ބަޖެޓަށް 1.7 ބިލިއަން ރުފިޔާ އިތުރު ކުރަން މަޖިލީހުން ފާސްކޮށްފި
ފާސްކޮށްފައިވަނީ 71 މެމްބަރުންގެ ވޯޓުން
ރައްޔިތުންގެ މަޖިލީސް
ދައުލަތުގެ ބަޖެޓަށް 1.7 ބިލިއަން ރުފިޔާ އިތުރުކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މިގޮތަށް ފާސްކޮށްފައިވަނީ އަންގާރަ ދުވަހުގެ މަޖިލީހުގެ ޖަލްސާގައި، 71 މެމްބަރުންގެ ވޯޓުންނެވެ.
މަޖިލީހުން މި އަހަރަށް ލަފާކުރާ ބަޖެޓްގެ ގޮތުގައި ފާސްކޮށްފައިވަނީ 30 ބިލިޔަން ރުފިޔާއެވެ. ސަރުކާރުން ބަޖެޓަށް އިތުރު ކުރަން އެދިފައިވަނީ 1،703.9 (އެއް ބިލިޔަން ހަތް ސަތޭކަ ތިން މިލިޔަން އެއްލައްކަ ނުވަދިހަ އަށްހާސް ހަތްދިހަ) ރުފިޔާ އެވެ. ބަޖެޓަށް އިތުރު ކުރި އަދަދާއެކު މުޅި ޖުމްލަ ބަޖެޓްގެ އަދަދަކީ 31،954،904،612 (އެއްތިރީސް ބިލިޔަން ނުވަ ސަތޭކަ ފަންސާސް ހަތަރު މިލިޔަން ނުވަ ލައްކަ ހަތަރު ހާސް ހަ ސަތޭކަ ބާރަ) ރުފިޔާއެވެ.
މިހާތަނަށް މިއަހަރުގެ ބަޖެޓުން 15.5 ބިލިއަން ރުފިޔާ ހަރަދުކޮށްފައިވާއިރު، އާމްދަނީގެ ގޮތުގައި 14.5 ބިލިއަން ރުފިޔާ ވަނީ ލިބިފަ އެވެ.
ދައުލަތުގެ ބަޖެޓަށް 1.7 ބިލިއަން ރުފިޔާ އިތުރުކުރުމަށް ބަޖެޓު ދިރާސާ ކުރި ކޮމެޓީއިން ފާސްކޮށްފައިވަނީ އާދީއްތަ ދުވަހުގެ ރޭ ބޭއްވި ކޮމެޓީ ބައްދަލުވުމުގައެވެ. ބަޖެޓަށް 1.7 ބިލިއަން ރުފިޔާ އިތުރު ކުރުމުގެ މައްސަލަ ދިރާސާ ކުރުމަށް ފިނޭންސް މިނިސްޓަރ އާއި މޯލްޑިވްސް މަނިޓަރީ އޮތޯރިޓީގެ ބޭފުޅުންނާއި އޮޑިޓާރ ޖެނެރަލްގެ އޮފީހުގެ ބޭފުޅުން ވަނީ ބަޖެޓު ދިރާސާކުރި ކޮމެޓީއަށް ހާޒިރުކުރެވިފައެވެ.
ފިނޭންސް މިނިސްޓަރު އަމީރު ބަޖެޓަށް 1.7 ބިލިއަން ރުފިޔާ އިތުރު ކުރައްވަން ހުށަހެޅުއްވި ސަބަބު ބަޔާންކުރަމުން ވިދާޅުވީ، އެގޮތަށް ހުށަހެޅުއްވީ ރައީސް އިބްރާހިމް މުހައްމަދު ސޯލިހު ރައްޔިތުންނަށް ވެވަޑައިގެންފައިވާ ވައުދުތައް ފުއްދައި ދިނުމުގެ ގޮތުންނާއި، ހިލޭ އެހީގެ ގޮތުގައި ރާއްޖެއަށް ލިބިފައިވާ ފައިސާ ބަޖެޓުގައި ހިމެނުމުގެ ގޮތުން ކަމަށެވެ.
ބަޖެޓުގައި ރާއްޖެއަށް ހިލޭ އެހީގެ ގޮތުގައި ލިބިފައިވާ 716،800،000 (ހަތްސަތޭކަ ސޯޅަ މިލިއަން އަށް ލައްކަ) ރުފިޔާ އާމްދަނީގެ ގޮތުގައި ހިމަނާފައިވެއެވެ. އޭގެ ތެރޭގައި ބައިލެޓެރަލް އެހީގެ ގޮތުގައި ލިބިފައިވާ 647,507,607 (ހަސަތޭކެ ސާޅީސް ހަތް މިލިއަން ފަސް ލައްކަ ހަތް ހާސް ހަސަތޭކަ ހަތް) ރުފިޔާ އާއި މަޝްރޫއުތަށް ހިންގުމަށް ލިބިފައިވާ 69،292،393 (ފަސްދޮޅަސް ނުވަ މިލިއަން ދެ ލައްކަ ނުވަދިހަ ދެ ހާސް ތިން ސަތޭކަ ނުވަދިހަ ތިން) ރުފިޔާ ވެސް ހިމެނެއެވެ.
