ޖަޕާނާ ރާއްޖެއާ ދެމެދު ސީދާ ދަތުރުތައް ފަށާފި
ހަފްތާއަކު ހަތަރު ދުވަހު ރާއްޖެއާ ޖަޕާނާ ދެމެދު ސީދާ ދަތުރުތައް ކުރަންވަނީ ހަމަޖެހިފަ
ސްރީލަންކަން އިން ޖަޕާނާ ރާއްޖެއާ ދެމެދު ސީދާ ދަތުރުގެ ހިދުމަތް ފަށާފައިވަނީ ޖުލައި 25 ވަނަ ދުވަހު
ރާއްޖެއަށް އެންމެ ގިނައިން ދަތުރުކުރާ އެއް އެއާރލައިން ކަމަށްވާ ސްރީލަންކަން އެއަރލައިންސް އިން ޖަޕާނާ ރާއްޖެއާ ދެމެދު ސީދާ ދަތުރުގެ ހިދުމަތް ފަށާފިއެވެ.
ސްރީލަންކަން އިން ޖަޕާނުގެ ނަރީޓާ އިންޓަރނޭޝަނަލް އެއަރޕޯޓާ ރާއްޖޭގެ ވެލާނާ އިންޓަރނޭޝަނަލް އެއަރޕޯރޓާ ދެމެދު ސީދާ ދަތުރުތައް ފަށާފައިވަނީ ޖުލައި 25 ވަނަ ދުވަހު ނަރީޓާއިން މާލެއަށް ދަތުރު ކުރި ސީދާ ފްލައިޓުންނެވެ. ސްރީލަންކަން އިން ހަފްތާއަކު ހަތަރު ދުވަހު ރާއްޖެއާ ޖަޕާނާ ދެމެދު ސީދާ ދަތުރުތައް ކުރަންވަނީ ހަމަޖެހިފައެވެ.
މީގެ ކުރިން ސްރީލަންކަން އިން ރާއްޖެއާ ޖަޕާނާ ދެމެދު ދަތުރުތައް ކުރަމުން ދިއައީ ލަންކާގެ ބަންޑާރަނައިކް އިންޓަރނޭޝަނަލް އެއަރޕޯޓް މެދުވެރިކޮށެވެ.
ރާއްޖެއާ ޖަޕާނާ ދެމެދު ސީދާ ދަތުރުތައް ފެށިގެން ދިއުން ވަނީ ރާއްޖޭގެ ފަތުރުވެރިކަމަށް ހެޔޮ އަސަރުތަކެއް ކުރާނެ ކަމަކަށެވެ. ޖަޕާނަކީ ރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކުރާ ގައުމުތަކުގެ ތެރެއިން ގައުމެކެވެ. މިއަހަރުގެ މިހާތަނަށް ޖަޕާނުގެ 22،624 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ.
