ބައެއް ހައުސިންގ މަޝްރޫއުތައް ނުނިމި ހުއްޓާ ވަނީ އެއްކޮށް ވީރާނާވެފައި: މިނިސްޓަރ އާތިފާ
އެ މަޝްރޫއުތަކަކީ އާބިޓްރޭޝަންގެ ދެ މަޝްރޫއެއް
ހައުސިން އެންޑް އާރބަން ޑިވެލޮޕްމެންޓް މިނިސްޓާރ އައިމިނަތް އާތިފާ ލ. އަތޮޅަށް ކުރެއްވި ދަތުރުގެ ތެރެއިން
ސަރުކާރު ވެރިކަމާއި ހަވާލުވިއިރު، މަޝްރޫޢު ނުނިމި ހުއްޓާ ވީރާނާވެފައިވާ ދެތިން މަޝްރޫއުއެއްވާ ކަމަށާއި 1،450 އަށްވުރެ ގިނަ ހައުސިން ޔުނިޓުގެ މަސައްކަތް ހުއްޓާލާފައިއޮތްކަމަށް ހައުސިން އެންޑް އާރބަން ޑިވެލޮޕްމެންޓް މިނިސްޓާރ އައިމިނަތް އާތިފާ ވިދާޅުވެއްޖެއެވެ.
ރައްޔިތުންގެ މަޖިލީހުގެ މެމްބަރުން ކުރިމަތިކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވީ މަޝްރޫޢު ނުނިމި ހުއްޓާ ވީރާނާވެފައިވާ ދެތިން މަޝްރޫއުއެއްވާ ކަމަށެވެ. އަދި އޭގެތެރޭގައި އާބިޓްރޭޝަންގެ ދެ މަޝްރޫއެއް ހިމެނޭ ކަމަށާއި ބައެއް މަޝްރޫއުތަކުގައި ފެނާއި ނަރުދަމާގެ ޚިދުމަތް ދިނުމަށް ނުފެށި ވެސް އެބަހުރި ކަމަށެވެ. ނަމަވެސް އެ މަޝްރޫއުތަކުގެ ތަފްސީލަކަށް މިނިސްޓަރ ވަޑައެއްނުގަންނަވަ އެވެ.
މިނިސްޓާރ އާތިފާ ވިދާޅުވީ، މި ސަރުކާރު ވެރިކަމާއި ހަވާލުވިއިރު 1،450 އަށް ވުރެ ގިނަ ހައުސިން ޔުނިޓުގެ މަސައްކަތް އޮތީ ހުއްޓިފައި ކަމަށެވެ. އަދި ބައެއް ހައުސިން ޔުނިޓްތަކަށް އެއްވެސް ވަރަށް އަޅާނުލާ ވީރާނާވުމަށް ދޫކޮށްލާފައިވާކަމަށާއި، ހައުސިން ޔުނިޓްތަކަށް ބޮޑެތި ގެއްލުންތަކެއް ލިބިފައިހުރިކަމަށެވެ.
މިނިސްޓަރ އާތިފާ ވިދާޅުވީ އެކަންކަން ހައްލުކުރުމަށް ސަރުކާރުން ހާއްސަ އިސްކަމެއްދީގެން ބޮޑެތި މަސައްކަތްތައް ކުރެވިފައިވާކަމަށާއި، އެގޮތުން ހާއްސަ ބަޖެޓެއް ހަމަޖައްސައި މަސައްކަތްތައް ކުރެވިފައިވާކަމަށް މިނިސްޓަރ ވިދާޅުވި އެވެ. އެގޮތުން ބައެއް ހައުސިން ޔުނިޓްތަކުގައި މީހުން ދިރިއުޅެވޭ ފެންވަރަށް ހަދައި ދިނުމުގެ ގޮތުން 127 މިލިއަން ރުފިޔާ ބަޖެޓަށް އިތުރުކޮށްދީފައިވާކަމަށް މިނިސްޓަރ ވިދާޅުވި އެވެ.
