އެމްއެމްޕީއާރުސީގެ ހިޔާނާތުގައި ބައިވެރިވި ފުލުހުންތަކެއްގެ މައްސަލަ ތަހުގީގުކުރަނީ
މި މައްސަލަ މި މަހުގެ 13 ވަނަ ދުވަހުން ފެށިގެން ފުލުހުންގެ ޕްރޮފެޝަނަލް ސްޓޭންޑަރޑްސްއިން ދަނީ ތަހުގީގުކުރަމުން
ފުލުހުންތަކެއް | ޕޮލިސް
މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ގެ ހިޔާނާތުގެ މައްސަލައާއި ގުޅުންހުރި މައްސަލައެއްގައި ފުލުހުންތަކެއް ބައިވެރިވި މައްސަލައެއް ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުން ތަހުގީގުކުރަން ފަށައިފިއެވެ.
ފުލުހުން ނެރުނު ސްޓޭޓްމެންޓްގައި ބުނެފައިވަނީ އެމްއެމްޕީއާރުސީގެ ހިޔާނާތުގެ މައްސަލައާއި ގުޅުންހުރި މައްސަލައެއްގައި ފުލުހުންތަކެއް ބައިވެރިކަމުގެ ތުހުމަތުގައި މި މަހުގެ 13 ވަނަ ދުވަހުން ފެށިގެން ފުލުހުންގެ ޕްރޮފެޝަނަލް ސްޓޭންޑަރޑްސްއިން ތަހުގީގުކުރަމުންދާ ކަމަށެވެ.
ފުލުހުން ބުނީ މި މައްސަލައިގެ ތަހުގީގު މިހާރު ކުރިއަށްދާތީ މި މައްސަލައިގައި ޝާމިލްވާ ފުލުހުންގެ ސީދާ އަދަދު މިވަގުތު ހާމަކުރަން ދަތި ކަމަށެވެ. ނަމަވެސް ފަހުގެ ތާރީހެއްގައި މި މައުލޫމާތު ދޭނެކަމަށް ފުލުހުން ބުނެއެވެ. އަދި ތަހުގީގުކުރެވޭ ފުލުހުންގެ ތެރޭގައި އެކި ގިންތީގެ ފުލުހުން ހިމެނޭ ކަމަށާއި، މީގެ ތެރެއިން ފުލުހުންގެ ނަން ކޮމިޝަންޑް އޮފިސަރުންނާއި، ކޮމިޝަންޑް އޮފިސަރުން އަދި އެގްޒެކްޓިވް ލެވެލްގެ ފުލުހުން ވެސް ހިމެނޭ ކަމަށް ފުލުހުން ބުނެއެވެ.
އެމްއެމްޕީއާރުސީގެ ބޮޑ ހިޔާނާތުގެ މައްސަލައާއި ގުޅިގެން ފުލުހުންތަކެއް ސަސްޕެންޑްކުރި އިރު، ޕްރޮސެކިއުޓާ ޖެނެރަލް އައިޝަތު ބިޝާމް ވަނީ މި ހިޔާނާތުގެ މައްސަލައިގައި ފަނޑިޔާރުންނާއި ސަރުކާރުގެ އިސްފަރާތްތަކާއި އަދި މަޖިލިސް މެންބަރުންތަކެއްގެ ތަހުގީގުކުރެވެމުންދާކަމަށް ވިދާޅުވެފައެވެ.
އޭސީސީން ތަހުގީގުކުރި އެމްއެމްޕީއާރުސީގެ 1.3 ބިލިއަން ރުފިޔާގެ ހިޔާނާތުގެ ރިޕޯޓުގައިވާ ގޮތުން އެމްއެމްޕީއާރުސީ މެދުވެރިކޮށް ދޫކޮށްފައިވާ ރަށްތަކާއި ފަޅުތަކުގެ ގޮތުގައި ހިމެނޭ 57 ތަން ކުއްޔަށް ދީގެން އެކުއިޒިޝަން ކޮސްޓްގެ ގޮތުގައި ޖުމްލަ ހަތްދިހަ ހަތް މިލިއަން ފަސްލައްކަ ފަސްހާސް އެމެރިކާ ޑޮލަރު އެ ކުންފުންޏަށް ލިބެންޖެހޭއިރު އެ ފައިސާގެ ތެރެއިން އެމްއެމްޕީއާރުސީއަށް ވަދެފައިވަނީ ހަމައެކަނި ބާރަ މިލިއަން ފަސްލައްކަ އެމެރިކާ ޑޮލަރު ކަމަށެވެ.
