ކުރީ ސަރުކާރުން ސިއްހީ މަރުކަޒުތައް 24 ގަޑިއިރަށް ބަދަލުކުރީ ދޭންޖެހޭ ވަސީލަތްތައް ނުދީ: މިނިސްޓަރު އަމީން
5 އޯގަސްޓު 2019 | ހޯމަ 06:58އެއްވެސް ބަޖެޓަކާއި، ބޭނުންވާ މުވައްޒަފުންނާއި ދޭންޖެހޭ ވަސީލަތްތަށް ފޯރުކޮށް ދީފައި ނުވާކަމަށް ވިދާޅުވި
ހެލްތް މިނިސްޓަރު އަބްދުﷲ އަމީން ރައްޔިތުންގެ މަޖިލީހުގެ ޖަލްސާގައި
ނިމިދިޔަ ރިޔާސީ އިންތިޚާބާއި ދިމާކޮށް ސިއްހީ ޚިދުމަތްދޭ ތަންތަން 24 ގަޑިއިރަށް ބަދަލުކޮށްފައިވަނީ، އެތަންތަނަށް ދޭންޖެހޭ ވަސީލަތްތައް ފޯރުކޮށްނުދީ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ހޯމަ ދުވަހުގެ މަޖިލިސް ޖަލްސާއަށް ހާޒިރުވެ، ނައިފަރު ދާއިރާގެ މެމްބަރު އަހްމަދް ޝިޔާމް ކުރެއްވި ސުވާލަށް ޖަވާބު ދެއްވަމުންނެވެ.
މެމްބަރު ކުރިމަތިކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ ސިއްހީ ދާއިރާއަށް ޖެހިފައިވާ އެންމެ ބޮޑު ގޮންޖެހުމަކީ ވޭތުވެ ދިޔަ ފަސް އަހަރުގެ ތެރޭގައި އެ ދާއިރާއަށް އަޅާނުލާ ދޫކޮށްލާފައި އޮތް އޮތުން ކަމެވެ. ރިޔާސީ އިންތިޚާބާއި ދިމާކޮށް، ރާއްޖޭގެ ސިއްހީ ޚިދުމަތްދޭ ތަންތަން 24 ގަޑިއިރު ޚިދުމަތްދޭ ތަންތަންގެ ގޮތުގައި ބަދަލުކުރި ކަމަށާއި، އެގޮތަށް ޚިދުމަތްދިނުމަށް ބަދަލުކުރި ނަމަވެސް ހަމައެކަނި ބަދަލު ކުރެވިފައިވަނީ ތަނުގެ ނަން ބޯޑު އެކަނި ކަމަށް މިނިސްޓަރު ވިދާޅުވިއެވެ. މިފަދަ ބަދަލުތައް ގެނައިރު އެތަންތަނަށް އެއްވެސް ބަޖެޓަކާއި، ބޭނުންވާ މުވައްޒަފުންނާއި ދޭންޖެހޭ ވަސީލަތްތަށް ފޯރުކޮށްދީފައި ނުވާކަމަށްވެސް ވިދާޅުވިއެވެ.
މިފަދަ ހާލަތެއްގައި ޚިދުމަތްދޭން ބަދަލުކުރުމުން އެކަށީގެންވާ މިންވަރުގެ ޚިދުމަތެއް އެތަންތަނުން ފޯރުކޮށްދޭނީ ކިހިނެއްތޯ ކަމާއިމެދު މިނިސްޓަރު ވަނީ ސުވާލު އުފައްދަވާފައެވެ. އަދި އެފަދަ ހާލަތެއްގައި މުވައްޒަފުންނާއި ލެބޯޓްރީތަކަށް ވަސީލަތްތަށް ފޯރުކޮށްދޭނެ ގޮތަކާއި މެދު މިނިސްޓަރ ވަނީ ސުވާލުއުފައްދަވާފައެވެ. މިހާރު ސިއްހީ ދާއިރާއަށް ދިމާވެފައިވާ އެންމެ ބޮޑު ގޮންޖެހުމަކީ، މިފަދަ ގޮތަކަށް ސިއްހީ ނިޒާމް ކުރީ ސަރުކާރުން ބަދަލުކުރިކުރުން ކަމަށް މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ ހަމައެކަނި ފައިސާ ހޯދާ ފައިސާ އޮއްސާލުމަކުން ހުރިހާ ކަމެއް ހައްލެއް ނުވާނެ ކަމަށާއި، މި ކަންކަން ރަނގަޅު ކުރެވޭނީ ތަސައްވަރު ރަނގަޅުވެ، ދުރު ވިސްނުމެއް އޮވެގެން ކަމަށް މިނިސްޓަރ ވިދާޅުވިއެވެ. މިހާރުގެ ސަރުކާރުގެ ތަސައްވަރަކީ ރައްޔިތުންނަށް ބޭނުންވާ ސިއްހީ ހިދުމަތްތަށް ބޭނުންވާ ވަގުތު ފޯރު ކޮށްދިނުން ކަމަށެވެ.
ހެލްތް މިނިސްޓަރ މަޖިލީހަށް ހާޒިރުކޮށްފައިވަނީ މަޑުއްވަރީ ދާއިރާގެ މެމްބަރު، އާދަމް ޝަރީފް، މިނިސްޓަރާއި ސުވާލުކުރެއްވުމަށް ހުށަހެޅުއްވުމުންނެވެ.
