ރައްޔިތުންގެ އަޑަށްވުރެން ވަރުގަދަ އަޑެއް މި ސަރުކާރުގައި ނޯންނާނެ: ޓްއަރިޒަމް މިނިސްޓަރ
23 ޖޫން 2019 | އާދީއްތަ 13:09ވަކި ސަރަހައްދު ތަކެއް ހިމާޔަތް ކުރުމަކީ ސަރުކާރުން އިސްކަން ދޭ ކަމެއް
ޓްއަރިޒަމް މިނިސްޓަރ އަލީ ވަހީދު
ރައްޔިތުންގެ އަޑަށްވުރެން ވަރުގަދަ އަޑެއް މި ސަރުކާރުގައި ނޯންނާނެ ކަމަށް ޓްއަރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
އާދިއްތަ ދުވަހު ޓްއަރިޒަމް މިނިސްޓްރީގައި އޮތް ޕްރެސް ކޮންފަރެންސް އެއްގައި ވާހަކަ ދައްކަވަމުން މިނިސްޓަރ އަލީ ވަހީދު ވިދާޅުވީ ޓްއަރިޒަމް މިނިސްޓްރީން އެންމެ އިސްކަމެއް ދޭން ޖެހޭނީ ރައްޔިތުންގެ އިތުބާރު ދަމަހައްޓަން ކަމަށާއި ރައްޔިތުންގެ އަޑު އަހައިގެން މި ސަރުކާރު ހިންގުމަކީ އެއީ މި ސަރުކާރުގެ އަމާޒް ކަމަށެވެ.
އަދި ދިވެހި ރައްޖޭގައި އިންވެސްޓްކުރާ ފަރާތްތަކުގެ އިންވެސްޓަރ ޓްރަސްޓް ނުގެއްލޭނެހެން ކަންކަން ތަރުތީބު ކުރުމަކީ ސަރކާރުން އިސްކަމެއް ދޭ ކަމެއް ކަމަށް ވެސް އަލީ ވަހީދު ވިދާޅުވިއެވެ.
މީގެ އިތުރުން ވެސް މިނިސްޓަރ ވިދާޅުވީ އަތޮޅު ތަކުގައި ވަކި ސަރަހައްދު ތަކެއް ހިމާޔަތް ކުރުމަކީ މި ސަރުކާރުން އިސްކަން ދޭ ކަމެއް ކަމަށާއި އެ މަސައްކަތް ފެށިގެން ކުރިއަށް ދާ ކަމަށެވެ.
އެގޮތުން ބޮޑުތިލަދުންމަތިން ކޭލަކުނު ފަދަ ތަންތަނަކީ މިހާރުވެސް ހިމާޔަތް ކުރެވިފައިވާ ތަންތަން ކަމަށާއި މި ވަގުތުވެސް އެންވަޔަރުމެންޓް މިނިސްޓްރީން ބައެއް ސަރަހައްދު ތަކުގައި ތިމާވެއްޓާއި ގުޅުން ހުރި މިފަދަ ނިންމުންތައް ނިންމަމުން ދާކަމަށް ވެސް އަލީ ވަހީދު ވިދާޅުވިއެވެ. އަދި ޓްއަރިޒަމް މިނިސްޓްރީން ތިމާވެއްޓަށް ގެއްލުން ލިބޭނެ އެއްވެސް ކަމެއް ނުކުރާނެ ކަމުގެ ޔަގީން ކަން އެހެން މިނިސްޓްރީ ތަކަށް ދޭން ބޭނުންވާ ކަމަށް ވެސް އޭނާ ވިދާޅުވިއެވެ.
މިނިސްޓަރ ވިދާޅުވީ އެމްއެމް ޕީއާރުސީއަށް ދޫކޮށްފައިވާ ފަޅުތަކާއި ރަށްތަކާއި ގުޅިގެން ނިންމާ ނިންމުންތައް ބަންޑާރަ ނައިބުގެ ލަފާފުޅާއި އެއްގޮތަށް ނިމިގެންދާނެ ކަމަށާއި އަދި ގާނޫނާއި ގަވާއިދުގެ އިމުގެ ތެރެއިން މި މައްސަލަތައް ނިމިގެން ދާނެ ކަމުގެ ޔަގީންކަން ދޭ ކަމަށެވެ . އަދި މިނިސްޓްރީ އަށް އޮތް އެންމެ ބޮޑު ކަންބޮޑު ވުމަކީ ވެސް އެއީ ކަމަށް މިނިސްޓަރ ވިދާޅުވިއެވެ.
