ބ. ހިބަޅިދޫ މައްސަލާގައި ފަނޑިޔާރުން ރިޝްވަތަށް އެދުނުކަމުގެ ތުހުމަތުކޮށްފައިވާތީ, އެކަން ރައްޔިތުންގެ މަޖިލީހުގެ ޖުޑީޝަރީ ކޮމެޓީން ބަލަން ފަށައިފި އެވެ.

ޖުޑީޝަރީ ކޮމެޓީން ހޯމަ ދުވަހު ބޭއްވި ބައްދަލުވުމުގައި އެކޮމެޓީގެ މުޤައްރިރު އިމްތިޔާޒު ފަހުމީ ވިދާޅުވީ ޓޫރިސްޓް ރިސޯޓެއް ތަރައްޤީ ކުރުމަށް ދޫކުރި، ބ. ހިބަޅިދޫ އެގްރީމަންޓް ކުރީގެ ރައީސް ޢަބްދުﷲ ޔާމީނުގެ ސަރުކާރުން ބާޠިލުކުރި މައްސަލާގައި، ހައިކޯޓުގައި އިސްތިޢުނާފު ކުރުމުން ހައިކޯޓުގައި އެމައްސަލަ ބެއްލެވި ފަނޑިޔާރުން ރިޝްވަތު ހުށަހެޅުއްވި ކަމަށް ބުނާ މައްސަލައެއް ޓޫރިޒަމް މިނިސްޓްރީން މަޖިލީހުގެ މާލިއްޔަތު ކޮމެޓީއާ ޙިއްސާކޮށްފައިވާ ކަމަށެވެ. އެހެންކަމުން އެ މައްސަލަ މާލިއްޔަތު ކޮމެޓީން ޖުޑީޝަރީ ކޮމެޓީއަށް ފޮނުވާފައިވާ ކަމަށް އިމްތިޔާޒު ފަހުމީ ވިދާޅުވި އެވެ.

ހޯމަ ދުވަހު ބޭއްވި ޖުޑީޝަރީ ކޮމެޓީން ވަނީ އެމައްސަލަ ނިންމުމުގެ ސުންގަޑި އަކީ އަންނަ ހަފުތާގެ ހޯމަ ދުވަސްކަމަށް ކަނޑައަޅާފަ އެވެ.

އެމައްސަަލަ އެންމެ ފުރަތަމަ ފެންމަތިވީ، މިމަހުގެ 15 ވަނަ ދުވަހު މާލިއްޔުތު ކޮމެޓީން ޓޫރިޒަމް މިނިސްޓަރު އަލީ ވަހީދުއާއެކު ބޭއްވި ބައްދަލުވުމުގައި، ރާއްޖޭގެ ޖުޑީޝަރީ އިޞްލާޙު ކުރުން އަވަސް ކޮށްދެއްވުމަށާއި، ފަނޑިޔާރުން ރިޝްވަތު ނަންގަވާކަމަށް ޢަލީ ވަހީދު ކުރެއްވި ތުހުމަތާއި ގުޅިގެން ނެވެ. އެ ކޮމެޓީގެ ބައްދަލުވުމުގައި ޢަލީ ވަހީދު ވަނީ ރައީސް ޔާމީނުގެ ސަރުކާރުން ހިބަޅިދޫ އެގްރީމަންޓް ބާޠިލުކުރުމުން، ސިވިލް ކޯޓުން ނިންމި ނިންމުން ހައިކޯޓުގައި އިސްތިޢުނާފް ކޮށްފައިވަނިކޮށް، ހިބަޅިދޫ ލިބިފައިވާ ކުންފުނި ބޭނުންވާ ގޮތަށް ފައިސާ ދެނިކޮށް، މައްސަލަ ނިންމާދެވިދާނެ ކަމަށް ފަނޑިޔާރުން ބުނެފައިވާ ކަމަށެވެ.

މާލިއްޔަތު ކޮމެޓީގެ އެދުމުގެ މަތިން ޓޫރިޒަމް މިނިސްޓްރީން ވަނީ އެކޮމެޓީއަށް ލިޔުމެއް ފޮނުވާފަ އެވެ. ނަމަވެސް އެލިޔުމުގައި، ރިޝްވަތު ހުށަހެޅުއްވި ފަނޑިޔާރެއް، ނުވަތަ ރިޝްވަތު ހުށަހެޅުއްވި ބައެއްގެ ނަމެއް ހާމަ ކޮށްފައެއް ނުވެއެވެ.

