ގަދަ ބާރު ބޭނުންކޮށްގެން އަނިޔާކުރި ފުލުންގެ މައްސަލަ ތަހުގީގު ކުރަން ފަށައިފި
6 ޖުލައި 2019 | ހޮނިހިރު 07:49ހަމީދްގެ ޓްވީޓް ގައި ވަނީ ގަދަ ބާރުގެ ބޭނުން ކުރި ފުލުހުންނާއި ބައްްދަލު ކޮށްފައިވާ ކަމަށް
ކޮމިޝަނާރ އޮފް ޕޮލިސް މުހައްމަދް ހަމީދު
ގަދަ ބާރު ބޭނުނުންކޮށް ބަޔަކަށް ފުލުހުން އަނިޔާކުރި މައްސަލަ ތަހުގީގު ކުރަން ފަށައިފި ކަމަށް ކޮމިޝަނާރ އޮފް ޕޮލިސް މުހައްމަދް ހަމީދު ވިދާޅުވެއްޖެއެވެ . އޭނާ މިގޮތަށް ވިދާޅުވީ މިއަދު ކުރެއްވި ޓްވީޓެއްގައެވެ.
މުހައްމަދު ހަމީދުގެ ޓްވީޓްގައި ވިދާޅުވެފައިވަނީ ގަދަ ބާރުގެ ބޭނުންކުރި ފުލުހުންނާއި ބައްްދަލު ކުރައްވައިފައިވާ ކަމަށެވެ. އަދި އެމައްސަލައިގައި ހިއުމަން ރައިޓްސް ކޮމިޝަނާއި ނެޝަނަލް އިންޓެގްރިޓީ ކޮމިޝަނުން އަމިއްލަ ތަހުގީގުތަކެއް ކުރަމުންދާ ކަމަށް ވެސް ހަމީދު ވިދާޅުވެފައިވެއެވެ. މި ތަހުގީގުތައް ކުރިއަށް ގެންދިއުމުގައި ފުލުހުންގެ އެކްޒެކެޓިވް ޓީމް ގެ ފަރާތުން ފުރިހަމަ އެއްބާރުލުމެއް ލިބިގެންދާނެ ކަމަށް ވެސް ހަމީދު ވިދާޅުވިއެވެ.
ބަލާ ފާސް ކުރުމަށް މ. ބަޑިކުޅި ގެއަށް ޑްރަގް އެންފޯސްމެންޓް ޑިޕާޓްމެންޓްގެ ފުލުހުންތަކެއް ވަދެ، އެގޭގައި ދިރުއުޅޭ ބައެއްގެ މައްޗަށް ގަދަ ބާރު ބޭނުންކޮށް އަނިޔާ ކުރާ ވީޑިއޯއެއް ސޯޝަލް މީޑިއާގައި މިހާރު ދަނީ ދައުރުވަމުންނެވެ. މި ވީޑިއޯގައި ބައެއްގެ ގައިގައި ކޮޅުފައިން ޖަހާ އަނިޔާ ކުރާ މަންޒަރު ފެނިގެންދެއެވެ.
މިގޭގައި މަސްތުވާތަކެތި ގެންގުޅޭ ކަމަށް ތުހުމަތުވެގެން ހިންގި އޮޕަރޭޝަންއަކީ ކޯޓު އަމުރަކާއި އެކު ކުރިއަށް ގެންދެވުނު އޮޕަރޭޝަން އެކެވެ.
މި ވީޑިއޯ އާންމު ވުމާއެކު އެ ވީޑިއޯ ނެގި ކަމުގެ ތުހުމަތުގައި މި އޮޕަރޭޝަން ހިންގި ފުލުހުންވަނީ އޮޕަރޭޝަން ހިންގުނު ގޭގެ ކުރިމައްޗަށް ހުރި އެމްޑީޕީ ގެ ސެކްރެޓަރީ ޖެނެރަލް އަނަސް އަބްދުއްސައްތާރުގެ ގެއަށް ވަދެ އެގޭގެ މީހުންނަށް ބިރު ދައްކާފައެވެ.
މި ހާދިސާގައި އެގޭގަ އުޅޭ ބަޔަކު ވީޑިއޯ ނަގާ އާއްމު ކޮށްފައިވާކަމުގެ ތުހުމަތު ގައި އެ ވީޑިއޯގައި ފެންނަ ފުލުހުން އެގޭގެ ދެ ފްލޯ އަކަށް ވަދެ ފޯނު ބަލާ ފާސްކޮށް އެ ވީޑިއޯ ޑިލީޓް ކުރުމަށް މަސައްކަތް ކޮށްފައިވާ ކަމަށް އަނަސް ޓްވީޓް ކޮށްފައިވެއެވެ. އަދި އެ ފުލުހުން އަނަސް މެންގެއަށް ވަދެފައިވަނީ ފުލުސް އޮޕަރޭޝަންއެއްގެ ދަށުން ކަމަށް ފުލުހުން ބުނެފައިވާ ކަމަށް ވެސް އަނަސް ވިދާޅުވެފައިވެއެވެ.
މި ވީޑިއޯ އާންމު ވުމާއެކު ޕޮލިސް ކޮމިޝަނާރ ވަނީ އަނިޔާ ކުރި ކަމަށް ތުހުމަތު ކުރެވިފައިވާ ފުލުހުން ވަގުތީ ގޮތުން ސަސްޕެންޑް ކުރައްވައިފައެވެ.
