ޝިމާ ގެއްލުމުމުގެ މައްސަލަ: ލ. އަތޮޅުގައި ފުލުހުންގެ މަސައްކަތްތަކެއް ކުރަމުން އެބަގެންދޭ
29 އޮކްޓޯބަރު 2019 | އަންގާރަ 07:58ޝިމާ ގެއްލުނު ކަމަށް ބުނަނީ ދަތުރުކުރި ޑިންގީ ބަންޑުން ޖަހާލައިގެން ކަމަށް
އުމުރުން 19 އަހަރުގެ އައިމިނަތު ޝިމާ ނާފިޒު
ޑިންގީއެއް ބަންޑުން ޖަހާލުމާ ގުޅިގެން އުމުރުން 19 އަހަރުގެ އައިމިނަތު ޝިމާ ނާފިޒު ގެއްލިފައިވާ ކަމަށްބުނާ މައްސަލާގައި، ޝިމާ ގެއްލުނު ސަރަހައްދު ބަލަމުންދާ ކަމަށް ފުލުހުން ބުނެފި އެވެ.
ރާއްޖެއެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް އަންގާރަ ދުވަހު ވިދާޅުވީ، ޝިމާ ގެއްލުމު މައްސަލާގައި ލ. އަތޮޅުގައި ފުލުހުން މަސައްކަތްތަކެއް ކުރަމުންދާ ކަމަށެވެ. މިމައްސަލައިގެ ތަހުގީގު އަލުން ފަށާފައިވާއިރު މިހާތަނަށް ޝިމާ އެއްވެސް ނިޝާނެއް ފެނިފައެއް ނުވެއެވެ. އަދި ޝިމާ ހޯދުމުގެ މަސައްކަތް ފުލުހުން އަލުން ފަށާފައިވަނީ ކޮން ސަބަބަކާއި ހުރެކަމެއް އަދި އެކަމުގެ އިތުރު ތަފްސީލެއް ފުލުހުން ހާމައެއް ނުކުރެއެވެ. އެހެންނަމަވެސް ލ އަތޮޅުގައި ޝިމާ ހޯދަމުގެ މަސައްކަތެއް ކުރަމުންދާކަމަށް ފުލުހުންގެ މީޑިއާ އޮފިޝަލް ވިދާޅުވި އެވެ.
ފުލުހުން ބުނީ ޝިމާ ގެއްލުނު މައްސަލާގައި މިހާތަނަށް މާބޮޑު ކުރިއެރުމެއް ލިބުފައިނުވާ ކަަމަށާއި އެހެންކަމުން ޝައްކު ކުރެވޭ ކަމެއް ނުވަތަ މައުލޫމާތެއް ލިބުނަސް އެކަމެއްގައި ހަގީގަތް އެކުލެވޭތޯ ބަލަމުންދާ ކަމަށެވެ.
އެގޮތުން، މީގެ ހަ މަސްދުވަސް ކުރިންވެސް ފުލުހުން ވަނީ ޝިމާ ގެއްލުނު މައްސަލާގައި ދެ ރަށެއް ބަލާފާސްކޮށްފަ އެވެ.
މިދިއަ އޭޕްރީލް މަހުގެ 22 ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމެއްގައި އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ފައިރޫޝް ވިދާޅުވެފައި ވަނީ، ޝިމާ ރޯކޮށްލާފައިވާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން ގއ. އަތޮޅުގެ ދެ ފަޅުރަށެއް ބަލައި ފާސްކޮށްފައިވާ ކަމަށާއި، ޝިމާގެ ކޭސްގައި ލީޑްއަކަށް ނެގޭނެ ފަދަ އެއްވެސް ވަރުގަދަ ހެއްކެއް މިހާތަނަށް ލިބިފައިނުވާ ކަމަށެވެ.
އޭގެ އިތުރުން، މި މައްސަލާގައި މިހާތަނަށް މުޅި ލ. އަތޮޅު ބެލިފައިވާ ކަމަށާއި، މިހާތަނަށް އެއްވެސް ލީޑެއް ފެނިފައިނުވާ ކަމަށް ވެސް އޭނާ ވިދާޅުވިއެވެ.
އުމުރުން 19 އަހަރުގެ ޝިމާ ގެއްލިފައި ވަނީ ފެބުރުއަރީ މަހުގެ 22 ވަނަ ދުވަހު އެވެ. އޭނާ ގެއްލުނީ ލ. ކައްދޫއިން ފުރައިގެން އެއަތޮޅު މާމެންދޫއަށް ޑިންގީ އެއްގައި ދަތުކުރަމުން ދަނިކޮށް ޑިންގީ ބަންޑުން ޖަހާލައިގެން ކަމަށް ޝިމާއާ އެކުގައި ޑިންގީގައި ދަތުރުކުރި ފަޒީލް ބުނެފައި ވެއެވެ. އޭގެ އިތުރުން، ޝިމާ ގެއްލުނު ހާދިސާ އަށް ފަހު، އޭނާގެ ކޮއްކޮ ގޮވައިގެން މޫނު ނިވާކޮށް ޑިންގީއެއްގައި ފިލަން އުޅެނިކޮށް ހައްޔަރުކުރި މީހުންގެ ތެރޭގައި ފަޒީލް ވެސް ހިމެނޭ އިރު، އެ މައްސަލަ ފުލުހުން ވަނީ ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައެވެ. އަދި މި ދެ މައްސަލައިގައި ގުޅުމެއް އޮތް ކަމަށް މިހާތަނަށް ކުރި ތަހުޤީޤުން ނުފެންނަ ކަމަށް ވެސް ފައިރޫޝް ވިދާޅުވިއެވެ.
ޝިމާ ގެއްލުނު ހާދިސާއާ ގުޅިގެން އޭޕްރީލް މަހު ފުލުހުން ހާމަކޮށްފައިވާ މައުލޫމާތުތަކަށް ބަލާއިރު، 17 ރަށެއް ބަލައި ފާސްކޮށްފައިވެއެވެ. އަދި މި މައްސަލައާ ގުޅިގެން 46 މީހެއްގެ ބަޔާން ނަގާފައިވާ ކަމަށާއި، ވައިގެ މަގުން 10 މޭލުގެ ރޭޑިއަސްއެއް ކަނޑައަޅައި ބަލާފައިވާނެ ކަމަށް ފުލުހުން މައުލޫމާތުދެއެވެ. އަދި ކަނޑުގެ މަގުންވެސް 1900 އަކަ ކިލޯ މީޓަރުގެ ސަރަހއްދެއް ބަލާފައިވާއިރު، މި މައްސަލަ ޕީޖީ އޮފީހަށް ފޮނުވުމުގެ ކުރިން ފުލުހުން އަދިވެސް ތަހުޤީޤުކޮށް ކަށަވަރުކުރަން ބޭނުންވާ ކަންކަން ހުރި ކަމަށް ފުލުހުން މައުލޫމާތުދެއެވެ.