"އޮފީހަށް އައިސް ވަކިވަރަކަށް ފައިސާ ހަމަޖައްސަވާފި ނަމަ އަޅުގަނޑު ބޭނުންވާ ދުވަހަކު، ބޭނުންވާ ގޮތަކަށް މައްސަލަ ނިންމި ދާނެ ކަމަށް، އެމީހުންނަކީ ސީދާ ފަނޑިޔާރުންގެ ފަރާތުން އައިސްތިބި ބައެއް ކަމަށާއި، އެމީހުންގެ ޝަރުތުތަކަށް އެއްބަސްވާނަމަ ރާއްޖެއިން ބޭރުގައި އަޅުގަނޑު ހަމަޖައްސާ ގޮތެއްގެ މަތިން، ސީދާ ފަނޑިޔާރުންނާ ބައްދަލު ކުރެވިދާނެ ކަމަށް ބުނެފައިވޭ،" ޓޫރިޒަމް މިނިސްޓްރީން ކޮމެޓީއާ ހިއްސާކޮށްފައިވާ ލިޔުމުގައިވެއެވެ.

އެ މައްސަލަ ފެންމަތިވެފައި ވަނިކޮށް، އާދިއްތަ ދުވަހު ހައިކޯޓުން ވަނީ ހިބަޅިދޫގެ މައްސަލާގައި ފަނޑިޔާރުން ރިޝްވަތު ހުށަހެޅި ކަމަށްބުނާ މައްސަލަ ތަހުގީގު ކޮށްދިނުމަށް ފުލުހުންގެ އިދާރާއަށް ހުށަހަޅާފަވާ ކަމަށް ބުނެފަ އެވެ.

އާދިއްތަ ދުވަހު ހައިކޯޓުން ނެރެފައިވާ ބަޔާނެއްގައި ބުނީ، އެކަން ބަލައި ދިނުމަށް، ޕޮލިސް ގައި އެދުނީ، އެއީ ސީރިއަސް މައްސަލައެއް ކަމަށް ފެންނާތީ ކަމަށެވެ.

ފަނޑިޔާރުންގެ ފަރާތުން ކަމަށްބުނެ، މައްސަލަ ވަކިގޮތަކަށް ނިންމުމަށް ރިޝްވަތު ހޯދުމަށް އެދި ގޮސްފައިވަނީ ކޮންބައެއްތޯއާ، ނޭނގޭ ބަޔަކު ކަމަށް ބުނެ ގުޅި ފަރާތްތަކުގެ ފޯން ނަންބަރުތަކަކީ ކޮބައިތޯ އަދި އޭރުގެ ޓުއަރިޒަމް މިނިސްޓަރުގެ ޚަރަދުގައި ދަތުރު ކުރެއްވި ފަނޑިޔާރުންނަކީ ކޮބައިތޯ ބައްލަވައި ދެއްވައި، އެކަމުގެ ފުރިހަމަ ތަހުގީގެއް ކޮށްދިނުމަށް ހައިކޯޓުން ވަނީ އެދިފައެވެ.

ބ. ހިބަޅިދޫ އަކީ ރިސޯޓް ހަދަން އެރަށް ދޫކޮށްފައި ވަނިކޮށް އެތަނުން ހަނގުރާމަވެރި ހަތިޔާރާއި ގޮވާތަކެތި ފެނުނުރަށެވެ. އެމައްސަލަ ފެންމަތިވީ ރައީސް ޢަބްދުﷲ ޔާމީން އަވަހާރަކޮށްލަން ސެޕްޓެމްބަރު، 2015 ގައި ރިޔާސީ ލޯންޗްކޮޅުގައި އެއްޗެއް ގޮއްވާލި މައްސަލައިގެ ތަހުޤީޤު ތެރެއިންނެވެ. އޭރުއްސުރެ އެތަން އޮންނަނީ ފުލުހުންގެ ބެލުމުގެ ދަށުގައެވެ. ހަތިޔާރު ފެނުނު ކަމަށް ބުނެ ސަރުކާރުން އެރަށް ދޫކުރުމަށް ބިޒްނާސް މޯލްޑިވްސްއާ އެކު ހަދާފައިވާ އެއްބަސްވުން އުވާލުމާއެކު އެ ކުންފުނިން ސިވިލް ކޯޓަށް މައްސަލަ ހުށައެޅިއެވެ. އަދި 2017 ޖެނުއަރީ ގައި އެ ކޯޓުން ނިންމީ އެރަށުގެ އެއްބަސްވުން ބާޠިލުކުރީ ޤާނޫނާ ޚިލާފަށް ކަމަށާއި އެރަށް ބިޒްނާސް މޯލްޑިވްސްއާ ޙަވާލުކުރަން ޖެހޭ ކަމަށެވެ.

ނަމަވެސް އެ ޙުކުމް ދައުލަތުން ހައިކޯޓުގައި އިސްތިޢުނާފު ކޮށްފައިވާއިރު ސިވިލް ކޯޓުގެ ޙުކުމާ އެއްގޮތަށް އަލުން އެރަށް ބިޒްނާސް މޯލްޑިވްސްއާ ޙަވާލު ކޮށްފައެއް ނުވެއެވެ.

ހިބަޅިދޫ މައްސަލަ މިހާރު އޮތީ، ސުޕްރީމް ކޯޓުގަ އެވެ.