ރައްޔިތުން ތަމްސީލް ކުރަން ޖޭއެސްސީގައި އިންނަވާނެ މެމްބަރަކު ހޮވުމަށްޓަކައި ކުރިމަތިލެއްވި ފަރާތްތަކުގެ ނަންތައް ކޮމެޓީ އަށް ފޮނުވައިފި
30 ޖުލައި 2019 | އަންގާރަ 05:413 ފަރާތަކުން ވަނީ ކުރިމަތިލައްވާފަ
ރައްޔިތުންގެ މަޖިލިސް
ރައްޔިތުން ތަމްސީލް ކުރަން ޖޭއެސްސީގައި އިންނަވާނެ މެމްބަރަކު ހޮވުމަށްޓަކައި މަޖިލީހުން ކުރި އިޢުލާނަށް އިޖާބަ ދެއްވައި ކުރިމަތިލެއްވި ފަރާތްތަކުގެ ނަންތައް މަޖިލީހުގެ ޖުޑިޝަރީ ކޮމެޓީ އަށް ފޮނުވައިފިއެވެ.
މަގާމަށް ކުރިމަތިލާފައިވާ ފަރާތްތަކުގެ ނަންތައް އަންގާރަ ދުވަހު އިއްވާފައިވާއިރު މަޖިލީހުގެ ތަޅުމަށް ނަންތައް ހުށަހަޅާފައިވަނީ މަޖިލީހުގެ އަމީން އާންމެވެ.
އެގޮތުން 3 ފަރާތަކުން ވަނީ ކުރިމަތިލައްވާފައެވެ.
މި މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ، މިހާރު މެމްބަރުކަމުގައި އިންނެވި އަބްދުލް ހަންނާނު އަހްމަދު ދައުރުގެ މުއްދަތު ހަމަވާތީއެވެ. އާންމު ރައްޔިތުން ތަމްސީލް ކުރައްވާ މެމްބަރެއްގެ ގޮތުގައި ގާނޫނީ ވަކީލް ހަންނާން އައްޔަންކޮށްފައިވަނީ، ކުރީގެ ރައީސް ޔާމީންގެ ވެރިކަމުގައި 12 އޮގަސްޓް 2014 ގައެވެ.
ޖޭއެސްސީގެ ގާނޫނުގައި ބުނާގޮތުން އެ ކޮމިޝަން ގައި އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހަކަށް އެ ކޮމިޝަނުގައި ހުރެވޭނީ 5 އަހަރުދުވަހުގެ އެއް ދައުރަށް ކަމަށް ވެއެވެ.
މަގާމަށް ކުރިމަތި ލުމުގެ ފުރުސަތު މަޖިލީހުން ހުޅުވާލީ 16 ޖުލައިގައެވެ.
