ސޯސަން މަގުގައި ހުރި ގެއެއްގެ ޓެރަހުގައި އަލިފާނުގެ ހާދިސާއެއް ހިނގައިފިއެވެ.

އަލިފާނުގެ ހާދިސާ ހިނގާފައިވަނީ ހ. ޓެންސްޓާރ ގައެވެ. ޓެރަހުގައި އަލިފާން ރޯވި ނަމަވެސް އެގޭގެ އެއްވެސް ފަންގިފިލާއަކަށް އަލިފާނުގެ އަސަރު ކޮށްފައި ނުވާކަމަށް އެމްއެންޑީއެފް ގެ މީޑިއާ އޮފިޝަލް ވަނީ ރާއްޖެ އެމްވީ އަށް މައުލޫމާތު ދެއްވާފައެވެ.

އަލިފާން ރޯވި ހާދިސާ ފަޔަރ އެންޑް ރެސްކިއު އަށް ރިޕޯޓު ކޮށްފައިވަނީ ގަޑިން 11:11 ގައި ކަމަށާއި ރިޕޯޓު ކުރެވުނީ އަލިފާން ރޯވިތާ ކިހާ އިރެއް ފަހުން ކަމެއް ނޭނގޭ ކަމަށް ގޭގެ ވެރިފަރާތުން ރާއްޖެއެމްވީ އަށް ވަނީ މައުލޫމާތު ދީފައެވެ.

ރިޕޯޓު ކުރިތާ މާގިނަ އިރުތަކެއް ނުވެ އެ ސަރަހައްދަށް ގޮސް އަލިފާން ކޮންޓްރޯލް ކޮށްފައިވާކަމަށް ފުލުހުންގެ މީޑިއާ އޮފިޝަލް ވަނީ މައުލޫމާތު ދެއްވާފައެވެ.

ގޭގެ ވެރިފަރާތުން އިތުރަށް މައުލޫމާތު ދެމުން ބުނެފައިވަނީ އަލިފާން ރޯވިއިރުވެސް ނޭނގޭ ކަމަށާއި ގޭގައި ދިރިއުޅޭ ފަރާތްތަށް އެވަގުތު ތިބީ ކޮޓަރީގައި ކަމަށެވެ. އަދި ޖެހިގެން ހުރި ގޭގެ ފަރާތްތަކުން އެގޭގައި ގަސްތުގައި ރޯކޮށްލި ކަމުގެ ތުހުމަތު އެ ގޭގައި ދިރުއުޅޭ ފަރާތްތަކުން ވަނީ ކޮށްފައެވެ. ޖެހިގެން ހުރިގޭގެ ފަރާތްތަކާއި އަބަދުވެސް މައްސަލަ ޖެހިފައި އޮންނަ ކަމަށާއި މީގެ ކުރިންވެސް އެގޭގެ ޓެރަސް މައްޗަށް ކުނި ކޮތަޅުފަދަ ތަކެތި އަޅަމުންދާ އެތައް މައްސަލައެއް ފުލުހުންނަށް ރިޕޯޓު ކޮށްފައިވީ ނަމަވެސް އެ މައްސަލައަށް ހައްލެއް ލިބިފައި ނުވާކަމަށް ވެސް ގޭގެ ވެރި ފަރާތުން މައުލޫމާތު ދެއެވެ.

އަލިފާނުގެ ހާދިސާ ހިނގާފައިވާ ސަބަބު މިހާރު ފުލުހުން ތަހުގީގު ކުރަމުން ދާއިރު، ހާދިސާ ހިނގި ސަބަބު ހާމަ ކުރެއްވޭނީ ތަހުގީގަށް ފަހު ކަން ފުލުހުންގެ މީޑިއާ އޮފިޝަލް ވިދާޅުވިއެވެ.

ގެއްލުންވީ ފަރާތްތައް ތިބެން ގަސްދުކޮށްފައިވަނީ ތިމާގެ މީހުންގެ ގެތަކުގައި ކަމަށާއި އެއްވެސް ފަރާތަކަށް މި ހާދިސާގައި އަނިޔާވެފައި ނުވާކަމަށް ވެސް ގޭގެ ވެރި ފަރާތުން ވަނީ މައުލޫމާތު ދީފައެވެ.