އޮނަރަރީ ކައުންސިލް ސްކޮލަރޝިޕް ތައާރަފްކުރުމުގެ މަޝްވަރާ ފޮރިން މިނިސްޓްރީން ކުރިޔަށް ގެންދާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި، ދިވެހި ޒުވާނުންނަށް ތައުލީމީ ފުރުސަތުތައް ހޯދައިދިނުމަށް ފޮރިން މިނިސްޓްރީން ރާވާފައިވާ ކަންތައްތަކާއި ބެހޭގޮތުން މައުލޫމަތު ދެއްވަމުން މިނިސްޓަރ ޝާހިދު ވިދާޅުވީ ޒުވާން ކިޔާވާ ކުދިންގެ އާބާދީ އިތުރު ވަމުންދާކަމަށާއި ރައީސް އިބްރާހިމް މުހައްމަދު ސޯލިހުގެ ވައުދުފުޅުގައި ވާ ގޮތުން ކިޔަވަން ބޭނުންވާ ކޮންމެ ދަރިވަރަކަށް އެ ފުރުސަތު މި ސަރުކާރުން ފަހިކޮށްދޭނެކަމަށެވެ.
އެގޮތުން ރާއްޖޭގެ ޔުނިވަރސިޓީ ތަކުގައި ހިލޭ ކިޔެވުމުގެ ފުރުސަތު ހުޅުވާފައިވާކަމަށާއި ފޮރިން މިނިސްޓަރެއްގެ ހައިސިއްޔަތުން ރާއްޖެއިން ބޭރުން އިތުރު ސްކޮލަރޝިޕް އެއް ލިބޭނެ މަގު ތަނަވަސްކޮށްދިނުމަށް މަސަތްކަތް ކުރަމުންދާ ކަމަށެވެ.
މިނިސްޓަރ ވިދާޅުވީ ރާއްޖެ ތަމްސީލްކުރުމަށް ބޭރުގެ ގިނަ ގައުމުތަކެއްގައި އޮނަރަރީ ކައުންސިލަރުން ކިޔާ ބަޔަކު ހަރަކާތްތެރި ވަމުންދާކަމަށާއި އެއީ ހިލޭ ސާބަހަށް އެ ގައުމުތަކުގައި ހަރަކާތްތެރިވާ އިގްތިސާދީ ގޮތުންނާއި ސިޔާސީ ގޮތުން ނުފޫޒުގަދަ ބަޔެއްކަމަށެވެ.
އެ މީހުންގެ މަސްއޫލިއްޔަތަކީ ދިވެހި ރައްޔިތަކަށް ގައުމެއްގައި ކަމެއް ދިމާވެއްޖެ ހާލަތެއްގައި ކައުންސިއުލަރ އެހީތެރިކަން ދެއްވުންކަން ފާހަގަކުރައްވައި މިނިސްޓަރ ޝާހިދު ވިދާޅުވީ ގައުމުތަކުގެ އިލްމީ ބޭފުޅުންނާއި ޔުނިވާރސިޓީތަކާއި އޮންނަ ގުޅުންތަކުގެ ބޭނުން ހިފައި ފޮރިން މިނިސްޓްރީން ދިވެހިންނަށް ސްކޮލަރޝިޕް ހޯދުމަށް މަސަތްކަތް ކުރަމުންދާކަމަށެވެ . އަދި އޮނަރަރީ ކައުންސިލްގެ ތިއްބެވި ބޭފުޅުންގެ ތެރެއިން ކޮންމެ ބޭފުޅެއްވެސް މަދުވެގެން އެއް ސްކޮލަރޝިޕް ހޯދުމަށް މަސަތްކަތް ކުރައްވާނެކަމަށާއި މަދުވެގެން 20 ދަރިވަރަކަށް ދުނިޔޭގެ އެކި ކަންކޮޅުތަކުގައި ކިޔެވުމުގެ ފުރުސަތު މަގުފަހިވެގެން ދާނެކަމަށް މިނިސްޓަރ ޝާހިދު ވަނީ ވިދާޅުވެފައެވެ.
މިނިސްޓަރ ވިދާޅުވީ ގައުމުތަކުގައި ތިއްބަވާ އޮނަރަރީ ކައުންސިލުން އުފަލާއިއެކު މި މަސަތްކަތަށް އެއްބާރުލުންދޭކަމަށާއި މި ފެށޭ އަހަރުގައި މި މަސަތްކަތްތަކުގެ އަމަލީ މަސަތްކަތް ފެށިގެންދާނެ ކަމަށެވެ.
