އިރާޤު ސަރުކާރާއި ދެކޮޅަށް އެޤައުމުގެ ރައްޔިތުން ކުރަމުންދާ މުޒާހަރާތަކުގައި ދެހާހަށްވުރެ ގިނަ މީހުން ޒަޚަމްވެއްޖެއެވެ.
އަލްޖަޒީރާ ނޫހުން ރިޕޯޓުކުރާގޮތުގައި ވެރިރަށް ބަޣްދާދުގެ އިތުރުން އިތުރު ސިޓީތަކުގައިވެސް މިހާރުވަނީ މުޒާހަރާ ފަށާފައެވެ. އެ ޤައުމުގެ ހިއުމަން ރައިޓްސް ކޮމިޝަނާއި ހަވާލާދީ އަލްޖަޒީރާއިން ރިޕޯޓުކުރާގޮތުގައި މުޒާހަރާގައި ހިނގި ތަފާތު އެކި ޙާދިސާތަކުގައި ތިރީސް މީހުން ވަނީ މަރުވެފައެވެ.
މުޒާހަރާ ކުރާތާ އިއްޔެއަށް ތިން ހަފުތާވެފައި ވާއިރު އެ ޤައުމުގެ ރައްޔިތުންދަނީ އިރާޤު ސަރުކާރުތެރޭގައި ކުރަމުންދާ ކޮރަޕްޝަންގެ ޢަމަލުތަކާއި ދެކޮޅަށް އަޑުއުފުލަމުންނެވެ. އެގޮތުން ވަޒީފާ ނެތިފައި ގިނަ ބަޔަކު ތިބެން ޖެހުމާއި، އާއްމު ޚިދުމަތްތައް ފޯރުކޮށްދިނުމުގައި ސަރުކާރު ފެއިލްވެފައިވާތީ މުޒާހަރާގެ ބައިވެރިން ދަނީ ސަރުކާރަށް ފާޑުކިޔާ އެކަންކަން ހަމަ މަގަށް އަޅުވަން ގޮވާލާފައެވެ.
މުޒާހަރާ ވަރުގަދަވެ ޢާއްމު ދިރިއުޅުމަށް ބުރޫ އަރަންފެށުމުން ސަމާލަތީ ބާރުތަކުން ނިކުމެ މުޒާހަރާ ރުޅާލަން ކުރި މަސައްކަތުގައި،މުޒާހަރާގެ ބައިވެރިންނާއި ސަލާމަތީ ބާރުތަކާއި ދެމެދު ހިނގާދިޔަ ކުރިމަތިލުންތަކުގައި ދެހާހަށްވުރެ ގިނަ މީހުން ޒަޚަމްވިކަމަށް ޚަބަރު ލިބެއެވެ. މުޒާހަރާ ރޫޅާލުމަށް ފުލުހުން ބޭނުންކުރީ ރަބަރު އުންޑައާއި ވޯޓަރ ކެނަންކަމަށް ބައިނަލް އަޤުވާމީ މީޑިއާތަކުން ރިޕޯޓުކުރެއެވެ.
