޖިލީހުގެ މައްސަލައެއް ކަމަށެވެ. ނަމަވެސް އެމަގާމަށް ޝަހީދު ކުރިމަތި ލެއްވުމަކީ އެއީ ޝަހީދުގެ ނަޒާހަތްތެރިކަމުގެ މައްސަލައެއް ކަމަށެވެ.
އެހެންކަމުން ކޮމެޓީން ނިންމީ، މަގާމުގެ ޝަރުތު ފުރިހަމަ ނުވެ، ސީއެސްސީއަށް ޝަހީދު އައްޔަންކުރި މައްސަލަ ނުބަލަން ނިންމާފަ އެވެ. އެހެންނަމަވެސް ޝަހީދުވެސް ހިމެނޭގޮތަށް އެކޮމިޝަނުގެ ހަތަރު މެމްބަރެއް މަގާމުގެ ނުފޫޒު ބޭނުންކޮށްގެން ހިންގާފައިވާ ކަމަށްބުނާ މައްސަލަތަކެއް އެކޮމެޓީން ބަލަމުންދާތީ އެމައްސަލަތައް ވީހާވެސް އަވަހަކަށް ނިންމުމަށް ކޮމެޓީން ވަނީ ނިންމާފަ އެވެ.
އެގޮތުން އެމައްސަލަތައް ބަލަމުންދާ މިނިވަން މުއައްސަސާތަކާބެހޭ ކޮމެޓީގެ ކުޑަ ކޮމެޓީން އެމައްސަލަތައް އަންނަ ހަފްތާގައި ނިންމުމަށްފަހު، އެކޮމެޓީގެ ރިޕޯޓް ފޮނުވުމަށް ވެސް މިނިވަން މުއައްސަސާތަކާބެހޭ ކޮމެޓީން ވަނީ ނިންމާފަ އެވެ.
ޝަހީދު ޝަރުތު ފުރިހަމަ ނުވާކަމަށް ފާހަގަވީ ވެސް، މަޖިލީހަށް ހުށަހެޅިފައިވާ ސިވިލް ސާވިސް ކޮމިޝަނުގެ މައްސަލަތަކެއް މަޖިލީހުގެ މިނިވަން މުއައްސަސާތަކާބެހޭ ކޮމެޓީން ހޮވާފައިވާ އެ ކުޑަ ކޮމެޓީން އެމައްސަލަ ދިރާސާ ކުރަމުންދަނިކޮށެވެ.
ސީއެސްސީ ގާނޫނުގައި ބުނާ، ކޮމިޝަނުގެ މެންބަރުންގައި ހުރުން ލާޒިމުވާ ސިފަތަކުގެ ތެރެއިން، ފުރަތަމަ ޑިގްރީ ފެންވަރަށް ތައުލީމު ހާސިލުކުރުމަށްފަހު، ސަރުކާރުގައި ނުވަތަ ސަރުކާރު ނޫން ފަރާތެއްގައި ހިންގުމުގެ ދާއިރާގައި މަދުވެގެން 10 އަހަރު ހިދުމަތްކޮށްފައި ބޭފުޅަކަށް ވާންޖެހޭނެ ކަމަށް ބުނާ ޝަރުތު، ޝަހީދުގެ ފުރިހަމަ ނުވާ ކަމަށް ކުޑަ ކޮމެޓީން ފޮނުވި ލިޔުމުގައި ވެއެވެ.
ސިވިލް ސާވިސް ކޮމިޝަނުގެ މެމްބަރެއްގެ ގޮތުގައި ޝަހީދު އައްޔަން ކުރައްވާފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2015 ވަނަ އަހަރުގެ ނޮވެމްބަރު މަހުގެ 29 ވަނަ ދުވަހުއެވެ. އަދި ސިވިލް ސަރވިސް ކޮމިޝަނުގެ ނައިބް ރައީސްގެ މަގާމަށް އޭނާ އައްޔަންކޮށްފައިވަނީ 2017 ވަނަ އަހަރުގެ އޮކްޓޯބަރުމަހުގެ 10 ވަނަ ދުވަހުއެވެ.
ސިވިލް ސަރވިސް ކޮމިޝަނުގެ ނާއިބު ރައީސްގެ މައްސަލައެއް ފެންމަތިވެފައިވާއިރު، ސީއެސްސީގެ ރައީސް ޑރ. އަލީ ޝަމީމު ވަނީ މިދިޔަ ރިޔާސީ އިންތިހާބުގެ ކެމްޕެއިން ދުވަސްވަރު، ރައީސް ޔާމީންގެ ކެމްޕެއިން ހަރަކާތްތަކުގައި ބައިވެރިވެވަޑައިގަންނަވާފަ އެވެ.
