ޖޭއެސްސީގެ މައްސަލަ އަށް ހިޔާލު ފާޅުކޮށް ޓްވީޓް ކުރެވުނީ އޮޅުމަކުން: ފެނަކަ
15 ޖޫން 2019 | ހޮނިހިރު 02:25މައްސަލަ ބަލާ ފިޔަވަޅު އަޅައިފި ކަމަށް ފެނަކައިން ބުނި
ފެނަަކަ ކޯޕަރޭޝަންގެ އެމްޑީ ސައީދު
ޖުޑީޝަލް ސާވިސަސް ކޮމިޝަން އާއި ޖުޑީޝަރީއާ ޖެހިގެން އުޅޭ މައްސަލައަށް ހިޔާލު ފާޅުކޮށް ފެނަކަ ކުންފުނީގެ ރަސްމީ ޓްވިޓާ އެކައުންޓުން ޓްވީޓް ކުރެވުނީ، އެކަން މަތިކުރެވިފައި މުވައްޒަފަށް އޮޅިގެން ކަމަށް ފެނަކައިން ބުނެފިއެވެ.
ހުކުރު ދުވަހު ނެރުނު ބަޔާނެއްގައި ފެނަކައިން ބުނެފައި ވަނީ އެ މުވައްޒަފަށް ޓްވީޓް ކުރެވުނީ، އޭނާގެ އަމިއްލަ އެކައުންޓުން ޓްވީޓް ކުރަން އުޅެނިކޮށް ކަމަށެވެ. ރަސްމީ ޓްވިޓާ އެކައުންޓުން އެ ކުންފުނީގެ މަސައްކަތުގެ ދާއިރާއާ ނުގުޅޭ، އަދި އެއްވެސް ގޮތަކުން އެކަށީގެން ނުވާ ޓްވީޓެއް ކޮށްފައިވާ މައްސަލަ އެ ކުންފުނިން ބަލާފައިވާ ކަމަށް ވެސް ބަޔާނުގައި ވެއެވެ.
ފެނަކައިން ބުނީ އެކަން ކުރި މުއައްޒަފާ ދޭތެރޭ އަޅަންޖެހޭ ފިޔަވަޅު އަޅާނެ ކަމަށެވެ. އިތުރަށް އެ ބަޔާނުގައި ވަނީ އެ ފަދަ ކަންކަމަކީ ކުންފުނީގެ މެނޭޖްމަންޓުން އެއްވެސް ހާލެއްގައި ބަލައިގަންނަ، އަދި ތަރުހީބުދޭ ކަމެއް ނޫން ކަމަށާއި، އެކަމަށް އެންމެހާ ރައްޔިތުންގެ ކިބައިން މައާފަށް އެދޭ ކަމަށެވެ.
ފެނަކައިގެ ޓްވީޓާ ގުޅިގެން އާންމުންގެ ފާޑުކިޔުން އެ ކުންފުންޏަށް އަމާޒުވެފައި ވެއެވެ. އެގޮތުން ސޯޝަލް މީޑިއާގައި ދައުރުވަމުންދިޔަ ފޮޓޯތަކުގެ ކޮމެންޓްތަކުގައި، ކުންފުންޏަށް ހަވާލުކުރެވިފައިވާ މަސައްކަތް ކުރަން ގޮވާލާ ގިނަ ބަޔަކު ހިޔާލުފާޅުކޮށްފައިވެއެވެ.
