ޖައްވު ތަޣައްޔަރު ކުރުމާ ދެކޮޅަށް އެންމެން އަތުކުރި އޮޅާލަން ޖެހޭ: ޑރ. ހުސެއިން

ޖައްވު ތަޣައްޔަރު ކުރުވާ ވިހަ މާއްދާތައް މަދު ކުރުމަށް ހުރިހާ އެންމެން ވެސް އަތުކުރި އޮޅާލުމަށް އެންވަޔަރަންމަންޓް މިނިސްޓަރު ޑރ. ހުސައިން ރަޝީދު ގޮވާލައްވައިފިއެވެ.

މިނިސްޓަރު އެހެން ގޮވާލައްވާފައި ވަނީ ދުނިޔޭގެ ތިމާވެށީގެ ދުވަހުގެ މުނާސަބަތުގައި ނެރުނު ހިތާބުގައެވެ. އދ. ގެ ޖެނެރަލް އެސެމްބްލީން ފާސްކޮށްގެން ކޮންމެ އަހަރަކުގެ ޖޫން މަހުގެ 5 ވަނަ ދުވަހުން ފެށިގެން ތިމާވެށީގެ ދުވަސް ފާހަގަކުރަމުން އަންނަތާ 44 އަހަރު ވެއްޖެއެވެ.

Advertisement

މި އަހަރުގެ ދުނިޔޭގެ ތިމާވެށީގެ ދުވަހުގެ ޝިއާރުގެ ގޮތުގައި ކަނޑައަޅާފައި ވަނީ "ވައި ތަޣައްޔަރުވުން" އެވެ. ބުދަ ދުވަހު ނެރުނު ބަޔާނުގައި ޑރ. ހުސައިން ވިދާޅުވީ، ޒަމާނާއި އިންސާނުންގެ ދިރިއުޅުމުގެ ވައްޓަފާޅިއަށް އައި ބަދަލުތަކާ އެކު ނޭވާ ލާ ވައި ވަނީ ތަޣައްޔަރުވެފައި ނުވަތަ ދަނީ ތަޣައްޔަރު ވަމުން ކަމަށެވެ.

ވައި ތަޣައްޔަރު ވުމުގައި ކޮންމެ މީހަކުވެސް އެ މީހެއްގެ ހިއްސާއަކީ ކޮބައިތޯ މިއަދު ވިސްނާލުން މުހިއްމު ކަމަށް މިނިސްޓަރު ވިދާޅުވިއެވެ. އެއް ތަނުން އަނެއް ތަނަށް ދަތުރު ކުރުމާއި ތަފާތު ބޭނުންތަކަށް ހަކަތަ އުފައްދާ އުފެއްދުމާއި، އަދި ކުނި މެނޭޖްކުރުމުގައި އަމަލުކުރާ ގޮތުގެ ސަބަބުން ޖައްވަށް ދޫކުރާ ދުމުގައި އެކުލެވޭ ވިހަ މާއްދާތަކުން އިންސާނުންނާއި އެހެން ދިރުންތަކަށް ކުރާ ނޭދެވޭ އަސަރުތަކާ މެދު ފިކުރުކޮށްލުން މުހިއްމުކަން ޑރ. ހުސެއިން ފާހަގަކުރެއްވިއެވެ.

ވައި ތަޣައްޔަރު ވުމަކީ މިއަދު ތަފާތު ބޮޑެތި ސިއްޙީ މައްސަލަތައް އިންސާނާއަށް ކުރިމަތި ކުރާ ކަމެކެވެ. ތަޣައްޔަރުވެފައިވާ ވަޔަށް ލާ ކޮންމެ ނޭވާއަކުން ފުއްޕާމެއާއި، ހިތް އަދި ސިކުނޑިއަށް ނޭދެވޭ އަސަރު ފޯރައެވެ. ފުއްޕާމޭގައި ވިހަ މާއްދާތައް އަށަގަނެ، ލޭގެ ތެރޭގައި މި މާއްދާތައް ދައުރުވާން ފެށުމުގެ ސަބަބުން ހަށިގަނޑުގެ މުހިންމު އެހެން ގުނަވަންތަކަށް މިކަމުގެ ނޭދެވޭ އަސަރުކުރަން ފަށައެވެ.

މިނިސްޓަރު ވިދާޅުވީ، ޖައްވު ތަޣައްޔަރު ކުރާ މާއްދާތައް ދުނިޔޭގެ ވައިގެ ފަށަލައިގައި އިތުރުވުމުގެ ސަބަބުން މޫސުމަށް އަންނަމުންދާ ބަދަލުތަކަކީ މިއަދު ހަމައެކަނި ދިރާސާއަކުން ފެންނަން ހުރި ކަންކަމެއް ނޫން ކަމާށައި، ތޫފާންތަކުގެ ބާރު ގަދަވުމާއި، ހަނަފަސްކަން އިތުރުވުމާއި، ގަސްކަރައަށް އަންނަމުންދާ ނޭދެވޭ ބަދަލުތަކާއި ލިބޭ ގެއްލުންތަކަކީ ދުނިޔޭގެ އެތައް ބަޔަކު ކޮންމެ ދުވަހަކު ވެސް ތަހައްމަލު ކުރަން ޖެހިފައިވާ ކަންކަން ކަމަށެވެ.

އިންސާނީ ތާރީހުގައި ޖައްވުގައި ކާރބަންޑައި އޮކްސައިޑްގެ މިންވަރު ކުރިން އިތުރު ނުވާހާ މިންވަރަށް މިއަހަރުގެ މާރޗް މަހު ވަނީ އިތުރުވެގެން ގޮސްފައެވެ.

ދުޅަހެޔޮ، ހަށިހެޔޮ އަދި ވެށިހެޔޮ އަދަކަށް އަދި މިއަށް ވުރެ ފަހި މާދަމާއެއް، ލިބިގަންނަން ޖެހޭ ކަމަށް ވިދާޅުވިއެވެ. އަދި އެކަމުގައި ބޭނުންވަނީ އެންމެންގެ ބައިވެރިވުމާއި އެއްބާރުލުން ކަމަށާއި މިއީ، ދިވެހިންނަށް ހާސިލްކުރެވިދާނެ ލަނޑުދަނޑިއެއް ކަމަށް އެންވަޔަރަމަންޓް މިނިސްޓަރު ވިދާޅުވިއެވެ.