ވިސްލްބްލޯ ކުރާ ފަރާތްތަކަށް ރައްކާތެރިކަން ދިނުމުގެ ބިލް ބަލައިގެނެ، ކޮމެޓީއަށް
17 ޖުލައި 2019 | ބުދަ 10:41ބިލް ބަލައިގަތުމަށް ފާސްވީ 75 މެމްބަރުންގެ ވޯޓުން
ގަލޮޅު އުތުރު ދާއިރާގެ މެމްބަރު އީވާ އަބްދުﷲ
ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހަޅުއްވާފައިވާ ވިސްލްބްލޯ ކުރާ ފަރާތްތަކަށް ރައްކާތެރިކަން ދިނުމާ ބެހޭ ބިލް މަޖިލީހަށް ބަލައިގެންފި އެވެ.
މި ބިލް މަޖިލީހަށް ބަލައިގަތުމަށް 35 މެމްބަރުންގެ ވޯޓު ބޭނުންވާއިރު، ބިލް ބަލައިގަތުމަށް 75 މެމްބަރުން ވޯޓުދީފައިވެއެވެ.
ބިލް ދިރާސާ ކުރުމަށްޓަކާ މިހާރުވަނީ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ފޮނުވާފަ އެވެ.
ބިލްގައިވާގޮތުން ގާނޫނީ ޒިންމާއެއް އަދާނުކުރުމާއި އިންސާނީ ހައްގަކާ ހިލާފު އަމަލެއް ހިންގުމާއި ބައިނަލްއަގުވާމީ އިންސާނިއްޔަތުކަމުގެ ގާނޫނަކާ ހިލާފު ކަމެއް ކުރުމާއި ކޮރަޕްޝަންގެ އަމަލެއް ހިންގުމާއި ދައުލަތުގެ މަގާމު ނަހަމަ ގޮތުގައި ބޭނުން ކުރާކަމަށް ވިސްލްބްލޯކުރާ މީހަކަށް ވަކި ގޮތަކަށް ރައްކާތެރިކަން ދިނުމަށް ދައުލަތުގެ ސަލާމަތީ ހިދުމަތްތަކަށް އެންގުމުގެ އިހްތިޔާރު މުއައްސަސާއަށް ލިބިގެންވެއެވެ.
ބިލްގައިވާ ގޮތުން ވިސްލްބްލޯ ކުރާ ފަރާތުގެ ނަމާއި، އެޑްރެހާއި، އުމުރާއި، އާއިލާއާ ބެހޭ މައުލޫމާތާއި، ވަޒީފާ އަދާކުރާ ތަނާއި މަގާމު ފަދަ މައުލޫމާތުތައް ސިއްރު ކުރަން ޖެހެއެވެ. އަދި މި މައުލޫމާތު ހާމަކުރުމަކީ ކުށެއް ކަމަށް ކަނޑައަޅާ، ކުށުގެ އަދަބަށް ތިން މަސް ދުވަހާއި ފަސް އަހަރު ދުވަހާ ދެމެދުގެ މުއްދަތަކަށް ޖަލަށް ލުން ނުވަތަ ގޭގައި ބަންދު ކުރުން ހިމެނެއެވެ.
