އިތުރު ކުންފުނިތަކަށް ޖާގަ ދީގެން ވިޔަސް އިންޓަނެޓް އަގުހެޔޮކުރާނަން: މިނިސްޓްރީ
މަޝްވަރާތައް ދިގުލައިގެން ގޮސްފައިވޭ: މިނިސްޓްރީ
ދިރާގުގެ އިވެންޓެއްގައި ރައީސުލްޖުމްހޫރިއްޔާ
ރާއްޖޭގައި އިންޓަނެޓް އަގު ހެޔޮކުރުމަށް ކުރުމަށް މިސަރުކާރުން ކުރަމުންދާ މަސައްކަތަށް އެދެވޭ ބަދަލެއް ނުގެނެވޭނަމަ އިތުރު ކުންފުނިތަކަށް ޖާގަ ދީގެންވެސް އިންޓަނެޓް އަގުހެޔޮކުރާނެ ކަމަށް ކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓްރީން ބުނެފިއެވެ.
އިންޓަނެޓްގެ އަގު ހެޔޮކުރުމަކީ ރައީސް ސޯލިހުގެ ރިޔާސީ ވައުދެކެވެ. ރަސްމީ ގޮތުން އިންޓަނެޓް އަގުހެޔޮކުރުމުގެ މަޝްވަރާތައް ފަށާފައިވަނީ މާޗް މަހުއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަމުން މިއުނިކޭޝަން ސައިންސް އެންޑް ޓެކްނޮލޮޖީ މިނިސްޓްރީން ސްޓޭޓް މިނިސްޓަރު އަލީ ސޯލިހު ވިދާޅުވީ، އިންޓަނެޓް އަގު ހެޔޮކުރުމަށް ކަޑައްތު ކުރަން ޖެހޭ ހުރިހާ މަރުހަލާތަކެއް ކަޑަތުކޮށް މިހާރު ކުރިއަށް ދަނީ އެންމެ ފަހު މަރުހަލާ ކަމަށެވެ.
ރާއްޖޭގައި އިންޓަނެޓް ފޯރުކޮށް ދޭ ދިރާގާ، އުރީދޫގެ އިތުރުން ރާއްޖެ އޮންލައިން (ރާއޯއެލް)އާ އެކު ގިނަ މަޝްވަރާތަކެއް ކުރެވިފައިވާ ކަމަށް އަލީ ވިދާޅުވިއެވެ. އެ މަޝްވަރާތަށް މާބޮޑަށް ދިގުލައިގެން ގޮސްފައިވާ ކަން އޭނާ ވަނީ ފާހަގަކޮށްފައެވެ.
އެހެން ކަމުން ރައްޔިތުންނަށް އިންޓަނެޓް އަގުހެޔޮކުރުމަށް ކުރެވޭ މަސައްކަތުގައި އެންމެ އެދެވޭ ބަދަލެއް ނާންނަނަމަ އިތުރު ކުންފުނިތަކަށް ޖާގާދީގެން ވެސް ސަރުކާރުގެ ވައުދު ފުއްދާނެ ކަމުގެ އޭނާ ދެއްވިއެވެ.
އަލީ ވިދާޅުވީ، 26 ގައުމެއްގެ އިންޓަނެޓް އަގުތައް ނަގައިގެން ކުރެވުނު ދިރާސާ ދައްކާ ގޮތުން ރާއްޖޭގައި އިންޓަނެޓްގެ އަގު ބޮޑު ކަމަށެވެ.
އިންޓަނެޓްގެ އަގު ތިރިކުރުމަށް އެކަށީގެންވާ އަގުތަކެއް އޮޕަރޭޓަރުންނަށް ހުށައަޅާފައިވާ ކަން ފާހަގަ ކުރައްވަމުން އަލީ ވިދާޅުވީ، ހަފްތާއެއްގެ ތެރޭގައި ރައްޔިތުންނަށް އެދެވޭ ބަދަލަކާއި އެކީ އޮޕަރޭޓަރުންގެ ފަރާތުން އެކަމަށް އެއްބަސްވުމަށް އާދެވޭނެ ކަމަށް ލަފާކުރާކަމަށެވެ.
